Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Korinetia 2, 7:1-16

HAAPOTORAA O TE MAU TUMU PARAU

  • Tamâ ia tatou iho i te mau mea viivii (1)

  • To Paulo oaoa i to Korinetia (2-4)

  • Ta Tito parau oaoa (5-7)

  • Oto e tatarahapa e au i te hinaaro o te Atua (8-16)

7  Taeae here ma, i te mea e ua fafauhia mai taua mau parau ra ia tatou, e tamâ ana‘e ïa ia tatou iho i te mau viivii atoa o te tino e o te feruriraa,* e ia mo‘a roa ’tu â tatou a mǎta‘u ai i te Atua.  A farii ia matou i roto i to outou aau. Aita matou i haamauiui i te taata, aita matou i faahahi ê i te taata e aita matou i haavare i te taata ia faufaahia matou.  Aita vau e na reira ra i te parau no te faahapa ia outou. Ua parau a‘ena hoi au e, ia ora aore ra ia pohe noa ’tu matou, e here noa iho â matou ia outou.  E nehenehe ta ’u e parau roa ’tu ia outou. Ua haapeu roa vau ia outou. Ua tamahanahana-rahi-hia vau, e i roto i te mau fifi atoa ta matou e faaruru ra, te oaoa roa nei au.  Ia matou hoi i tapae atu i Makedonia, aita to matou rohirohi i mâha, ua tamau noa râ matou i te faaruru i te fifi e rave rau. Ua patoi u‘ana mai to rapae, e ua haapeapea noa matou no te mau amuiraa.  Area te Atua, o te tamahanahana i te feia e hepohepo ra, ua tamahanahana ïa ia matou na roto ia Tito i to ’na faaearaa mai ia matou ra.  Tera râ, e ere noa no to ’na faaearaa mai, no to outou atoa râ tamahanahanaraa ia ’na, ua faaite mai hoi oia i to outou hinaaro e farerei ia ’u, e to outou oto rahi e to outou haapeapea rahi no ’u. No reira vau i oaoa roa ’i.  Noa ’tu e ua oto outou no ta ’u i papai i roto i ta ’u rata, aita vau e tatarahapa ra. I tatarahapa na hoi au (i to ’u hoi iteraa e ua oto outou no taua rata ra, noa ’tu e no te hoê taime poto noa),  e teie nei, te oaoa nei au, eiaha no te mea e te oto ra outou, no te mea râ ua turai taua oto ra ia outou ia tatarahapa. Ua oto outou ia au i te hinaaro o te Atua, e aita outou i ere i te tahi noa ’‘e mea. 10  E faatupu hoi te oto ia au i te hinaaro o te Atua i te tatarahapa e noaa ’i te faaoraraa, e e faufaa-noa-hia tatou i te reira. Area te oto ia au i teie nei ao, e faatupu ïa i te pohe. 11  A hi‘o na eaha te mea e ite-mau-hia ra i to outou otoraa ia au i te hinaaro o te Atua: ua haapapu outou iho e aita ta outou e hapa, ua riri outou i te ino, ua mǎta‘u i te Atua, ua hinaaro mau e tatarahapa, ua faaite i te itoito rahi e ua faatitiaifaro i te hape. I roto i te mau tupuraa atoa, ua haapapu outou e mea mâ* outou i taua mau mea nei. 12  Ua papai atu vau ia outou, eiaha no te taata tei rave i te ino, eiaha atoa no tei rave-ino-hia. Ua papai atu râ vau ia ite-maitai-hia e te faaroo maite ra outou ia matou i mua i te Atua. 13  No reira ïa matou i tamahanahanahia ’i. Hau atu â râ, ua rahi roa to matou oaoa a ite ai i te oaoa o Tito, no te mea ua faaitoito outou paatoa ia ’na.* 14  Aita hoi au i haama i to ’u haapopouraa ia outou i mua ia ’na. Te mau parau atoa ta matou i parau no nia ia outou, e parau mau ana‘e. E ia haapopou matou ia Tito, e parau mau atoa ïa. 15  E ia mana‘o oia i to outou auraro e to outou fariiraa ia ’na ma te faatura rahi, e rahi atu â ïa to ’na here ia outou. 16  Te oaoa nei au, no te mea e nehenehe au e tiaturi ia outou* i te mau mea atoa.

Nota i raro i te api

Heleni peneuma. A hi‘o i te titionare.
Aore ra “viivii ore,” “hapa ore.”
Heleni peneuma. A hi‘o i te titionare.
Nehenehe atoa e hurihia “e itoitohia maoti outou.”