Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Luka 13:1-35

HAAPOTORAA O TE MAU TUMU PARAU

  • Tatarahapa aore ra pohe (1-5)

  • Faahoho‘araa o te tumu suke aita e maa (6-9)

  • Faaorahia te hoê vahine ma‘i i te Sabati (10-17)

  • Faahoho‘araa o te huero sinapi e te hopue (18-21)

  • Tutava i te tomo na te uputa pirihao (22-30)

  • Heroda, “tera alope” (31-33)

  • Oto Iesu no Ierusalema (34, 35)

13  I taua taime ra, to reira vetahi tei faatia ia Iesu no te tahi mau taata Galilea ta Pilato i haapohe, a pûpû ai ratou i ta ratou mau tusia.  Parau atura Iesu: “I to outou mana‘o, no te mea anei e feia hara rahi a‘e taua mau taata Galilea ra i to Galilea atoa i roohia ’i ratou i taua ati ra?  E ere roa ’tu, ta ’u ïa e parau atu. Ia ore outou e tatarahapa, e pohe atoa outou pauroa mai ia ratou.  E tera na 18 taata tei topahia i te pare i Siloama e pohe ihora, i to outou mana‘o, ua hau a‘e anei ta ratou hara i ta to Ierusalema atoa?  E ere roa ’tu, ta ’u ïa e parau atu. Ia ore outou e tatarahapa, e pohe atoa outou pauroa mai ia ratou.”  Faahiti atura Iesu i teie faahoho‘araa: “E tumu suke tei tanuhia i roto i te faaapu vine a te hoê taata. Haere maira oia e tii i te maa i nia i taua tumu ra, e aita e maa.  Na ô maira oia i te taata faaapu vine: ‘Teie te toruraa o te matahiti e tii mai ai au i te maa i nia i teie tumu suke e aita e maa. A tâpû atu! Eaha hoi e haamâu‘a ’i i te fenua?’  Pahono atura te taata faaapu vine: ‘E te Fatu, tiai rii â na hoê matahiti. E utaru vau e ati noa ’‘e, a tuu atu ai i te para.  Ia hotu mai te maa, mea maitai ïa. Ia ore râ, e tâpû ïa oe.’” 10  E teie nei, te haapii ra Iesu i te taata i roto i te hoê sunago i te Sabati.* 11  E inaha, e vahine atoa to reira, 18 matahiti to ’na ma‘iraahia no te hoê varua ino. Ua fefe roa oia, a ore atu ai e tia ia ’na ia faaafaro i to ’na tino. 12  I to Iesu iteraa ’tu ia ’na, na ô atura oia: “Ua ora to oe ma‘i.” 13  Tuu atura oia i to ’na na rima i nia iho i taua vahine ra. I reira iho, afaro roa maira to ’na tino e faahanahana a‘era oia i te Atua. 14  Aita râ te aratai o te sunago i mauruuru no to Iesu faaoraraa i te ma‘i i te Sabati e na ô atura i te nahoa: “E ono mahana raveraa ohipa, i tera ïa mau mahana outou e haere mai ai ia faaorahia to outou mau ma‘i, eiaha râ i te mahana Sabati.” 15  Pahono atura râ te Fatu ia ’na: “Haavarevare ma, eita anei outou e tatara i ta outou puaatoro oni aore ra ta outou asini i te Sabati, a putô atu ai e faainu i te pape? 16  E tamahine na Aberahama teie vahine. Ua tapeahia oia e Satani 18 matahiti, eita anei ïa e tano ia faaora i to ’na ma‘i i te mahana Sabati?” 17  A parau ai Iesu i teie mau mea, haama a‘era te feia atoa i mârô mai ia ’na. Te nahoa râ, oaoa ihora ïa i te mau mea faahiahia atoa ta ’na i rave. 18  Na ô atura ïa oia: “E au te Faatereraa arii a te Atua i te aha, e e faaau vau i te reira i te aha? 19  E au ïa i te hoê huero sinapi* ta te hoê taata i rave e i tanu i roto i ta ’na faaapu. Tupu maira e riro maira ei tumu raau, a hamani atu ai te mau manu o te reva i to ratou ofaaraa i nia i te mau amaa.” 20  Na ô faahou atura oia: “E faaau vau i te Faatereraa arii a te Atua i te aha? 21  E au ïa i te hopue ta te hoê vahine i rave e i anoi i roto e toru faito* faraoa ota e ia maraa noa ’tu te faraoa ôihia.” 22  E na roto atura oia i te mau oire e oire rii no te haere atu i Ierusalema a haapii haere ai i te taata. 23  Na ô maira râ te hoê taata ia ’na: “E te Fatu, e parau mau anei e aita i rahi te taata e faaorahia?” Parau atura oia ia ratou: 24  “A tutava i te tomo na te uputa pirihao. Te parau atu nei hoi au e mea rahi te tamata i te tomo, eita râ ratou e ô atu. 25  Ia tia mai te fatu fare a ponao atu ai i te opani, e tia noa ïa outou i rapaeau mai, a patoto mai ai i te uputa e a na ô ai: ‘E te Fatu, a iriti mai na.’ E pahono atu râ oia: ‘Aita vau i ite o vai outou.’ 26  I reira outou e parau ai: ‘I tamaa na tatou, e i haapii na oe i te taata na te mau aroâ o to matou oire.’ 27  E na ô atu râ oia: ‘Aita vau i ite o vai outou. Haere ê atu, outou pauroa e rave nei i te ohipa ino!’ 28  I reira outou e ta‘i ai e to outou niho e ma‘u‘u ai i te ahoaho ia ite outou ia Aberahama, Isaaka, Iakoba e te mau peropheta atoa i roto i te Faatereraa arii a te Atua. Outou râ, tei rapae ïa. 29  E haere atoa mai te taata no hitia o te râ e tooa o te râ, no apatoerau e apatoa, a tarava ’tu ai i te amuraa maa i roto i te Faatereraa arii a te Atua. 30  I reira ïa vetahi o to muri e riro ai no mua, e vetahi o to mua e riro ai no muri.” 31  I taua taime ra, ua tapiri mai te tahi mau Pharisea e na ô maira ia Iesu: “A haere ê, e a faarue mai i teie vahi, te hinaaro ra hoi Heroda e haapohe ia oe.” 32  Na ô atura oia: “A haere a parau i tera urî oviri,* i teie mahana e ananahi, e tiavaru vau i te mau demoni e e faaora i te ma‘i, e i te toru o te mahana e oti roa ’i ta ’u ohipa. 33  Ia tamau râ vau i to ’u tere e tia ’i i teie mahana, ananahi e ananahi atu, eita hoi e tano* ia haapohe i te hoê peropheta i rapae ia Ierusalema. 34  Ierusalema, Ierusalema, o te taparahi pohe i te mau peropheta e o te pehi i tei tonohia ’tu ia ’na i te ofai! Ahia a‘enei to ’u hinaaroraa e haaputu i ta oe mau tamarii, mai te moa o te haaputu i ta ’na mau fanau‘a i raro a‘e i to ’na pererau! Aita râ outou i hinaaro. 35  Inaha, e faaruehia to outou fare.* Teie ta ’u e parau atu: E ore roa outou e ite faahou mai ia ’u e tae noa ’tu i te taime e na ô ai outou: ‘Ia haamaitaihia tei haere mai ma te i‘oa o Iehova!’”*

Nota i raro i te api

A hi‘o i te titionare.
E huero haihai roa teie e raea e 4 metera te teitei ia tupu mai, e amaa to ’na.
“Sea” na roto i te reo Heleni. Hoê sea, e 7,33 ïa litera.
Aore ra “alope.”
Aore ra “tia.”
Oia hoi te hiero.
A hi‘o i te titionare.