Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Korinetia 2, 8:1-24

HAAPOTORAA O TE MAU TUMU PARAU

  • Haaputuraa i te ô no te mau Kerisetiano i Iudea (1-15)

  • E tonohia Tito i Korinetia (16-24)

8  Taeae ma, e hinaaro matou ia ite outou i teie nei i ta te hamani maitai rahi o te Atua i faatupu i rotopu i te mau amuiraa i Makedonia.  I roto i te tamataraa rahi a roohia ’i ratou i te ati, ua faaite ratou i te oaoa rahi e te aau horoa noa, noa ’tu e mea veve roa ratou.  Te haapapu atu nei au, ua horoa ratou i te mea e vai ra ia ratou, e hau atu â.  Ua onoono noa mai ratou, mai ta ratou iho i faaoti, ia nehenehe ratou e horoa i te tahi ô ma te aau tae e e apiti i teie taviniraa no te tauturu i te feia mo‘a.  Ua rave hau atu â ratou i ta matou i mana‘o, ua haapae hoi ia ratou iho no te tavini i te Fatu e ia matou atoa na roto i te hinaaro o te Atua.  No reira, ua faaitoito matou ia Tito ia faaoti i te haaputu i ta outou ô horoahia ma te aau tae, i te mea e na ’na i haamata i taua ohipa ra i rotopu ia outou.  I te mea e te rahi nei teie nei mau mea ia outou, oia hoi te faaroo e te aravihi i te parau e te ite e te anaanatae i te mau mea atoa e to matou here ia outou, ia rahi atoa ïa ta outou e horoa ma te aau tae.  Te parau nei au i te reira, eiaha no te faahepo ia outou, ia taa râ ia outou to vetahi ê ra anaanatae. E hinaaro hoi au e ite e e here mau anei to outou.  Ua ite hoi outou i te hamani maitai rahi o to tatou Fatu ra o Iesu Mesia, noa ’tu e e tao‘a rahi ta ’na, ua riro oia ei taata veve no outou, ia tao‘ahia hoi outou maoti to ’na veve. 10  Teie to ’u mana‘o: No to outou hoi maitai, inaha a tahi a‘enei matahiti, aita outou i opua noa, ua rave roa râ i teie ohipa. 11  E teie nei, a rave faahope i ta outou i haamata ia au i te mea e vai ra ia outou, ta outou hoi i opua na e rave. 12  Ia anaanatae hoi te tahi taata i te horoa, e fariihia ïa ia au i te mea e vai ra ia ’na, eiaha râ i te mea aita e vai ra ia ’na. 13  Aita hoi au e hinaaro ra ia mâmâ te oraraa no te tahi pae, area no outou ra, ia teimaha ïa. 14  Tera râ, ia aifaito, ia turu atu outou i tei ere ra i teie mahana maoti ta outou tao‘a rahi, e ia nehenehe ratou ia turu mai i ta outou e ere ra maoti ta ratou tao‘a rahi, ia aifaito hoi te hopoia. 15  Mai tei papaihia: “Aita i rahi roa ta te taata i haaputu rahi mai, e aita i iti roa ta te taata i haaputu rii mai.” 16  E teie nei, ia haamaitaihia te Atua i te tuuraa i te hoê â haapeapearaa no outou i roto i te aau o Tito, 17  no te mea ua farii oia i ta matou aniraa, e ma te hinaaro mau, na ’na iho i faaoti e haere atu ia outou ra. 18  Tera râ, na muri ia ’na, te tono atu nei matou i te taeae tei haapopouhia i roto i te mau amuiraa atoa no ta ’na e rave ra no te parau apî oaoa. 19  Oia atoa râ, ua faatoroahia oia e te mau amuiraa ia apee mai ia matou i to matou tere, e ia tauturu mai i te haapaoraa i teie mau ô horoa noa i haaputuhia no te hanahana o te Fatu, e ei haapapuraa e ua ineine matou i te tauturu ia vetahi ê. 20  Te vai ara nei hoi matou ia ore matou ia faahapahia no teie tino moni i horoa-noa-hia mai, e o ta matou e haapao nei. 21  No te mea hoi, ‘te rave nei matou i te mau mea atoa ma te afaro, eiaha noa i mua ia Iehova,* i mua atoa râ i te taata.’ 22  E te tono atoa ’tu nei matou i te tahi atu taeae to tatou, tei hi‘opoahia e tei itehia to ’na haapao maitai i te mau mea atoa, e hau atu â i teie nei, i te mea e te tiaturi rahi nei oia ia outou. 23  Ia feaa noa ’tu outou no Tito, e hoa* teie no ’u e o mâua te rave i te ohipa no to outou maitai. E ia feaa noa ’tu outou no te mau taeae, e aposetolo ratou no te mau amuiraa e o ratou te hanahana o te Mesia. 24  No reira, a haapapu atu i to outou here ia ratou, e a faaite atu i te mau amuiraa no te aha matou e haapeu ai ia outou.

Nota i raro i te api

A hi‘o i te titionare.
“Apiti” na roto i te reo Heleni.