Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Luka 1:1-80

HAAPOTORAA O TE MAU TUMU PARAU

  • Poroi na Teophilo (1-4)

  • Tohuhia te mahana fanauraa o Ioane Bapetizo e Gaberiela (5-25)

  • Tohuhia te mahana fanauraa o Iesu e Gaberiela (26-38)

  • Farerei Maria ia Elisabeta (39-45)

  • Arue Maria ia Iehova (46-56)

  • Fanauraa o Ioane e to ’na toparaahia tera i‘oa (57-66)

  • Parau tohu a Zekaria (67-80)

1  Mea rahi te taata tei tutava i te papai i te mau mea atoa i tupu e ta tatou e tiaturi atoa nei.  Ua faatia-atoa-hia mai te reira e te feia tei ite mata i teie mau mea mai te haamataraa e tei riro ei tavini no te poroi a te Atua.  No reira Teophilo,* ua tuatapapa vau i teie mau mea atoa e ua faaoti atoa e papai i te reira ia au i te tupuraa mau.  Ua na reira vau ia papu ia oe e e parau mau iho â tei haapiihia ia oe.  I te anotau o Heroda,* arii o Iudea, te vai ra te tahi tahu‘a no te pǔpǔ a Abia o Zekaria te i‘oa. No te utuafare o Aarona ta ’na vahine faaipoipo o Elisabeta te i‘oa.  E taata parau-tia raua toopiti i te aro o te Atua, mea haapao roa hoi raua i te taatoaraa o te mau faaueraa e te mau ture a Iehova.*  Tera râ, aita ta raua e tamarii, eita hoi ta Elisabeta tamarii e noaa, e ua ruhiruhia raua.  I te mea e te tavini ra Zekaria ei tahu‘a i mua i te Atua i te taime i faataahia no ta ’na pǔpǔ,  ia au i tei matauhia e te tahu‘a ia rave, ua tae ïa i te taime e tutui ai oia i te mea no‘ano‘a a tomo ai oia i roto i te nao* o Iehova.* 10  E te pure noa ra te nahoa taata i rapaeau i taua taime ra. 11  Fa maira te melahi a Iehova* ia Zekaria, a tia noa ’i i te pae atau o te fata o te mea no‘ano‘a. 12  Horuhoru ihora Zekaria i to ’na hi‘oraa ’tu e mehameha ihora. 13  Na ô maira râ te melahi ia ’na: “Eiaha e mǎta‘u Zekaria, ua faaroo te Atua i ta oe taparuparuraa e e fanau mai to vahine o Elisabeta i te hoê tamaiti na oe e o Ioane te i‘oa ta oe e horoa no ’na. 14  E oaoa roa oe, e oaoa atoa e rave rahi ia fanauhia mai oia, 15  e riro hoi oia ei taata faufaa i te aro o Iehova.* Tera râ, eiaha roa ’tu oia e inu i te uaina e te ava, e î oia i te varua mo‘a* hou oia e fanauhia mai ai.* 16  E faaho‘i mai oia e rave rahi tamarii* a Iseraela ia Iehova* ra to ratou Atua. 17  E haere atoa oia na mua i te Atua ma te itoito e te mana mai to Elia, no te taui i te aau o te mau metua tane mai to te tamarii e no te tauturu i te feia faaroo ore ia ohipa ma te paari mai te feia parau-tia, ia ineine hoi te hoê nunaa ta Iehova* e au.” 18  Na ô atura Zekaria i te melahi: “E nafea te reira e tupu ai? E ruhiruhia hoi au e ta ’u vahine atoa.” 19  Pahono maira te melahi: “O vau o Gaberiela o te tia i mua i te aro o te Atua, e ua tonohia mai au no te paraparau ia oe e no te faaite atu i teie parau apî oaoa.* 20  Teie râ, e vavahia oe e tae noa ’tu i te mahana e tupu ai teie mau mea, no te mea aita oe i tiaturi i ta ’u mau parau, o te tupu i te tau faataahia.” 21  I taua taime ra, te tiai noa ra te taata ia Zekaria, e ua maere no to ’na maoro i roto i te nao. 22  I to ’na haereraa mai i rapaeau, aita i tia ia ’na ia paraparau, ua vavahia hoi oia, ua apǎ noa mai râ i te rima ia ratou. Taa ihora ia ratou e ua ite oia i te hoê ohipa maere roa* i roto i te nao. 23  I te hoperaa te mau mahana o ta ’na taviniraa mo‘a, ho‘i atura oia i to ’na fare. 24  Tau mahana i muri a‘e, hapû ihora Elisabeta te vahine a Zekaria, e faaea noa ’tura i te fare e pae ava‘e, a na ô ai: 25  “O ta Iehova* ïa i rave no ’u, a haamana‘o mai ai ia ’u ia ore te taata e hi‘o ino faahou mai ia ’u.” 26  I te onoraa o to ’na ava‘e hapûraa, tono maira te Atua i te melahi Gaberiela i te hoê oire i Galilea o Nazareta te i‘oa, 27  i te hoê vahine apî* tei momo‘ahia i te hoê tane no te utuafare o Davida o Iosepha te i‘oa, e o Maria te i‘oa o taua vahine apî* ra. 28  I to te melahi tomoraa mai i ǒ Maria, na ô maira oia: “Ia ora na, ua mauruuru roa Iehova* ia oe, e te haamaitai nei oia ia oe.” 29  Horuhoru roa ihora râ Maria i ta ’na mau parau e imi ihora i te auraa o teie huru aroha. 30  Na ô maira ïa te melahi ia ’na: “Eiaha e mǎta‘u Maria, ua farii-maitai-hia oe e te Atua. 31  E inaha, e hapû oe* e e fanau oe i te hoê tamaiti ta oe e topa i te i‘oa o Iesu. 32  E riro oia ei taata faufaa e e parauhia oia Tamaiti a te Teitei, e e horoa te Atua ra o Iehova* i te terono o Davida to ’na metua no ’na, 33  e faatere oia ei Arii i nia i te utuafare o Iakoba e a muri noa ’tu e e ore roa ta ’na Faatereraa arii* e mou.” 34  Na ô atura râ Maria i te melahi: “E nafea te reira e tupu ai, aita hoi au i taoto a‘enei i te hoê tane?” 35  Pahono maira te melahi ia ’na: “E vai mai te varua mo‘a i nia ia oe e e tapo‘i mai te mana o te Teitei ia oe. No reira atoa te aiû o te fanauhia mai e parauhia ’i mo‘a e Tamaiti a te Atua. 36  E inaha, ua hapû atoa o Elisabeta to fetii, e ono ava‘e to ’na i teie nei, noa ’tu e e ruhiruhia oia e ua matau te taata i te parau e eita ta ’na tamarii e noaa, 37  aore hoi e parau* e ore e tia i te Atua ia faatupu.” 38  Na ô atura Maria: “Inaha, e tavini vahine au na Iehova!* Mai ta oe i parau, ia na reirahia mai ïa vau.” Reva ’tura te melahi. 39  Faaineine ihora ïa Maria ia ’na i taua mau mahana ra, haere oioi atura i te fenua mou‘a i te hoê oire no Iuda, 40  tomo atura oia i roto i te fare o Zekaria e aroha ’tura ia Elisabeta. 41  A faaroo ai Elisabeta i to Maria aroharaa mai ia ’na, hauti ihora te aiû i roto i to ’na opu, î a‘era Elisabeta i te varua mo‘a 42  e tuô ihora: “O oe te vahine haamaitai-rahi-roa-hia a‘e o te mau vahine atoa e ia haamaitai te Atua i te aiû i roto i to opu! 43  O vai hoi au e haere mai ai te metua vahine o to ’u Fatu e hi‘o ia ’u? 44  Inaha hoi, i to ’u iho â faarooraa ia oe i te aroharaa mai, hauti ihora te aiû i roto i to ’u opu no te oaoa. 45  Ia oaoa atoa oe tei tiaturi i tei parauhia ia oe, no te mea e tupu hope roa ta Iehova* i parau atu.” 46  Na ô atura Maria: “Te arue nei au* ia Iehova,* 47  e te oaoa roa nei to ’u aau i te Atua to ’u Faaora, 48  ua hi‘o mai hoi oia i ta ’na tavini vahine, noa ’tu to ’na riirii. Inaha hoi, mai teie atu nei e faaite haere ai te mau u‘i atoa e ua haamaitaihia vau, 49  e ohipa faahiahia hoi ta te Atua puai i rave no ’u e e i‘oa mo‘a to ’na, 50  e e aroha hamani maitai oia i te feia e mǎta‘u ra ia ’na i tera u‘i, i tera u‘i. 51  Ua haa oia ma to ’na rima puai. Ua haapurara i te feia teoteo i roto i te mau opuaraa a to ratou aau. 52  Ua huri oia i te feia mana i raro i to ratou terono e ua faateitei i te feia riirii. 53  Ua horoa oia i te mau mea maitatai na te feia veve e ua faaho‘i i te feia e faufaa ta ratou ma te tao‘a ore. 54  Ua tauturu oia ia Iseraela ta ’na tavini, a faaite ai e e haamana‘o oia i ta ’na parau fafau e aroha hamani maitai 55  ia Aberahama e to ’na huaai* e a muri noa ’tu, mai ta ’na i parau i to tatou mau tupuna.” 56  Parahi ihora Maria i ǒ Elisabeta piri i te toru ava‘e e ho‘i atura i to ’na iho fare. 57  Tae maira te mahana e fanau ai Elisabeta e fanau ihora oia i te hoê tamaiti. 58  Faaroo a‘era te feia tapiri e to ’na fetii e ua aroha hamani maitai rahi Iehova ia ’na, oaoa ’tura ratou e oia atoa. 59  I te va‘u o te mahana, haere maira ratou no te peritomeraa o te tamaiti, e mana‘o atura ratou e mairi ia ’na i te i‘oa o Zekaria to ’na metua tane. 60  Parau maira râ to ’na metua vahine: “Eiaha! O Ioane to ’na i‘oa.” 61  Na ô atura ratou ia ’na: “Aore roa e taata i roto i to oe fetii tera to ’na i‘oa.” 62  Ma te apǎ i te rima, ani atura ratou i to ’na metua tane i te i‘oa ta ’na e hinaaro e horoa. 63  Ani maira ïa oia i te hoê iri e papai ihora: “O Ioane to ’na i‘oa.” Maere ihora ratou pauroa. 64  I reira iho, matara a‘era to ’na vaha e to ’na arero e paraparau atura ma te arue i te Atua. 65  Mǎta‘u ihora te feia atoa e faaea ra na reira, e faatiahia ’tura teie mau mea e ati a‘e te fenua o Iudea. 66  Tapea maite atura te feia atoa i faaroo i te reira i roto i to ratou aau, a na ô ai: “O vai hoi teie tamaiti?” Tei ia ’na ra hoi te mana o Iehova.* 67  Î a‘era Zekaria to ’na metua tane i te varua mo‘a e tohu ihora: 68  “Ia aruehia Iehova* te Atua o Iseraela, no te mea ua aroha oia i to ’na nunaa e ua faaora ia ratou. 69  I horoa na oia i te hoê tara* faaora* no tatou no roto mai i te fare o to tavini ra o Davida, 70  mai ta ’na i parau na roto i ta ’na mau peropheta mo‘a i tahito ra. 71  I fafau na oia e faaora ia tatou i te rima o to tatou mau enemi e o te feia atoa e hae ra ia tatou. 72  E aroha hamani maitai oia ia tatou mai ta ’na i fafau na i to tatou mau tupuna e e haamana‘o oia i ta ’na faufaa mo‘a, 73  ta ’na i tǎpǔ ia Aberahama to tatou tupuna. 74  I muri a‘e i to te Atua faaoraraa ia tatou i te rima o te mau enemi, e nehenehe tatou e pûpû ia ’na i te hoê taviniraa mo‘a ma te mǎta‘u ore, 75  te taiva ore e te parau-tia i mua i to ’na aro e hope noa ’tu to tatou pue mahana. 76  Area oe, e tamaiti, e parauhia oe peropheta na te Teitei, e tono hoi Iehova* ia oe na mua ia ’na no te faaineine i te e‘a no ’na, 77  no te faaite i to ’na nunaa e e faaora oia ia ratou ma te faaore i ta ratou mau hara 78  no to te Atua hoi aumihi î i te here. Mai te mahana e anaana mai i te aahiata teie aumihi î i te here no nia mai 79  no te turama i tei parahi ra i roto i te poiri e te maru pohe, e no te aratai i to tatou avae na te e‘a o te hau.” 80  Paari maira te tamaiti, itoito ihora i te pae varua e ora noa ’tura i te medebara e tae atu i te mahana i faaite roa mai ai oia ia ’na ia Iseraela.

Nota i raro i te api

I roto i te reo Heleni, te faaohipa ra Luka i te hoê parau e faaite ra i te faatura ia Teophilo aore ra e tiaraa teitei to ’na.
A hi‘o i te titionare.
A hi‘o i te titionare.
A hi‘o i te titionare.
A hi‘o i te titionare.
A hi‘o i te titionare.
A hi‘o i te titionare.
Aore ra “puai ohipa o te Atua.”
Aore ra “i roto â i te opu o to ’na metua vahine.”
“Tamaiti” na roto i te reo Heleni.
A hi‘o i te titionare.
A hi‘o i te titionare.
Aore ra “evanelia.”
Aore ra “te hoê orama.”
A hi‘o i te titionare.
“Paretenia” na roto i te reo Heleni, oia hoi e vahine aita i taoto a‘enei i te hoê tane.
“Paretenia” na roto i te reo Heleni, oia hoi e vahine aita i taoto a‘enei i te hoê tane.
A hi‘o i te titionare.
Aore ra “e tô oe i roto i to opu.”
A hi‘o i te titionare.
Aore ra “to ’na Basileia.”
Aore ra “aore hoi e mea.”
A hi‘o i te titionare.
A hi‘o i te titionare.
Heleni pusuke. A hi‘o i te titionare.
A hi‘o i te titionare.
“Huero” na roto i te reo Heleni.
A hi‘o i te titionare.
A hi‘o i te titionare.
A hi‘o i te titionare.
Aore ra “te hoê faaora puai.”
A hi‘o i te titionare.