Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Luka 10:1-42

HAAPOTORAA O TE MAU TUMU PARAU

  • Tono Iesu i na 70 (1-12)

  • Ua ati te mau oire aita i tatarahapa (13-16)

  • Ho‘iraa mai na 70 (17-20)

  • Arue Iesu i to ’na Metua no te haafaufaaraa i tei haehaa (21-24)

  • Faahoho‘araa o te taata tupu no Samaria (25-37)

  • Farerei Iesu ia Mareta raua Maria (38-42)

10  I muri a‘e i teie mau mea, maiti ihora te Fatu ra o Iesu e 70 pǐpǐ ê atu e tono tataipiti atura ia ratou na mua ia ’na i te mau oire e vahi atoa e haere atu ai oia.  Na ô atura oia ia ratou: “Te rahi mau nei te auhune, mea iti râ te rave ohipa. A taparu ïa i te Fatu o te auhune ia tono mai i te rave ohipa no te ootiraa.  A haere! Inaha, te tono nei au ia outou mai te mamoe i rotopu i te luko.  Eiaha e rave i te pute moni, te pute maa aore ra te tiaa, eiaha atoa e faataere i te aroha-haere-raa i te taata ta outou e farerei i te pae purumu.  I te mau vahi atoa e tomo ai outou i roto i te hoê fare, a parau atu na mua: ‘Ia vai te hau i roto i teie nei fare.’  Mai te peu e e taata e au i te hau to reira, e vai ïa to outou hau i nia ia ’na. Aita ana‘e râ, e ho‘i mai ïa to outou hau ia outou ra.  A faaea ïa i taua fare ra, a amu e a inu i tei horoahia mai, e mea tano hoi ia aufauhia te rave ohipa no ta ’na i rave. Eiaha e haere hanoa i tera e tera fare.  Ia tomo atoa outou i roto i te hoê oire e ia fariihia mai outou, a amu i ta ratou e tuu mai i mua ia outou,  a faaora i te ma‘i o to reira mau taata e a parau atu: ‘Ua fatata mai te Faatereraa arii a te Atua.’* 10  Ia ore râ outou e fariihia i roto i te hoê oire, a haere na te mau aroâ e parau: 11  ‘Te repo o to outou oire tei piri mai i to matou avae, te horoi nei ïa matou ei faaararaa ia outou. A haamana‘o râ e ua fatata mai te Faatereraa arii a te Atua.’ 12  Te parau atu nei au e mea mâmâ a‘e te utua a Sodoma i ta taua oire ra i tera mahana.* 13  Ua ati oe Korazina! Ua ati oe Betesaida! No te mea ahiri te mau ohipa mana tei ravehia i ǒ orua, i rave-atoa-hia na i Turia e Sidona, ua tatarahapa ê na ïa to reira mau taata, a parahi ai i roto i te rehu auahi ma te ahu oto. 14  Mea mâmâ a‘e ïa te utua a Turia e Sidona i ta outou i te haavaraa.* 15  E oe Kaperenaumi, e faateiteihia anei oe i te ra‘i? I te Apoo* oe e pou ai! 16  Te taata o te faaroo ia outou, e faaroo ïa ia ’u. E te taata e vahavaha ia outou, e vahavaha ïa ia ’u atoa. E te taata o te vahavaha ia ’u, e vahavaha atoa ïa i tei tono mai ia ’u.” 17  Ho‘i maira na 70 ma te oaoa, a na ô ai: “E te Fatu, ua vî atoa te mau demoni ia matou ia faahiti matou i to i‘oa.” 18  Na ô atura oia: “Te ite ra vau ia Satani i te mairiraa mai te ra‘i mai mai te uira ra. 19  Inaha, ua horoa ’tu vau i te mana ia taataahi outou i te ophi e te pata patia, e te mana i nia i te puai o te enemi, e aore roa e mea e rave ino ia outou. 20  Eiaha râ e oaoa e ua vî te mau varua ino ia outou, a oaoa râ e ua papaihia to outou i‘oa i te ra‘i.” 21  I taua taime ra, oaoa roa ihora Iesu maoti te varua mo‘a e na ô atura: “E arue au ia oe, to ’u Metua e te Fatu o te ra‘i e te fenua, i mua i te taata, no te mea ua huna maitai oe i teie mau parau i te feia paari e te maramarama e ua faaite i te feia e au i te tamarii rii. O ta oe ïa, to ’u Metua, i faaoti e rave. 22  Ua tuu mai to ’u Metua i te mau mea atoa ia ’u. O te Metua ana‘e tei ite o vai te Tamaiti, e o te Tamaiti ana‘e tei ite o vai te Metua e te taata atoa ta te Tamaiti e hinaaro e faaite atu o vai te Metua.” 23  Paraparau atura Iesu i ta ’na mau pǐpǐ ana‘e ra e na ô atura: “E oaoa te feia e te ite nei to ratou mata i ta outou e ite nei. 24  Te parau atu nei hoi au: Mea rahi te peropheta e te arii tei hinaaro e ite i te mau mea ta outou e hi‘o nei, aita râ i ite, e faaroo atoa i te mau mea ta outou e faaroo nei, aita râ i faaroo.” 25  E inaha, tia maira te hoê taata, mea ite i te ture a Mose, no te râmâ ia Iesu e na ô maira: “Orometua, eaha ta ’u e rave e fatu ai au i te ora mure ore?” 26  Na ô atura Iesu: “Eaha tei papaihia i roto i te ture a Mose? Eaha ta oe e taio ra?” 27  Pahono maira oia: “‘Ia here oe ia Iehova* to Atua ma to aau atoa, ma to ora* atoa, ma to puai atoa e ma to mana‘o atoa’ e ‘i to oe taata tupu mai ia oe iho.’” 28  Na ô atura Iesu: “Ua tano ta oe pahonoraa. ‘A na reira noa, e ora ïa oe e a muri noa ’tu.’” 29  No to ’na râ hinaaro e faaite e e taata parau-tia oia, na ô maira taua taata ra ia Iesu: “O vai hoi to ’u taata tupu?” 30  Pahono atura Iesu: “Te pou mai ra te hoê taata na Ierusalema mai i Ieriko, haru ihora te tahi feia eiâ ia ’na, rave atura i ta ’na mau mea atoa, rutu a‘era ia ’na e reva ’tura, a faarue mai ai ia ’na ua fatata i te pohe. 31  Te pou atoa mai ra hoi te hoê tahu‘a na taua e‘a ra. I to ’na râ iteraa ’tu i taua taata ra, haere ihora oia na te tahi a‘e pae o te e‘a. 32  Na reira atoa ’tura te hoê ati Levi, a pou mai ai oia na taua vahi ra e a ite ai ia ’na. 33  Tae maira râ te tahi taata no Samaria i taua vahi ra, ite atura ia ’na e aroha ihora. 34  Tapiri maira oia, ninii ihora i te mono‘i e te uaina i nia iho i to ’na mau pepe e taamu atura. Tuu a‘era oia ia ’na i nia iho i ta ’na animara, aratai atura i te hoê fare no te mau ratere e utuutu atura ia ’na. 35  E ao a‘era, rave ihora oia e piti denari,* horoa ’tura i te taata fare e na ô atura: ‘E utuutu oe ia ’na e ia hau atu te haamâu‘araa, e faaho‘i atu iho â vau i ta oe ia ho‘i mai au.’ 36  I to oe mana‘o, i roto ia ratou e toru, o vai te taata tupu o te taata tei haruhia e te eiâ?” 37  Na ô maira oia: “O te taata ïa tei aroha e tei hamani maitai i tei eiâhia.” Parau atura Iesu: “A haere e a na reira atoa.” 38  Haere atura Iesu e ta ’na mau pǐpǐ e tomo atura i roto i te tahi oire iti. I reira te hoê vahine o Mareta te i‘oa i te farii mai ia Iesu i to ’na fare. 39  E tuahine atoa to teie vahine, o Maria te i‘oa, e parahi ra i te pae avae o te Fatu ra o Iesu, a faaroo noa ’i i ta ’na e parau ra.* 40  O Mareta râ, te raverave noa ra ïa e rave rahi ohipa. Tapiri maira ïa oia ia Iesu e na ô maira: “E te Fatu, aita oe e ite ra e o vau ana‘e teie e rave nei i te ohipa? A parau na i to ’u tuahine ia tauturu mai ia ’u.” 41  Pahono atura te Fatu: “Mareta, Mareta, te haapeapea roa nei oe no te mea e rave rahi. 42  Mea iti hoi te hinaaro-mau-hia, hoê noa paha. Ua maiti Maria i te mea faufaa,* e ore te reira e rave-ê-hia ia ’na.”

Nota i raro i te api

Aore ra “Basileia o te Atua.”
Oia hoi te Mahana Haavaraa.
Oia hoi i te Mahana Haavaraa.
Aore ra “Hade,” oia hoi te menema o te huitaata. A hi‘o i te titionare.
A hi‘o i te titionare.
Heleni pusuke. A hi‘o i te titionare.
A hi‘o i te titionare.
“Ta ’na parau” na roto i te reo Heleni.
Aore ra “te mea faufaa roa ’‘e.”