Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Korinetia 2, 1:1-24

HAAPOTORAA O TE MAU TUMU PARAU

  • Aroharaa (1, 2)

  • Tamahanahanaraa a te Atua i roto i te mau ati atoa (3-11)

  • To Paulo tauiraa i to ’na mau tere (12-24)

1  O vau o Paulo, e aposetolo na te Mesia ra o Iesu na roto i te hinaaro o te Atua, e o Timoteo to tatou taeae, i te amuiraa o te Atua i Korinetia e i te feia mo‘a atoa e ati a‘e Ahaia:  Ei ia outou ra te hamani maitai rahi e te hau no ǒ mai i te Atua ra to tatou Metua e i te Fatu ra o Iesu Mesia.  Ia aruehia te Atua e Metua o to tatou Fatu ra o Iesu Mesia, te Metua o te aroha hamani maitai î i te here e te Atua no ’na ana‘e te mahanahana,  o te tamahanahana* ia tatou i roto i te mau tamataraa* atoa, e ia nehenehe atoa vetahi ê e mahanahana ia tatou i roto i te tamataraa* e rave rau maoti te mahanahana ta tatou e fana‘o ra i te Atua.  E no te mea hoi te mauiui rahi nei tatou no te Mesia, na roto i te Mesia atoa ïa tatou e mahanahana maitai ai.  E teie nei, ia faaruru noa ’tu matou i te tamataraa,* no te tamahanahana e no te faaora ïa ia outou. E ia mahanahana noa ’tu matou, no te tamahanahana ïa ia outou e no te tauturu atu ia faaoromai maite i te mauiui ta matou e faaruru atoa ra.  No reira, te tiaturi mau nei matou ia outou e ua ite atoa e e tamahanahana-atoa-hia outou e o matou atoa, outou hoi i mauiui mai ia matou.  Taeae ma, e hinaaro hoi matou ia ite outou e ua fifi-roa-hia matou i te ati ta matou i faaruru i te fenua Asia e aita ’tura i noaa i te faaoromai maoti to matou iho puai, e aita atoa i papu e e ora mai anei matou.  Ua mana‘o matou e e pohe iho â matou. Ua haapii mai teie tupuraa e eiaha e tiaturi ia matou iho, i te Atua râ o te faatia mai i te feia pohe. 10  I taua ati pohe ra ua faaora oia ia matou e e faaora â oia. E te tiaturi atoa nei matou ia ’na e e tamau â oia i te faaora ia matou. 11  E nehenehe atoa outou e tauturu mai ma te taparuparu noa no matou na roto i te pure. Ia na reira outou, e haamaitaihia te Atua no te tauturu ta matou i fana‘o ei pahonoraa i te mau pure e rave rahi. 12  E mana‘o haava mâ to matou no te mea, i roto i teie nei ao e hau atu â i rotopu ia outou, te faaite nei matou i te haerea mo‘a e i te haavare ore e au i te Atua ra. Aita matou i tiaturi i te paari o teie nei ao, i te hamani maitai rahi râ o te Atua, e o ta matou ïa e haapeu ra. 13  Aita roa ’tu hoi matou e papai nei i te tahi atu mau mea maori noa râ i ta outou e nehenehe e taio* e e taa te auraa. E hinaaro iho â vau ia taa maitai roa* ia outou taua mau parau ra, 14  mai te tahi pae o outou i taa a‘ena te reira, oia hoi ua riro matou ei haapeuraa na outou, mai ia outou atoa e riro ai ei haapeuraa na matou i te mahana o to tatou Fatu ra o Iesu. 15  No to ’u hoi tiaturiraa ia outou i opua ’i au e haere atu na mua roa i ǒ outou no te piti o te taime, ia oaoa â outou,* 16  i opua na hoi au e farerei ia outou ia tere atu vau i Makedonia, e mai reira mai e ho‘i faahou mai ia outou ra, e i muri iho ia apee mai outou ia ’u maa taime i to ’u tere i Iudea. 17  Oia mau, ua faaoti noa anei au ma te ore e feruri maite? Aore ra ua opua noa anei au i te reira ia au i ta te tino, a parau ai e “E, e” e i muri iho “Eita ïa”? 18  Mai te Atua e nehenehe e tiaturihia, oia atoa ta matou e parau nei ia outou, eita matou e parau “e,” e i te auraa mau râ, “eita.” 19  Oia atoa hoi te Tamaiti a te Atua o Iesu Mesia, ta ’u e ta Siluano* e ta Timoteo i poro i rotopu ia outou, aita ta ’na “e” i riro ei “eita,” e riro noa râ ta ’na “e” ei “e.” 20  Rahi noa ’tu â hoi te mau parau fafau a te Atua, ua riro ana‘e ïa ei “e” na roto ia Iesu. E na roto atoa ïa ia ’na te “Amene” e parauhia ’i i te Atua ia faahanahanahia oia e tatou. 21  Na te Atua râ e haapapu ra e no te Mesia outou e matou atoa, e na ’na atoa i faatavai ia tatou. 22  Ua tuu atoa mai oia i ta ’na tapao i nia ia tatou e ua horoa mai i te varua mo‘a* i roto i to tatou nei aau ei haapapuraa* o te mau haamaitairaa e tupu a muri a‘e. 23  E teie nei, te euhe nei au i mua i te Atua no ’u iho* e aita â vau i tae atura i Korinetia no te faaherehere ia outou i te oto. 24  Aita vau e parau nei e o matou te fatu o to outou faaroo, e hoa ohipa noa râ matou no to outou oaoa, no te faaroo hoi outou e mau maite ai.

Nota i raro i te api

Aore ra “faaitoito.”
Aore ra “ati.”
Aore ra “ati.”
Aore ra “ati.”
Nehenehe atoa e hurihia “i tei papu a‘ena ia outou.”
“Hope roa” na roto i te reo Heleni.
Nehenehe atoa e hurihia “ia tapitihia to outou oaoaraa.”
Pii-atoa-hia Sila.
Aore ra “puai ohipa o te Atua.”
Aore ra “tarahu,” “piri.”
Heleni pusuke. A hi‘o i te titionare.