Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Korinetia 2, 11:1-33

HAAPOTORAA O TE MAU TUMU PARAU

  • Paulo e te mau faahua aposetolo rarahi (1-15)

  • Ta Paulo i faaruru ei aposetolo (16-33)

11  E hinaaro vau ia faaoromai outou ia ’u noa ’tu ta ’u mau parau rii maamaa. Inaha hoi, te faaoromai noa ra outou!  Te mana‘ona‘o ra hoi au ia outou mai ta te Atua e mana‘ona‘o ra,* na ’u iho hoi i momo‘a ia outou i te hoê tane faaipoipo, e te hinaaro nei au e pûpû ia outou mai te hoê vahine apî* viivii ore ra na te Mesia.  Tera râ, mai te ophi hoi i faahema ia Eva i ta ’na ravea paari, te taiâ nei au ia viivii-atoa-hia to outou feruriraa, a ere atu ai outou i te haavare ore e te viivii ore e au i te Mesia.  Inaha, ia haere noa mai te tahi taata e poro ia outou i te hoê Iesu ê atu i ta matou i poro, aore ra ia pee outou i te hoê huru feruriraa* ê atu i ta outou i pee na, aore ra i te hoê parau apî oaoa ê atu i ta outou i farii na, ohie noa outou i te faaoromai i tera taata.  I to ’u hoi hi‘oraa, aita roa ’tu vau i iti noa ’‘e i ta outou mau faahua aposetolo rarahi.  Tera râ, ma‘ua noa ’tu vau i te parau, e ere roa ’tu vau i te mea ma‘ua i te ite. Ua faaite papu atu hoi matou i te reira na roto i te mau ravea atoa e na roto i te mau mea atoa.  Eaha, ua hara anei au i to ’u faahaehaaraa ia ’u iho ia faateiteihia outou, no te mea ua faaite au ia outou i te parau apî oaoa a te Atua ma te tamoni ore?  Ua faaere au* i te tahi atu mau amuiraa i to ’u fariiraa i ta ratou mau ô* ia nehenehe au e tavini ia outou.  E inaha, i to ’u ereraa i te mau mea hinaaro-mau-hia i rotopu ia outou, aita vau i faateimaha i te hoê o outou, na te mau taeae râ tei haere mai na Makedonia mai i tauturu rahi mai ia ’u. Oia mau, ua imi au i te mau ravea atoa eiaha roa e faateimaha ia outou, e e na reira noa vau. 10  E parau mau ta ’u e parau atu nei mai te Mesia ra, eita ïa vau e faaea i te haapeu i te reira na Ahaia taatoa. 11  No te aha hoi? No te mea anei aita vau e here ra ia outou? O te Atua tei ite e mea here na ’u ia outou. 12  E teie nei, mai ta ’u e rave nei e na reira noa vau, no te haafaufaa ore i te ravea a te feia e imi ra i te tahi tumu* e aifaito ai ratou ia matou i te mau mea* ta ratou e haapeu ra. 13  E aposetolo haavare, e rave ohipa haavarevare, e e faahua aposetolo na te Mesia tera mau taata. 14  Eita vau e maere i te reira, o Satani hoi o te faahua noa nei ia ’na ei melahi no te maramarama. 15  E ere ïa i te mea maere e te faahua rave noa nei ta ’na mau tavini i te parau-tia. Tera râ, e au to ratou hopea i ta ratou mau ohipa. 16  Te parau atu nei â vau: Eiaha te tahi taata ia mana‘o e e taata maamaa vau. Tera râ, ia na reira noa ’tu outou, a faaoromai na ia ’u i to ’u maamaa nei, ia nehenehe atoa vau ia haapeu rii. 17  E ta ’u e parau atu i teie nei, e ere ïa mai ta te Fatu, mai ta te hoê maamaa râ o te tiaturi rahi roa ia ’na iho. 18  I te mea e e rave rahi teie e haapeu nei ia au i ta te tino,* e haapeu atoa ïa vau. 19  Inaha e “feruriraa paari” to outou, oaoa roa ïa outou i te faaoromai i te feia maamaa. 20  Oia mau, te taata e faatîtî ra ia outou, e haru e e haapau ra i ta outou mau faufaa, e faateitei ra ia ’na iho no te vahavaha ia outou aore ra te taata e tupai ia outou i te mata, o ta outou ïa e faaoromai nei. 21  Mea haama roa no matou ia parau i te reira, e au hoi e ua ohipa matou ma te paruparu. Ia ohipa râ te tahi pae ma te mǎta‘u ore, e parau atu vau mai te maamaa ra, e ohipa atoa ïa vau ma te mǎta‘u ore. 22  E Hebera ratou? O vau atoa. E ati Iseraela ratou? O vau atoa. E huaai* ratou no Aberahama? O vau atoa. 23  E tavini ratou na te Mesia? E pahono vau mai te maamaa ra, eaha ’tu â ïa vau: Mea rahi a‘e ta ’u ohipa i rave, pinepine vau i te tapeahia, i te tairihia e e rave rahi taime ua fatata roa vau i te pohe. 24  E pae taime to ’u tairiraahia e te ati Iuda, e 39 tairiraa i te taime hoê. 25  E toru taime to ’u ruturaahia i te raau, hoê taime ua pehihia vau i te ofai, e e toru taime to ’u atiraa a parari ai te pahi, hoê rui hoê ao i te vairaa i roto i te moana. 26  I to ’u mau tere e rave rahi, ua faaruru vau i te pape pue, i te eiâ, i te ati no ǒ mai i to ’u iho nunaa e te tahi atu, i te ati i roto i te oire, te medebara,* te miti e te ati i rotopu i te mau faahua taeae. 27  Ua faaruru vau i te ohipa teimaha e te rohirohi, pinepine au i te ara-noa-raa i te po, i te poia e te poihâ, e rave rahi taime i te ereraa i te maa, i te vairaa i roto i te to‘eto‘e e te navai-ore-raa i te ahu.* 28  Hau atu i taua mau fifi ra, te mea o te haapeapea ra ia ’u i tera e tera mahana,* o to ’u ïa tapitapiraa no te mau amuiraa atoa. 29  O vai tei paruparu e aita atoa vau i paruparu? O vai tei turori e aita vau i riri roa? 30  E ia haapeu vau e tia ’i, e haapeu ïa vau i te mau mea e faaite ra i to ’u paruparu. 31  Ua ite te Metua o to tatou Fatu ra o Iesu, o to ’na atoa hoi Atua te tia ia aruehia e a muri noa ’tu, e aita vau e haavare nei. 32  I Damaseko, ua tuu te tavana o te arii Areta i te tiai i te uputa o te oire no te haru ia ’u, 33  ua haapouhia ’tu râ vau i roto i te hoê farii* na roto atu i te hoê haamaramarama o te patu o te oire, i ora mai ai au i to ’na rima.

Nota i raro i te api

“I te itoito rahi o te Atua” na roto i te reo Heleni.
Oia hoi te hoê vahine aita i taoto a‘enei i te hoê tane.
Heleni peneuma. A hi‘o i te titionare.
“Ua eiâ vau” na roto i te reo Heleni.
Aore ra “ta ratou tauturu.”
Aore ra “otoheraa.”
Aore ra “te toroa.”
Oia hoi ia au i to te taata mana‘o.
“Huero” na roto i te reo Heleni.
E tuhaa fenua teie aita i rahi te taata na reira.
“Te vai-tahaa-raa” na roto i te reo Heleni.
Aore ra “e faateimaha ia ’u i te mau mahana atoa.”
Aore ra “farii raraahia.”