Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Korinetia 2, 6:1-18

HAAPOTORAA O TE MAU TUMU PARAU

  • Eiaha e haafaufaa ore i to te Atua hamani maitai (1, 2)

  • Faataahia ra te taviniraa a Paulo (3-13)

  • Eiaha te amui-au-ore-raa (14-18)

6  Ei hoa ohipa no te Atua, te ani ru nei matou ia outou e eiaha e farii faufaa ore noa i te hamani maitai rahi o te Atua.  Te na ô ra hoi oia: “I te tau o te farii maitai, ua faaroo vau ia oe, e i te mahana faaoraraa, ua tauturu vau ia oe.” Inaha, teie mau â te tau o te farii maitai. E inaha, teie te mahana faaoraraa.  Eita roa ’tu matou e tuu noa ’‘e i te turoriraa i mua i te taata atoa, ia ore ta matou taviniraa ia faahapahia.  I roto râ i te mau tupuraa atoa, e faaite matou e e tavini matou na te Atua: na roto i te faaoromai-tamau-raa i te tamataraa e rave rahi, te ati, te ereraa, te fifi,  te tairiraa, te tapearaa, te faaarepurepuraa, te ohipa teimaha, te ara-noa-raa i te po e te ereraa i te maa,  na roto i te haerea viivii ore e te au i te ite, na roto i te faaoromai, te hamani maitai, te peeraa i te aratairaa a te varua mo‘a, te faaiteraa i te here haavare ore,  na roto i te parau mau e te mana o te Atua, e maoti te mauhaa o te parau-tia i te rima atau e i te rima aui,*  e i roto i te hanahana e te tura ore, a faainohia ’i e a haapopouhia ’i. E feia haavare matou i te hi‘oraa a te taata, te parau nei râ matou i te parau mau.  Mai te feia ite-ore-hia ra hoi matou, e feia ite-maitai-hia râ matou. Mai te mea ra e te pohe ra matou,* e inaha te ora noa nei. Mai te mea ra e ua a‘ohia matou, aita râ i taparahi-pohe-roa-hia. 10  Mai te mea ra e te oto ra matou, te oaoa nei râ. Mai te veve ra matou, mea rahi râ te tao‘a ta matou e horoa ’tu nei. Mai te taata tao‘a ore ra matou, tei ia matou nei râ te mau mea atoa. 11  Ua parau roa ’tu to matou vaha ia outou, te mau taeae no Korinetia, e ua haamahora ’tu matou i to matou aau. 12  Ua faaite roa matou i to matou here ia outou, aita râ outou i faaite roa mai i to outou here ia matou. 13  Te parau atu nei ïa vau ia outou mai te mea ra e e tamarii outou na ’u, mai ia matou i na reira ’tu, ia haamahora outou atoa i to outou aau. 14  Eiaha outou ia amui-au-ore-hia i te feia* aita e tiaturi ra ia Iesu. E tuati anei te parau-tia i te ohipa ino? E tu anei te maramarama e te poiri? 15  Hau atu â, e auraa anei to te Mesia ia Behala?* E apiti anei te taata e tiaturi ra ia Iesu i te taata e ore e tiaturi ra? 16  E parahiraa anei to te idolo i roto i te hiero o te Atua? O tatou te hiero o te Atua ora, mai ta te Atua hoi i parau: “Ei pihai iho vau ia ratou, ei rotopu atoa ia ratou. E riro vau ei Atua no ratou e e riro ratou ei nunaa no ’u.” 17  “‘No reira, a haere ê mai i rapae mai rotopu mai ia ratou, e a faataa ê mai ia outou’ te na reira mai ra Iehova,* ‘atira i te tapea i te mea viivii,’” “‘e e farii au ia outou.’” 18  “‘E e riro vau ei metua no outou, e e riro outou ei tamaiti e ei tamahine na ’u,’ te na reira mai ra Iehova,* te Mana hope.”

Nota i raro i te api

Aore ra “no te aro atu e no te paruru mai.”
Aore ra “e au ia matou te utua pohe.”
“I raro a‘e i te hoê â zugo e te feia” na roto i te reo Heleni.
No roto mai i te hoê ta‘o Hebera, “Faufaa ore” te auraa. E i‘oa no Satani.
A hi‘o i te titionare.
A hi‘o i te titionare.