Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Luka 11:1-54

HAAPOTORAA O TE MAU TUMU PARAU

  • Haapii mai ia pure (1-13)

    • Hoho‘a pure (2-4)

  • Tiavaruhia te mau demoni i te mana o te Atua (14-23)

  • Ho‘iraa mai te varua viivii (24-26)

  • Oaoa mau (27, 28)

  • Tapao a Iona (29-32)

  • Mori o te tino (33-36)

  • Ua ati te mau haavarevare i te pae faaroo (37-54)

11  E teie nei, te pure ra Iesu i te tahi vahi, e i te otiraa ta ’na pure, na ô maira hoê o ta ’na mau pǐpǐ: “E te Fatu, haapii na oe ia matou ia pure, mai ta Ioane atoa i haapii i ta ’na mau pǐpǐ.”  Parau atura ïa oia: “Ia pure outou, a na ô: ‘To matou Metua, ia mo‘a* to oe i‘oa. Ia tae mai ta oe Faatereraa arii.*  Horoa mai na i ta matou maa no te mahana tataitahi ia au i te hinaaro-mau-hia e matou i te mau mahana atoa.  Faaore mai na i ta matou mau hara, te faaore atoa nei hoi matou i ta vetahi ê tarahu* ia matou, e tauturu mai na ia matou ia ore ia hema.’”  Na ô faahou atura Iesu: “Ahani e hoa to te hoê o outou e haere atura oia ia ’na ra i te tuiraa po e na ô atura: ‘To ’u hoa, horoa mai na e toru faraoa,*  no tae noa maira hoi hoê o to ’u mau hoa mai to ’na tere mai e aita ta ’u e maa e horoa na ’na.’  Pahono maira râ te hoa na roto mai i te fare: ‘Faaea na i te haapeapea ia ’u. Ua ponao-ê-hia na te opani e tei nia vau i te ro‘i e ta ’u mau tamarii rii. Eita ta ’u e nehenehe e tia i nia, a horoa ’tu ai i te faraoa na oe.’  Te parau atu nei au: E tia mai iho â oia i nia, a horoa ’tu ai i ta to ’na hoa e hinaaro, e ere no te mea e hoa no ’na, no to ’na râ onoono rahi.  No reira, te parau atu nei au: A tamau i te ani, e horoahia mai. A tamau i te imi, e itehia mai. A tamau i te patoto, e iritihia mai. 10  Te taata hoi e ani, e noaa ïa ta ’na. Te taata hoi e imi, e itehia ïa ia ’na. Te taata e patoto, e iritihia mai ïa. 11  O vai ïa metua e horoa ’tu i te ophi ia ani mai ta ’na tamaiti i te i‘a? 12  Aore ra e horoa ’tu i te pata patia ia ani atoa mai ta ’na tamaiti i te huero moa? 13  No reira, noa ’tu e e taata ino outou, ua ite outou i te horoa i te mau mea maitatai na ta outou mau tamarii, hau atu â ïa te Metua i te ra‘i i te horoa i te varua mo‘a na te feia e ani atu ia ’na!” 14  I muri a‘e, tiavaru ihora oia i te hoê demoni i rapae i te hoê vava. Haere atura te demoni i rapae, paraparau ihora te vava e maere ihora te nahoa. 15  Parau a‘era râ vetahi o ratou: “Te tiavaru nei oia i te mau demoni i te mana o Belezebuba,* te raatira o te mau demoni.” 16  Ani maira râ te tahi atu ia ’na i te hoê tapao no te ra‘i mai no te râmâ ia ’na. 17  Ua ite râ oia i to ratou mana‘o e parau atura: “Ia amahamaha te hoê faatereraa, e mou te reira e ia amahamaha te hoê utuafare, e taa ê te tahi i te tahi. 18  Oia atoa, ia amahamaha Satani, e nafea ïa ta ’na faatereraa e mau ai? Te parau nei hoi outou e te tiavaru nei au i te mau demoni i te mana o Belezebuba. 19  Mai te peu e i te mana o Belezebuba e tiavaru ai au i te mau demoni, i to vai ïa mana e tiavaru ai ta outou mau tamarii* i te mau demoni? No reira, na ratou e faahapa ia outou. 20  Mai te peu râ e i te mana o te Atua* e tiavaru ai au i te mau demoni, ua roohia ïa outou e te Faatereraa arii a te Atua ma te mana‘o-ore-hia. 21  Ia tiai te hoê taata puai i to ’na fare ma ta ’na mau mauhaa tama‘i, e ore ta ’na mau tao‘a e eiâhia. 22  Ia haere mai râ te tahi atu taata puai a‘e, a vî atu ai te fatu fare ia ’na, e rave taua taata ra pauroa te mauhaa tama‘i ta te fatu fare i mana‘o e e paruru te reira i ta ’na mau tao‘a, a opere atu ai i ta ’na i haru na vetahi ê. 23  Te taata o te ore e turu mai ia ’u, te patoi mai nei ïa ia ’u, e o te ore e haaputu mai i te taata e o vau atoa nei, te haapurara nei ïa. 24  Ia haere mai te hoê varua viivii i rapae i te hoê taata, e haere oia na te mau vahi pâpâmǎrô e imi i te faafaaearaa, e ore râ e itehia e ana. Na ô ihora oia: ‘E ho‘i au i to ’u fare mai reira mai au.’ 25  Ia tae atu oia i reira, ua purumuhia te fare e ua faanehenehehia. 26  Haere ihora oia e rave maira hitu varua ino a‘e ia ’na, tomo a‘era ratou i roto i taua fare ra, faaea ihora i reira. Ino roa ’tura ïa te huru o taua taata ra i to na mua ’‘e.” 27  A paraparau noa ’i râ Iesu, pii maira te hoê vahine i rotopu i te nahoa a na ô ai: “Ia oaoa te vahine tei fanau mai ia oe e tei faaote ia oe!” 28  Na ô atura râ oia: “Mea oaoa a‘e te feia e faaroo e e haapao i te parau a te Atua!” 29  A putuputu mai ai te nahoa, na ô atura oia: “E u‘i ino teie o te imi nei i te hoê tapao, o te tapao a Iona ana‘e râ te horoahia ’tu. 30  I riro na hoi Iona ei tapao no to Nineve, e riro atoa ïa te Tamaiti a te taata nei ei tapao no teie nei u‘i. 31  E tia faahou mai te arii vahine no apatoa i te haavaraa* e te feia o teie nei u‘i atoa. E faahapa oia i teie nei u‘i, mai te hopea mai hoi o te fenua i haere mai ai oia e faaroo i te paari o Solomona. Inaha râ, e taata to ǒ nei tei rahi a‘e ia Solomona. 32  E tia faahou mai to Nineve i haavaraa* e teie nei u‘i atoa. E faahapa ratou i teie nei u‘i, no te mea ua tatarahapa ratou no ta Iona pororaa. Inaha râ, e taata to ǒ nei tei rahi a‘e ia Iona. 33  Ia tutui te hoê taata i te mori, e ere ïa no te huna aore ra no te tuu i raro a‘e i te hoê farii,* i nia râ i to ’na vairaa, ia ite hoi te feia e tomo mai i te maramarama. 34  Te mori o te tino, o to oe ïa mata. Ia hi‘o to oe mata i te hoê noa mea,* e maramarama* atoa ïa to oe tino taatoa. Ia nounou* râ to oe mata, e poiri atoa ïa to oe tino. 35  A haapao maitai ïa e e ere te maramarama i roto ia oe i te poiri. 36  No reira, ia maramarama to oe tino taatoa aita roa ’tu e poiri, e maramarama roa ïa to oe tino mai te hoê mori e turama ia oe.” 37  A parau ai Iesu i te reira, ani maira te hoê Pharisea ia ’na ia tamaa i ǒ ’na. Haere atura Iesu i to ’na fare e tarava ihora i te amuraa maa. 38  Maere ihora râ te Pharisea i to ’na iteraa e aita Iesu i horoi i to ’na rima* hou a tamaa ’i. 39  Na ô atura râ te Fatu: “Te tamâ nei outou te mau Pharisea i te rapaeau o te au‘a e o te farii maa, o roto râ, ua î ïa outou i te nounou e te ino. 40  Neneva ma! Na te Atua i hamani i te rapaeauraa, i te rotoraa atoa ïa, e ere anei? 41  A horoa râ i te ô aroha hamani maitai* ma to outou aau atoa, e inaha e mâ roa outou. 42  Ua ati râ outou te mau Pharisea, no te mea te horoa nei outou i te tuhaa ahuru o te mineta, o te pegano e o te tahi atu mau raau tupu atoa no te faano‘ano‘a i te maa, te haapae nei râ i te parau-tia a te Atua e te faaueraa e here ia ’na! Ia horoa iho â outou i te tuhaa ahuru e tia ’i, eiaha râ e haapae i te parau-tia a te Atua e te faaueraa e here ia ’na. 43  Ua ati outou te mau Pharisea, no te mea mea au na outou e parahi i mua roa* i roto i te mau sunago e ia arohahia outou ma te faatura na te mahora!* 44  Ua ati outou, no te mea e au outou i tera mau menema* eita e ite-maitai-hia,* a taataahi atu ai te taata na nia iho ma te ite ore!” 45  Na ô maira te hoê taata mea ite i te ture a Mose: “Orometua, a na reira ’i oe i te parau, o matou atoa ïa ta oe e faaino nei.” 46  Pahono atura Iesu: “Ua ati atoa outou mea ite i te ture a Mose, no te mea te tuu nei outou i te mau hopoia teimaha ia amo i nia i te taata. Outou râ, e ore ïa hoê o to outou mau manimani rima e tapea i taua mau hopoia ra! 47  Ua ati outou, no te mea te patu nei outou i te mau menema* no te mau peropheta, ua taparahi pohe râ to outou mau tupuna ia ratou! 48  Ua ite maitai outou i tei ravehia e to outou mau tupuna, ua farii atu râ outou i te reira, na ratou hoi i haapohe i te mau peropheta, na outou râ e patu nei i to ratou mau menema. 49  No reira te Atua i parau atoa ’i no to ’na paari: ‘E tono atu vau i te mau peropheta e te mau aposetolo ia ratou ra. E haapohehia vetahi e e hamani-ino-hia te tahi atu, 50  ia ho‘i mai hoi i nia i teie nei u‘i te toto o te mau peropheta atoa tei haamaniihia mai te omuaraa mai â o teie nei ao,* 51  mai ia Abela mai e tae roa ’tu ia Zekaria, tei taparahi-pohe-hia i rotopu i te fata e te hiero.’ Oia mau ta ’u e parau atu: E ho‘i mai iho â to ratou toto i nia i teie nei u‘i. 52  Outou mea ite i te ture a Mose, ua ati outou, no te mea ua hopoi ê outou i te taviri e noaa ’i te ite. Aita outou iho i tomo atu, e ua tapea outou i te feia i hinaaro e tomo atu!” 53  A haere atu ai Iesu i rapae, tapiri maira te mau papai parau e te mau Pharisea ma te onoono i te uiui faahou ia ’na 54  no te râmâ ia ’na ia noaa hoi oia ia ratou i roto i ta ’na mau parau.

Nota i raro i te api

Aore ra “haamo‘ahia.”
Aore ra “to oe Basileia.”
Aore ra “hara.”
Aore ra “pane.”
No Satani teie i‘oa.
“Tamaiti” na roto i te reo Heleni.
“Manimani rima o te Atua” na roto i te reo Heleni.
Oia hoi i te Mahana Haavaraa.
Oia hoi i te Mahana Haavaraa.
Aore ra “farii faito maa.”
Aore ra “Ia maramarama to oe mata.” “Ia maitai to oe mata” na roto i te reo Heleni.
Aore ra “maramarama roa.”
“Ia ino” na roto i te reo Heleni.
Oia hoi ia au i te mau peu a te ati Iuda.
Aore ra “ô no te feia veve.” A hi‘o i te titionare.
Aore ra “i nia i te mau parahiraa maitai roa ’‘e.”
I reira te taata e hoohoo ai e e ruru ai.
Aore ra “menema haamana‘oraa.”
Aore ra “aita e tapao i nia iho.”
Aore ra “menema haamana‘oraa.”
Oia hoi a tamariihia ’i Adamu raua Eva.