Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Luka 12:1-59

HAAPOTORAA O TE MAU TUMU PARAU

  • Hopue a te mau Pharisea (1-3)

  • Mǎta‘u i te Atua, eiaha te taata (4-7)

  • Ia faaite te hoê taata e mea hoê oia e te Mesia (8-12)

  • Faahoho‘araa o te taata tao‘a rahi maamaa (13-21)

  • Faaea i te haapeapea (22-34)

    • Nǎnǎ iti (32)

  • E ara (35-40)

  • Te tiaau haapao maitai e te tiaau taiva (41-48)

  • E ere te hau, o te amahamaha râ (49-53)

  • Ite i te auraa o te mau tau (54-56)

  • Faaafaro i te peapea (57-59)

12  I taua taime ra, a putuputu mai ai te hoê nahoa taata e rave rahi tausani, a taataahi atu ai i to te tahi e te tahi avae, ua na ô Iesu i ta ’na mau pǐpǐ: “A ara i te hopue a te mau Pharisea, oia hoi te haavarevare.  Aita râ e mea i tapo‘i-maitai-hia e ore e faaitehia, e aita e mea huna e ore e itehia.  No reira, te mau mea atoa ta outou e parau i roto i te poiri, e faaroohia ïa i roto i te maramarama, e ta outou e parau i roto i te tari‘a o te hoê taata i roto i te mau piha, e faaitehia ïa na nia mai i te fare.  Teie atoa ta ’u e parau atu ia outou to ’u mau hoa: Eiaha e mǎta‘u i te feia e haapohe ia outou. Ia pohe hoi outou, aita ’tu â ta ratou e nehenehe e rave i nia ia outou.  O te Atua ana‘e râ ta outou e mǎta‘u, e nehenehe hoi oia e haapohe ia outou, a huri atu ai ia outou i Gehena.* O ’na ïa ta outou e mǎta‘u e tia ’i.  E hoohia e pae manu rii no e piti moni veo,* e ere anei? Aita râ hoê noa ’‘e i mo‘e i te Atua.  Ua taio-pauroa-atoa-hia te rouru o to outou upoo. Eiaha e mǎta‘u. Mea faufaa a‘e outou i te manu rii e rave rahi.  Te parau atu nei au: Te taata e faaite i mua ia vetahi ê e te tiaturi ra oia ia ’u, e faaite atoa ïa te Tamaiti a te taata nei i mua i te mau melahi a te Atua e no ’na taua taata ra.  Te taata râ o te faaite i mua ia vetahi ê e aita oia e tiaturi ra ia ’u, e faaite atoa ïa te Tamaiti a te taata nei i mua i te mau melahi a te Atua e e ere no ’na taua taata ra. 10  Te taata o te faaino i te Tamaiti a te taata nei, e faaorehia ïa ta ’na hara, te taata râ o te faaino i te varua mo‘a, e ore ïa e faaorehia ta ’na hara. 11  Ia arataihia outou i mua i te nahoa taata tei ruru mai,* te mau tia faatere e te feia mana, eiaha outou e haapeapea e nafea ia paraparau atu aore ra eaha te parau. 12  Na te varua mo‘a hoi e haapii ia outou i tera iho â hora i ta outou e parau e tia ’i.” 13  Na ô maira hoê o taua nahoa ra: “Orometua, parau na oe i to ’u tuaana ia tufa oia i ta to mâua metua tane i vaiiho mai na mâua.” 14  Pahono atura oia: “Na vai i faatoroa ia ’u ei haava ia orua aore ra ei arai i rotopu ia orua?” 15  Na ô atura oia: “A ara e eiaha e nounou i ta vetahi ê tao‘a, no te mea noa ’tu e mea rahi te tao‘a a te hoê taata, eita oia e ora i te reira.” 16  Faahiti ihora oia i te hoê faahoho‘araa a na ô ai: “Ua tupu maitai te faaapu a te hoê taata tao‘a rahi. 17  Feruri ihora ïa oia: ‘E nafea râ vau, ua apǐ pauroa hoi ta ’u mau fare haapueraa maa?’ 18  Na ô a‘era oia: ‘Teie ta ’u e rave: E vavahi au i ta ’u mau fare vairaa maa, a hamani atu ai i te mau fare rahi a‘e, i reira hoi au e haapue ai i ta ’u mau sitona atoa e ta ’u mau tao‘a atoa, 19  a na ô atu ai au ia ’u iho:* “Mea rahi ta ’u* tao‘a i haapue no te matahiti e rave rahi. E faafaaea ïa vau, e tamaa, e inu, a oaoa ’i.”’ 20  Na ô atura râ te Atua ia ’na: ‘Neneva, i teie po e ravehia ’i to oe ora.* Tena mau tao‘a ta oe i haapue, e riro ïa ia vai?’ 21  Tera ïa te tupu i nia i te taata o te haapue i te tao‘a na ’na iho, mea veve râ oia i te aro o te Atua.” 22  Na ô atura Iesu i ta ’na mau pǐpǐ: “No reira vau e parau atu ai: A faaea i te haapeapea no to outou ora* eaha ta outou e amu, aore ra no to outou tino eaha ta outou e oomo. 23  Mea faufaa a‘e hoi te ora* i te maa, e te tino i te ahu. 24  A hi‘o na i te oreba. Eita teie mau manu e ueue i te huero, e ooti e aita ta ratou e fare vairaa maa. Teie râ, te faaamu ra te Atua ia ratou. E ere anei mea faufaa a‘e outou i tera mau manu? 25  O vai o outou e tia ia ’na ia faaroa ’tu â i to ’na ora hoê noa ’‘e kubiti* ia haapeapea oia? 26  Eita e tia ia outou ia rave i teie mea haihai, no te aha ïa e haapeapea ’i no te tahi atu mau mea? 27  A hi‘o i te mau lili: Eita teie mau tiare e rave i te ohipa, eita atoa e hamani i te ahu. Te parau atu nei râ vau e aita te ahu o te arii Solomona, noa ’tu to ’na unauna rahi, i hau a‘e i te nehenehe i to te hoê o teie mau tiare. 28  Te faaahu nei te Atua i teie mau tiare, o te tupu nei i teie mahana, a hurihia ’tu ai ananahi i roto i te auahi. E hau atu â ïa oia i te faaahu ia outou te feia mea iti te faaroo! 29  A faaea ïa i te haapeapea no ta outou e amu e no ta outou e inu e a faaea i te ahoaho, 30  o teie mau mea hoi ta te mau nunaa o teie nei ao e titau rahi nei, ua ite râ to outou Metua e e hinaaro iho â outou i teie mau mea. 31  Tera râ, a tamau i te imi i ta ’na Faatereraa arii,* e e horoahia mai teie mau mea na outou. 32  Eiaha e mǎta‘u, nǎnǎ iti, ua faaoti hoi to outou Metua i te horoa ’tu i te Faatereraa arii na outou. 33  A hoo i ta outou mau faufaa e a horoa i te ô aroha hamani maitai.* A hamani i te pute moni mutu ore na outou, e tao‘a pau ore ïa i te ra‘i, a ore atu ai e raea i te eiâ e e pau i te manumanu. 34  Te vahi hoi to reira ta oe tao‘a, to reira atoa to oe aau. 35  Ia ineine outou* e ia ama noa ta outou mori, 36  e ia riro outou mai te feia e tiai ra i to ratou fatu ia ho‘i mai na te faaipoiporaa mai, no te iriti atu i te opani ia tae mai oia e ia patoto mai. 37  E oaoa taua mau tavini ra ia roohia mai ratou e te fatu te ara ra ratou! Oia mau ta ’u e parau atu: E faaineine* oia ia ’na, e faatarava ia ratou i te amuraa maa, a faatamaa ’tu ai ia ratou. 38  Ia haere mai oia i te piti o te araraa,* i te toru* atoa, a ite atu ai e te ara ra ratou, e oaoa ïa ratou! 39  Ua ite hoi outou e ahiri te fatu fare i ite i teihea hora te eiâ e haere mai ai, eita ïa oia e vaiiho noa i to ’na fare ia tomohia. 40  Outou atoa, ia ineine noa ïa, no te mea i te hora mana‘o-ore-hia e outou e haere mai ai te Tamaiti a te taata nei.” 41  Ui maira Petero: “E te Fatu, no matou anei teie faahoho‘araa ta oe e parau ra aore ra no te taata atoa?” 42  Na ô atura te Fatu: “O vai hoi te tiaau haapao maitai e te paari ta to ’na fatu e faatoroa i nia i ta ’na mau tavini atoa no te horoa noa na ratou i te maa e navai i te taime tano? 43  E oaoa taua tavini ra ia tae mai to ’na fatu a ite atu ai e te na reira ra oia! 44  Oia mau ta ’u e parau atu: E faatoroa oia ia ’na ei tiaau i ta ’na mau faufaa atoa. 45  Ia parau noa ’tu râ taua tavini ra i roto i to ’na aau: ‘Ua maoro to ’u fatu,’ a rutu atu ai i te mau tavini tane e te mau tavini vahine, a tamaa, a inu e a taero atu ai, 46  e haere mai te fatu o taua tavini ra i te mahana mana‘o-ore-hia e ana e i te hora aita oia i ite, e e faautua ia ’na i te utua ino mau, a amui atu ai ia ’na i te feia taiva. 47  E tairi-rahi-hia ïa taua tavini ra o tei taa i te hinaaro o to ’na fatu aita râ i vai ineine, aita atoa i rave i ta to ’na fatu i ani.* 48  Te tavini râ tei rave i te ino no te taa ore, a tano atu ai ia tairihia oia, e tairi-rii-hia ïa. Inaha, te taata mea rahi tei horoahia ’tu ia ’na, mea rahi ïa te titauhia ia ’na. E te taata mea rahi ta ’na hopoia, mea rahi atu â ïa te titauhia ia ’na. 49  Ua haere mai au e tutui i te auahi i nia i te fenua. Mai te peu e ua ama ê na te auahi, eaha ’tu â ïa ta ’u e hinaaro? 50  Te vai ra te hoê bapetizoraa ia bapetizohia vau. Te ahoaho roa nei au e ia oti roa te reira. 51  Te mana‘o ra outou e o te hau ta ’u i haere mai e faatupu i te fenua nei? Te parau atu nei au: E ere te hau, o te amahamaha râ. 52  Mai teie atu nei hoi, e amahamaha e pae taata o te hoê utuafare, e tootoru te patoi i na toopiti e na toopiti i na tootoru. 53  E amahamaha ratou, e patoi te metua tane i te tamaiti e te tamaiti i te metua tane, te metua vahine i te tamahine e te tamahine i te metua vahine, te metua hoovai vahine i te hunoa vahine e te hunoa vahine i te metua hoovai vahine.” 54  Na ô atoa ’tura Iesu i te nahoa: “Ia ite outou i te hoê ata ia hiti mai i tooa o te râ, e parau outou: ‘Ua fatata te vero,’ e tera iho â. 55  E ia farara mai te mata‘i no apatoa mai, e na ô outou: ‘E mahana veavea roa ïa,’ e tera iho â. 56  Haavarevare ma, ua ite outou eaha te huru o te mahana ia hi‘o outou i te fenua e te ra‘i, no te aha râ outou i ore ai i ite i te auraa o te mau mea e tupu nei i teie tau? 57  No te aha outou e ore ai e faaoti no outou iho i te mea tia ia rave? 58  Ei hi‘oraa, a haere ai oe e te taata tei horo ia oe e hi‘o i te hoê tia faatere, a rohi i te faaafaro i to orua peapea a haere noa ’i orua, ia ore hoi oia e tuu ia oe i mua i te haava, a tuu atu ai te haava ia oe i te mutoi, a huri atu ai te mutoi ia oe i roto i te tapearaa. 59  Te parau atu nei au ia oe: E ore oe e matara mai ia ore ia pee ta oe tarahu e tae noa ’tu i te lepeta* hopea.”

Nota i raro i te api

A hi‘o i te titionare.
“Piti asario” na roto i te reo Heleni. Te moni ïa a te hoê taata o te rave i te ohipa hoê hora e te afa.
Aore ra “i mua i te mau sunago.”
Heleni pusuke. A hi‘o i te titionare.
Heleni pusuke. A hi‘o i te titionare.
Heleni pusuke. A hi‘o i te titionare.
Heleni pusuke. A hi‘o i te titionare.
Heleni pusuke. A hi‘o i te titionare.
A hi‘o i te titionare.
Aore ra “to ’na Basileia.”
Aore ra “ô no te feia veve.” A hi‘o i te titionare.
“A hatua i to outou tauupu” na roto i te reo Heleni.
Aore ra “hatua.”
Mai te area hora 9 i te po e tae atu i te tuiraa po.
Mai te tuiraa po e tae atu i te area hora 3 i te aahiata.
Aore ra “i haapao i te hinaaro o to ’na fatu.”
Oia hoi te moni no piri i te 10 minuti ohipa. A hi‘o i te titionare.