Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Korinetia 2, 3:1-18

HAAPOTORAA O TE MAU TUMU PARAU

  • Rata haapapuraa (1-3)

  • Tavini i te faufaa apî (4-6)

  • Te hanahana hau ê o te faufaa apî (7-18)

3  E faaite faahou atu anei matou o vai matou? Aore ra mea titauhia anei te rata haapapuraa no ǒ mai ia outou aore ra no outou, mai ta te tahi mau taata e rave ra?  O outou iho hoi ta matou rata haapapuraa tei papaihia i nia i to matou aau, o te itehia ra e te taiohia ra e te huitaata atoa.  Mea papu e rata outou na te Mesia ta matou te mau tavini i papai eiaha i te inita, i te varua râ o te Atua ora, e eiaha i nia i te pǎpǎ ofai, i nia râ i te aau.  O te huru ïa o to matou tiaturiraa i te Atua na roto i te Mesia.  Aita matou e parau ra e e tia ia matou iho ia rave i teie ohipa na roto i to matou iho puai, tera râ, maoti te Atua i tia ’i te reira,  e maoti hoi ia ’na e tia ’i ia matou ia riro ei tavini i te hoê faufaa apî, eiaha i te hoê ture papaihia, ei tavini râ i te varua mo‘a. E horoa mai hoi te ture papaihia i te utua pohe, area te varua mo‘a, e horoa mai ïa i te ora.  E teie nei, mai te peu e ua horoahia mai na roto i te hanahana te ture a Mose, o te hopoi mai i te pohe e tei papaihia i nia i na pǎpǎ ofai, e aita ’tura te mau tamaiti a Iseraela i nehenehe e hi‘o i te hoho‘a mata o Mose no te hanahana o to ’na hoho‘a mata, e hanahana te faaorehia,  no reira, eita anei ïa te varua mo‘a e horoahia mai na roto i te hanahana rahi atu â?  Mai te peu hoi e mea hanahana te ture a Mose o te horoa i te faautuaraa, e mea hanahana atu â ïa te taviniraa o te faariro i te taata ei taata parau-tia. 10  Oia atoa, ua faufaa-ore-hia te hanahana o te ture a Mose ia faaauhia i te hanahana hau ê o te faufaa apî. 11  Mai te peu e mea na roto i te hanahana te ture papaihia i te horoaraahia, e tei faaorehia i muri iho, e hanahana rahi atu â ïa to te faufaa apî o te vai noa mai. 12  I te mea e teie ta matou e tiaturi nei, te parau roa ’tu nei matou ma te mǎta‘u ore, 13  aita ïa matou e rave nei mai ia Mose i to ’na tapo‘iraa i to ’na hoho‘a mata i te ahu paruru, ia ore hoi te mau tamaiti a Iseraela ia hi‘o i te hanahana o te ture papaihia o te faaorehia. 14  Ua haapoirihia râ to ratou feruriraa. E tae roa mai i teie mahana, te tapo‘i-noa-hia ra to ratou feruriraa i teie ahu paruru a taio ai ratou i te faufaa tahito, e mea na roto noa hoi i te Mesia e tatarahia ’i te reira. 15  Oia mau, te tapo‘i noa ra teie ahu paruru i to ratou aau a taiohia ’i te mau papai a Mose e tae roa mai i teie mahana. 16  Ia fariu râ te tahi taata ia Iehova,* e tatarahia ïa te ahu paruru. 17  E teie nei, o Iehova* te Varua, e i te vahi tei reira te varua o Iehova,* tei reira atoa ïa te tiamâraa. 18  E tatou paatoa, aita faahou to tatou hoho‘a mata i tapo‘ihia i te ahu paruru e e au tatou i te hi‘o anaana o te faaite ra i te hanahana o Iehova.* A na reira ’i tatou, te tauihia ra to tatou hoho‘a ia riro mai to ’na iho hoho‘a o te hanahana noa ’tu ra, mai ta Iehova* te Varua* e rave iho â.

Nota i raro i te api

A hi‘o i te titionare.
A hi‘o i te titionare.
A hi‘o i te titionare.
A hi‘o i te titionare.
A hi‘o i te titionare.
Nehenehe atoa e hurihia “na te varua o Iehova.”