Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Luka 16:1-31

HAAPOTORAA O TE MAU TUMU PARAU

  • Faahoho‘araa o te tiaau parau-tia ore (1-13)

    • ‘Te taata o te haapao maitai i te mea iti, e haapao maitai atoa ïa i te mea rahi’ (10)

  • Te ture e te Faatereraa arii a te Atua (14-18)

  • Faahoho‘araa o te taata tao‘a rahi e Lazaro (19-31)

16  Na ô atoa ’tura Iesu i te mau pǐpǐ: “E tiaau ta te hoê taata tao‘a rahi e ua parihia oia i te haamâu‘a i te faufaa a to ’na fatu.  Titau atura te fatu ia ’na e na ô atura: ‘Eaha ta ’u e faaroo nei no oe? Haere a papai mea nafea to oe faaohiparaa i ta ’u moni, e ore hoi oe e tiaau faahou i to ’u utuafare.’  Feruri ihora te tiaau: ‘E nafea râ vau, e tihati hoi to ’u fatu ia ’u? Eita e haere ia ’u ia utaru, mea haama atoa ia taparu haere i te moni.  Ua ite au eaha ta ’u e rave ia farii mai te taata ia ’u i ǒ ratou ua ere ana‘e au i to ’u toroa tiaau.’  Titau hoê hoê atura oia i te feia tei tarahu i to ’na fatu e na ô atura i te hoê: ‘Ehia ta oe tarahu i to ’u fatu?’  Pahono maira oia: ‘Hoê hanere tura* hinu olive.’ Na ô atura oia: ‘A rave i ta oe parau faaau, a parahi e a papai haaviti e 50.’  Ui ihora oia i te tahi: ‘E oe, ehia ta oe tarahu?’ Pahono maira oia: ‘Hoê hanere pute* sitona.’ Na ô atura oia: ‘A rave i ta oe parau faaau e a papai e 80.’  Haapopou ihora te fatu i te tiaau, noa ’tu e e taata parau-tia ore, no to ’na haaraa ma te paari. E rahi a‘e te paari o te mau tamaiti o teie faanahoraa o te ao nei* i to te mau tamaiti o te maramarama ia ohipa ratou i nia ia vetahi ê.  Te parau atoa ’tu nei au: A imi i te hoa no outou maoti te mau tao‘a a teie nei ao parau-tia ore. E ia mo‘e taua mau tao‘a ra, e fariihia mai ïa outou e teie mau hoa i roto i te mau nohoraa mure ore. 10  Te taata o te haapao maitai i te mea iti, e haapao maitai atoa ïa i te mea rahi, e te taata o te haapao ore i te mea iti, e haapao ore atoa ïa i te mea rahi. 11  No reira, ua faaite outou e aita outou i haapao maitai i te mau tao‘a a teie nei ao parau-tia ore, eita atoa ïa e horoahia ’tu te mau tao‘a mau. 12  Ia faaite atoa outou e aita outou i haapao maitai i ta vetahi ê mau tao‘a, eita atoa ïa e horoahia ’tu ta outou. 13  E ore e tia i te hoê tavini ia tavini e piti fatu, e hae hoi oia i te hoê e e here oia i te tahi atu, aore ra e faatura oia i te hoê e e vahavaha oia i te tahi atu. E ore e tia ia outou ia tavini i te Atua e te moni.” 14  Faaroo noa maira râ te mau Pharisea nounou moni e hi‘o faaooo maira ia Iesu. 15  Na ô atura ïa oia: “Te faataata parau-tia nei outou ia outou i mua ia vetahi ê, ua ite râ te Atua eaha to roto i to outou aau. Ta te taata e haafaufaa rahi nei, mea faufau ïa i te aro o te Atua. 16  I faaite-haere-hia na te ture a Mose e te mau papai a te mau peropheta e tae roa a‘enei ia Ioane ra. Mai reira mai, o te Faatereraa arii a te Atua* te faaite-haere-hia nei ei parau apî oaoa e ta te mau huru taata atoa e tapi nei. 17  Ia mou noa ’tu te ra‘i e te fenua, e ore te hoê tuhaa iti o te ture a Mose e mou e ia hope roa i te tupu. 18  Te tane o te faataa i ta ’na vahine faaipoipo, a faaipoipo atu ai i te tahi atu, e faaturi ïa. E te tane o te faaipoipo i te hoê vahine ua taa raua ta ’na tane faaipoipo, e faaturi ïa. 19  Te vai ra te hoê taata tao‘a rahi, tei oomo noa na i te ahu lino vareau moni rahi, a oaoa ’i i te mau mahana atoa i to ’na oraraa fana‘o. 20  Teie râ, e vaiihohia na te hoê taata veve* o Lazaro te i‘oa i te uputa o te fare o te taata tao‘a rahi. Ua î roa to ’na tino i te aai. 21  Hiaai atoa ihora oia e amu i te hu‘ahu‘a maa e topa mai nia mai te amuraa maa a te taata tao‘a rahi. Haere atoa maira te urî e mitimiti i to ’na tino aai. 22  I muri a‘e, pohe atura te taata veve e hopoihia ’tura oia e te mau melahi i pihai iho ia Aberahama.* Pohe atoa ’tura te taata tao‘a rahi e hunahia ’tura. 23  I te Apoo,* a mauiui roa ’i oia, hi‘o a‘era oia i nia e ite maira ia Aberahama i te atea ê e ia Lazaro i pihai iho ia Aberahama.* 24  Pii maira oia e na ô maira: ‘To ’u metua Aberahama, aroha* mai ia ’u, e a tono mai ia Lazaro ia tuu rii noa ’‘e i to ’na manimani rima i roto i te pape, a faato‘eto‘e mai ai i ta ’u arero, te mauiui nei hoi au i roto i teie auahi ura.’ 25  Na ô atura râ Aberahama: ‘Tamaiti, a haamana‘o i te mau maitai rahi tei noaa ia oe i to oe oraraa na, area Lazaro te mauiui rahi ïa. I teie nei râ, te tamahanahanahia ra oia i ǒ nei, o oe râ, te mauiui nei ïa. 26  Ua tuu-atoa-hia te hoê area rahi i rotopu ia matou e ia outou, ia ore to ǒ nei e tae i ǒ outou, e ia ore to ǒ atu e tae mai i ǒ matou.’ 27  Na ô maira oia: ‘Te ani atu nei ïa vau ia oe, to ’u metua Aberahama, ia tono ia Lazaro i te fare o to ’u metua tane, 28  e pae hoi taeae to ’u, ia faaara ïa oia ia ratou, a ore atu ai ratou e haere atoa mai i teie nei vahi haamauiuiraa.’ 29  Na ô atura râ Aberahama: ‘Tei ia ratou ra Mose e te mau peropheta. Ia faaroo ïa to oe mau taeae ia ratou.’ 30  Parau maira oia: ‘To ’u metua Aberahama, eita ratou e faaroo. Ia haere atu râ te hoê taata tei faatiahia mai te pohe mai ia ratou ra, e tatarahapa ïa ratou.’ 31  Pahono atura râ oia: ‘Ia ore ratou e faaroo ia Mose e te mau peropheta, eita atoa ïa ratou e faaroo i te taata tei faatiahia mai te pohe mai.’”

Nota i raro i te api

Hoê tura, e 22 ïa litera.
Hoê pute, 170 ïa kilo.
Aore ra “teie tau.” A hi‘o i te titionare.
Aore ra “Basileia o te Atua.”
E taparu teie taata i te moni e te tahi atu mau mea.
“I nia i te ouma o Aberahama” na roto i te reo Heleni.
Aore ra “Hade,” oia hoi te menema o te huitaata. A hi‘o i te titionare.
“I nia i te ouma o Aberahama” na roto i te reo Heleni.
Aore ra “aroha hamani maitai.”