Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Luka 14:1-35

HAAPOTORAA O TE MAU TUMU PARAU

  • Faaorahia te hoê taata rima e avae oruoru i te Sabati (1-6)

  • Ei manihini haehaa (7-11)

  • Titau manihini i te feia aita ta ratou no te faaho‘i (12-14)

  • Faahoho‘araa o te mau manihini tei imi i te otoheraa (15-24)

  • Haapaeraa no te riro ei pǐpǐ (25-33)

  • Ia maaro te miti (34, 35)

14  I te hoê Sabati,* tomo atura Iesu i roto i te fare o te hoê raatira Pharisea e tamaa. Hi‘o noa maira to reira mau taata ia ’na.  E inaha, te vai ra i mua ia ’na te hoê taata ua oruoru to ’na na rima e na avae i te pape.  Ui ihora Iesu i te feia mea ite i te ture a Mose e i te mau Pharisea: “Mea tano anei ia au i te ture ia faaora i te ma‘i i te Sabati aore ra eita?”  Mamû noa ihora râ ratou. Tapea ’tura oia i taua taata ra, faaora ihora i to ’na ma‘i e tuu atura ia ’na ia haere.  Na ô atura oia: “O vai o outou, ia topa ta ’na tamaiti aore ra puaatoro oni i roto i te apoo pape i te mahana Sabati, e ore e huti mai i rapae i reira iho?”  Aita i tia ia ratou ia pahono.  A ite ai oia e te maiti ra te mau manihini i te mau vahi faataahia no te feia tiaraa teitei, horoa ’tura oia i te hoê hi‘oraa. Na ô ihora oia ia ratou:  “Ia titau-manihini-hia oe i te hoê oroa faaipoiporaa, eiaha e tarava i te vahi faataahia no te feia tiaraa teitei. Peneia‘e ua titau-manihini-atoa-hia te tahi atu taata tei hau a‘e ia oe.  Haere maira te fatu fare e na ô maira ia oe: ‘A vaiiho i tena parahiraa no teie taata.’ Haere haama noa ’tura oe i te parahiraa hopea. 10  Ia titau-manihini-hia râ oe, a haere i te parahiraa hopea. Ia haere mai te fatu fare, e na ô mai oia: ‘To ’u hoa, a haere i mua ’tu.’ I reira ïa oe e faaturahia ’i e te mau manihini atoa. 11  Te taata hoi o te faateitei ia ’na, e faahaehaahia ïa, e te taata o te faahaehaa ia ’na, e faateiteihia ïa.” 12  Na ô atoa ’tura Iesu i tei titau manihini mai ia ’na: “Ia faatupu oe i te hoê tamaaraa i te avatea aore ra i te ahiahi, eiaha oe e titau manihini i to mau hoa, taeae, fetii aore ra te feia tapiri tao‘a rahi. E titau manihini atoa mai paha ratou ia oe ei faaho‘iraa i ta oe. 13  Ia faatupu râ oe i te hoê tamaaraa, a titau manihini i te feia veve, te huma, te piri‘o‘i, te matapo. 14  E oaoa ïa oe, no te mea aita ta ratou no te faaho‘i mai i ta oe. I te tia-faahou-raa hoi o te feia parau-tia e faaho‘ihia mai ai ta oe.” 15  A faaroo ai te hoê manihini i te reira, na ô maira oia ia Iesu: “E oaoa te taata o te tamaa* i roto i te Faatereraa arii a te Atua.”* 16  Na ô atura Iesu: “E tamaaraa rahi ta te hoê taata i te ahiahi, e mea rahi te taata ta ’na i titau manihini. 17  Tae a‘era i te hora tamaaraa, tono ihora oia i ta ’na tavini e parau i te mau manihini: ‘Haere mai, ua ineine te maa.’ 18  Otohe a‘era râ ratou pauroa. Na ô maira te hoê: ‘E faaapu ta ’u i hoo mai e te haere atu nei au e hi‘o. Eiaha e inoino mai, eita vau e tae atu.’ 19  Na ô maira te tahi atu: ‘Hoê ahuru puaatoro ta ’u i hoo mai e te haere nei au e tamatamata. Eiaha e inoino mai, eita vau e tae atu.’ 20  Na ô atoa maira te tahi atu: ‘No faaipoipo noa maira vau i te vahine, eita ïa vau e tae atu.’ 21  Ho‘i maira te tavini e faatia ihora i teie mau mea i to ’na fatu. Riri ihora te fatu fare e na ô atura i ta ’na tavini: ‘A haere haaviti na te mau aroâ e te mau purumu o te oire, a aratai mai ai i ǒ nei i te feia veve, te huma, te matapo e te piri‘o‘i.’ 22  I to te tavini ho‘iraa mai, na ô maira oia: ‘Fatu, ua rave au i ta oe i faaue, te toe nei râ te parahiraa.’ 23  Na ô atura ïa te fatu i te tavini: ‘A haere na te mau purumu e te mau e‘a, a onoono maite atu ai i te taata ia haere mai ia î hoi to ’u fare. 24  Te parau atu nei hoi au: E ore roa tera mau taata tei titau-manihini-hia e amu i te maa ta ’u i faaineine.’” 25  I teie nei, e nahoa rahi te haere atoa ra na muri ia ’na. Fariu atura oia e na ô atura: 26  “Te taata e pee mai ia ’u, ia rahi a‘e ïa to ’na here ia ’u* i to ’na metua tane, to ’na metua vahine, ta ’na vahine faaipoipo, ta ’na mau tamarii, to ’na mau taeae, to ’na mau tuahine, ia ’na* iho atoa. Aita ana‘e, eita e tia ia ’na ia riro ei pǐpǐ na ’u. 27  Te taata o te ore e amo i ta ’na pou haamauiuiraa,* a pee mai ai ia ’u, eita ïa e tia ia riro ei pǐpǐ na ’u. 28  O vai o outou, ia hinaaro oia e patu i te hoê pare, e ore e parahi na mua, a numera ’tu ai i te haamâu‘araa no te ite e navai anei ta ’na moni no te faaoti i te paturaa? 29  Ia haamau noa ’tu oia i te niu, a ore atu ai râ e oti ia ’na, e faaooo mai ïa te taata atoa e hi‘o mai ia ’na, 30  a na ô ai: ‘Ua haamata teie taata i te paturaa, aita râ i oti.’ 31  E o vai ïa arii 10 000 faehau ta ’na o te haere ra e faaû i te tahi atu arii e 20 000 faehau ta ’na, e ore e parahi na mua, a uiui atu ai ia vetahi ê no te ite e upootia anei oia? 32  Mai te peu e eita, e tono ïa oia i te tahi mau tia e ani i te hau i tera arii tei te atea ê â hoi. 33  Oia atoa, te taata i rotopu ia outou o te ore e haapae i ta ’na faufaa atoa, e ore ïa e tia ia riro ei pǐpǐ na ’u. 34  Mea maitai roa iho â te miti. Ia maaro râ te reira, e nafea ïa e avaava faahou ai? 35  Eita ’tura ïa te miti e anoihia i roto i te repo aore ra te para. E faaruehia râ i rapae. E tari‘a to ’na no te faaroo, a faaroo ïa.”

Nota i raro i te api

A hi‘o i te titionare.
“O te amu i te pane” na roto i te reo Heleni.
Aore ra “Basileia o te Atua.”
“Ia hae ïa oia” na roto i te reo Heleni, “ia iti mai to ’na here” te auraa.
Heleni pusuke. A hi‘o i te titionare.
A hi‘o i te titionare.