Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Luka 15:1-32

HAAPOTORAA O TE MAU TUMU PARAU

  • Faahoho‘araa o te mamoe i mo‘e (1-7)

  • Faahoho‘araa o te moni i mo‘e (8-10)

  • Faahoho‘araa o te tamaiti i mo‘e (11-32)

15  Tapiri maira te feia titau tute e te feia rave hara ia Iesu no te faaroo ia ’na.  Ohumu a‘era te mau Pharisea e te mau papai parau a na ô ai: “Te farii maitai ra teie taata i te feia rave hara e te tamaa ra e o ratou.”  Horoa ’tura oia i teie faahoho‘araa:  “O vai ïa taata i rotopu ia outou 100 mamoe ta ’na, ia mo‘e te hoê, e ore e vaiiho i na 99 i te medebara,* a imi atu ai i tei mo‘e e ia itehia ’tu?  E ia itehia ia ’na, e amo oia i taua mamoe ra i nia i to ’na tapono ma te oaoa.  E ia tae oia i te fare, e titau oia i to ’na mau hoa e te feia tapiri atoa a na ô ai: ‘Mai oaoa ana‘e, ua itea mai hoi ia ’u ta ’u mamoe i mo‘e na.’  Te parau atu nei au, e oaoa rahi atoa tei te ra‘i no te hoê noa taata rave hara e tatarahapa, eiaha râ no na 99 taata parau-tia e mana‘o ra e aita e faufaa ia tatarahapa ratou.  O vai atoa ïa vahine hoê ahuru moni ario* ta ’na, ia mo‘e te hoê, e ore e tutui i te mori, a purumu atu ai i to ’na fare e a paimi maitai atu ai e ia iteahia ’tu?  E ia itehia ia ’na, e titau oia i to ’na mau hoa* e te feia tapiri atoa a na ô ai: ‘Mai oaoa ana‘e, ua itea mai hoi ia ’u te moni ario i mo‘e na ia ’u.’ 10  Te parau atu nei ïa vau, e oaoa te mau melahi a te Atua no te hoê noa taata rave hara e tatarahapa.” 11  Na ô atoa ’tura oia: “E piti tamaiti ta te hoê taata. 12  Parau maira te teina i to ’na metua tane: ‘To ’u metua, horoa mai na i ta ’u tufaa.’ Tufa ihora te metua tane i ta ’na mau faufaa mai tei au ia raua tataitahi. 13  Tau mahana i muri iho, haaputu ihora te teina i ta ’na mau mea atoa, reva ’tura i te hoê fenua atea, e hue atura i ta ’na faufaa i roto i te ohipa haapaoraa ore.* 14  Pau roa a‘era ta ’na faufaa, tupu ihora te o‘e rahi i taua fenua ra, e poia roa a‘era oia. 15  Haere roa ’tura oia e rave i te ohipa na te hoê taata no reira, o tei faaue ia ’na ia haere i to ’na mau fenua e haapao i te nǎnǎ puaa. 16  Hiaai atura oia i te maa ta te puaa e amu, aita râ e taata e horoa ’tu i te maa na ’na. 17  Haamata ’tura oia i te feruri maitai e na ô ihora: ‘Te tamaa maitai ra te mau rave ohipa e rave rahi a to ’u metua tane, o vau nei râ, te pohe nei ïa i te poia i ǒ nei! 18  E reva vau i ǒ to ’u metua tane ra, a na ô atu ai: “To ’u metua, ua hara vau i te Atua i te ra‘i e ia oe. 19  Eita e tano faahou ia parauhia vau ei tamaiti na oe. Faariro oe ia ’u mai te hoê o ta oe mau rave ohipa.”’ 20  Reva ’tura oia i ǒ to ’na metua tane ra. Tei te atea ê â oia, ite maira to ’na metua tane ia ’na, aroha ihora, horo maira, tauahi maitai ihora ia ’na* e apa maira. 21  Na ô atura te tamaiti: ‘To ’u metua, ua hara vau i te Atua i te ra‘i e ia oe. Eita e tano faahou ia parauhia vau ei tamaiti na oe.’ 22  Na ô ihora râ te metua tane i ta ’na mau tavini: ‘Haaviti, hopoi mai i te hoê ahu roa, te mea nehenehe roa ’‘e, a faaahu ia ’na, a oomo i te tapea i to ’na rima e te tiaa i to ’na avae. 23  Putô atoa mai i te puaatoro oni apî poria e tupai atu. Tamaa e arearea ana‘e, 24  i pohe na hoi ta ’u tamaiti nei e ua ora faahou mai. I mo‘e na oia e ua ho‘i mai.’ Arearea ’tura ratou. 25  Tei te faaapu ta ’na tamaiti matahiapo. I to ’na râ ho‘iraa mai e piriraa mai i te fare, faaroo ihora oia i te upaupa e te ori. 26  Pii maira oia i te hoê tavini e ui maira eaha tera. 27  Pahono atura te tavini: ‘Ua tae mai to teina, e ua tupai to metua tane i te puaatoro oni apî poria no te mea ua ho‘i mai oia e mea maitai o ’na.’ 28  Riri ihora râ oia e aita ’tura i hinaaro e tomo i roto i te fare. Haere atura to ’na metua tane i rapaeau e taparu ia ’na ia tomo mai. 29  Pahono maira oia i to ’na metua tane: ‘Ahia ’tura matahiti to ’u taviniraa ia oe e haapao-noa-raa i ta oe i faaue mai. Aita roa ’tu râ oe i horoa mai i te hoê puaaniho apî ia tamaa vau e to ’u mau hoa. 30  I te taeraa mai iho â tena tamaiti ta oe, o tei hue* i ta oe faufaa na te mau vahine taiata, tupai ihora ïa oe i te puaatoro oni apî poria no ’na.’ 31  Na ô atura te metua tane: ‘Ta ’u tamaiti, to pihai iho noa na oe ia ’u, e ta ’u mau tao‘a atoa, na oe ïa. 32  E mea tia râ ia arearea e ia oaoa tatou, i pohe na hoi to teina e ua ora faahou mai. I mo‘e na oia e ua ho‘i mai.’”

Nota i raro i te api

E tuhaa fenua teie aita i rahi te taata na reira.
“Moni derama” na roto i te reo Heleni. Hoê derama, o te moni ïa no fatata hoê mahana ohipa. A hi‘o i te titionare.
Aore ra “hoa vahine.”
Aore ra “aita e apî,” “faufaa ore.”
“Topa ’tura i nia i to ’na a‘î” na roto i te reo Heleni.
“Haapau” na roto i te reo Heleni.