Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Korinetia 2, 12:1-21

HAAPOTORAA O TE MAU TUMU PARAU

  • Ta Paulo mau orama (1-7a)

  • ‘Tara i roto i te tino’ o Paulo (7b-10)

  • Aita oia i iti a‘e i te mau faahua aposetolo rarahi (11-13)

  • To Paulo haapeapearaa no to Korinetia (14-21)

12  E mea tia ia haapeu vau. No reira, e faahiti atu vau i te mau orama e te mau heheuraa a te Fatu noa ’tu e eita vau e faufaahia i te na reiraraa.  Ua ite au i te hoê taata tei hoê e te Mesia, ua ravehia ’tu oia i nia i te toru o te ra‘i a 14 matahiti i teie nei. Ua rave-tino-hia anei oia aore ra aita? Aita vau i ite, te Atua ana‘e tei ite.  Oia mau, ua ite au i teie nei taata. Ua rave-tino-hia anei oia aore ra aita? Aita vau i ite, te Atua ana‘e tei ite.  E i roto i te paradaiso, ua faaroo oia i te tahi mau parau e ore e tia ia parauhia, e ore atoa e tano no te hoê taata ia faahiti.  E haapeu vau i teie nei taata, e haapeu vau i to ’u nei mau paruparu, eiaha râ ia ’u iho.  Ahiri hoi au i hinaaro e haapeu, e ere ïa i te mea maamaa, no te mea e parau mau ta ’u e parau atu. Eita râ vau e na reira, ia ore te taata ia haafaufaa rahi roa ia ’u no ta ’na e ite ra e e faaroo ra ia ’u nei,  no teie noa mau heheuraa faahiahia i faaitehia mai ia ’u. Ia ore au ia faaoru, ua tuuhia mai te hoê tara i roto i to ’u nei tino, te hoê melahi a Satani, no te haamauiui* noa ia ’u ia ore au ia faaoru.  E toru hoi taime to ’u taparuraa i te Fatu ia tatara i taua tara ra.  Ua parau mai râ oia: “Ua ravai oe i to ’u hamani maitai rahi, i roto hoi i te paruparu e ite-maitai-hia ’i te rahi o to ’u puai.” No reira ïa vau e haapeu ai i to ’u mau paruparu, ia vai mai hoi te puai o te Mesia mai te hoê tamaru i nia ia ’u. 10  No reira, no te Mesia te oaoa nei au i to ’u nei mau paruparu, oia atoa te faainoraa, te ereraa, te hamani-ino-raa e te fifi. Ia paruparu hoi au, i reira ïa vau e puai ai. 11  Ua riro vau mai te maamaa ra te huru, o outou te tumu, no te mea aita outou i faahiti i te mau mea maitatai ta ’u i rave. Faufaa ore noa ’tu vau, aita roa vau i iti noa ’‘e i ta outou mau faahua aposetolo rarahi. 12  Ua ite mau hoi outou i te mau haapapuraa e e aposetolo vau na roto i te faaoromai tamau, oia atoa te semeio, te ohipa maere* e te mau ohipa mana. 13  Eaha hoi ta te tahi atu mau amuiraa maitai e aita ta outou? Aita hoi au i faateimaha ia outou. Ua hapa anei au? A faaore mai na ïa i teie hapa ta ’u. 14  Inaha, teie au e haere atu nei i ǒ outou no te toru o te taime, e eita vau e faateimaha ia outou. E ere ta outou mau faufaa ta ’u e hinaaro nei, o outou râ. E ere hoi na te tamarii e haaputu i te faufaa na to ratou mau metua, na te metua râ e haaputu na ta ratou mau tamarii. 15  Ia ’u nei hoi, ua ineine au i te horoa i to ’u puai atoa e ia hope roa no outou.* Ia rahi â hoi to ’u here ia outou, eaha ïa to outou here ia ’u e iti mai ai? 16  Noa ’tu e aita vau i faateimaha ia outou, te parau noa nei outou: “E taata taviri tera e ua râmâ ia matou i ta ’na mau haavarevare.” 17  Aita vau i apî ia outou na roto i te hoê o te feia ta ’u i tono atu, te reira iho â anei? 18  Ua faaue au ia Tito e ua tono atoa ’tu i te hoê taeae na muri ia ’na. Aita roa ’tu Tito i apî ia outou, te reira iho â anei? E ere anei hoê â mana‘o e hoê â haerea to matou? 19  Ua mana‘o noa anei outou e te pahono ra matou i ta outou mau pariraa? I te aro o te Atua matou e paraparau ai ei feia tei hoê e te Mesia. Taeae here ma, ua na reira hoi matou no te faaitoito ia outou. 20  Te taiâ nei hoi au e ia tae atu vau, te rave ra outou i te mea eita vau e au, e o vau nei te rave nei ïa i te mea eita outou e au, e itehia ’tu te aimârôraa, te pohehae, te iria, te amahamaharaa, te faaino, te mutamuta,* te faaoru e te faahuehueraa. 21  Peneia‘e ia haere faahou atu vau, e faahaehaa mai to ’u Atua ia ’u i mua ia outou, a oto atu ai au no te rahiraa o te feia i hara na aita râ i tatarahapa i ta ratou mau peu viivii e peu taotoraa tia ore,* e te mau peu faufau ta ratou i rave.*

Nota i raro i te api

Aore ra “tairi.”
Aore ra “tapao.”
Heleni pusuke. A hi‘o i te titionare.
Aore ra “ohumu.”
A hi‘o i te titionare.
Aore ra “to ratou haerea haama ore.” A hi‘o i te titionare.