Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Korinetia 1, 9:1-27

HAAPOTORAA O TE MAU TUMU PARAU

  • To Paulo hi‘oraa ei aposetolo (1-27)

    • “Eiaha oe e tavaha i te puaatoro oni” (9)

    • ‘Ua ati au ia ore au ia poro!’ (16)

    • Rave i te mau mea atoa no te tauturu i te taata atoa (19-23)

    • Haavî ia ’na iho i roto i te hororaa no te ora (24-27)

9  E ere anei au i te taata tiamâ? E ere anei au i te aposetolo? Aita anei au i ite ia Iesu to tatou Fatu? E ere anei outou i te hotu o ta ’u ohipa i roto i te Fatu?  Noa ’tu e e ere au i te aposetolo i te hi‘oraa a te tahi pae, area no outou e aposetolo iho â vau! Mai te hoê tapao ra hoi outou e haapapu ra e e aposetolo iho â vau i roto i te Fatu.  Teie atu ta ’u parau ei parururaa ia ’u i te feia e haava mai:  Eita anei e tia ia matou ia amu e ia inu* i te mea i horoahia mai?  Mai te tahi atu mau aposetolo e mai te mau taeae o te Fatu e mai ia Kepha,* eita anei e tia ia matou ia apeehia e ta matou iho vahine faaipoipo e tuahine atoa hoi?*  Aore ra o mâua Baranaba ana‘e te ore e tia ia faaea i te rave i te ohipa ei imiraa?  O vai ïa taata e aufau i ta ’na mau haamâu‘araa atoa a tavini noa ’i oia ei faehau? O vai ïa taata e tanu i te aua vine a ore atu ai e amu i te maa vine? Aore ra, o vai ïa taata e tiai i te hoê nǎnǎ mamoe a ore atu ai e inu i te tahi maa û?  E mana‘o taata noa anei ta ’u e parau atu nei aore ra te na reira atoa ra te ture a Mose?  Ua papaihia hoi i roto i te ture a Mose: “Eiaha oe e tavaha i te puaatoro oni e taataahi* i te sitona.” Te haapeapea ra anei te Atua no te puaatoro oni? 10  Aore ra te parau ra oia no tatou? No tatou mau te reira i papaihia ’i. E tia hoi i te taata e arote e te taata e taataahi i te sitona ia na reira i te rave a tiai noa ’i ia noaa mai ta ’na tuhaa. 11  I ueue na hoi matou i te mau mea pae varua i rotopu ia outou, mea ino anei ia ooti matou i te tahi mau tao‘a no ǒ mai ia outou ei tauturu ia matou? 12  Te titau ra hoi te tahi pae ia tauturu outou ia ratou, eaha ’tu â ïa ia matou nei? Noa ’tu e e tia ia matou ia na reira,* aita râ matou i na reira. Te faaoromai maite ra matou i te mau mea atoa ia ore te parau apî oaoa no nia i te Mesia ia taupupu. 13  Aita anei outou i ite e e amu te taata o te rave i te ohipa mo‘a i te maa no roto mai i te hiero, e te feia e raverave i te ohipa i te fata, e fana‘o ïa i ta ratou tuhaa o te tusia e pûpûhia i nia i te fata? 14  Oia atoa ïa, ua faaue te Fatu i te feia e poro ra i te parau apî oaoa e maoti te parau apî oaoa e tamaa ’i ratou. 15  Tera râ, aita roa ’tu vau i titau noa ’‘e i teie mau faanahoraa. Inaha, aita vau i papai i teie mau parau ia na reirahia mai au, mea maitai a‘e na ’u e pohe i te ere i te tumu e haapeu ai au! 16  E teie nei, ia faaite au i te parau apî oaoa, aita e tumu e haapeu ai au, e mea titauhia hoi ia na reira vau. Oia mau, ua ati au ia ore au ia faaite i te parau apî oaoa! 17  Ia na reira vau ma te aau tae, e haamaitairaa ta ’u. Tera râ, ia faaite noa ’tu vau i te reira, aita râ to ’u aau i tae, e hopoia noa iho â tera tei horoahia mai ia ’u. 18  Eaha ïa ta ’u haamaitairaa? Ia faaite hoi au i te parau apî oaoa, te pûpû atu ra ïa vau i te reira ma te tamoni ore, eiaha vau ia faaohipa roa i teie mana to ’u ei taata poro. 19  E ere au i te tîtî no te tahi noa ’‘e taata, ua faariro râ vau ia ’u iho ei tavini na te taata atoa, ia noaa mai ia ’u e rave rahi â taata. 20  I te ati Iuda, ua riro vau mai te ati Iuda ra ia noaa mai ia ’u te ati Iuda. I te feia e auraro i te ture, noa ’tu aita vau e auraro ra i te ture, ua riro vau mai te huru ra e te auraro ra vau i te ture ia noaa ia ’u te feia e auraro i te ture. 21  I te feia aita e ture, ua riro vau mai te huru ra e aita atoa, ia noaa mai ia ’u te feia aita e ture, noa ’tu e tei raro a‘e vau i te ture i mua i te Atua e tei raro a‘e vau i te ture a te Mesia. 22  I te feia paruparu ua riro vau mai te taata paruparu ra ia noaa mai ia ’u te feia paruparu. Ua rave au i te mau mea atoa no te tauturu i te mau huru taata atoa ia ora mai vetahi o ratou. 23  Tera râ, no te parau apî oaoa e no te poro i taua parau ra ia vetahi ê i faariro ai au ia ’u mai te mau huru taata atoa. 24  Aita anei outou i ite e o te feia tata‘u atoa te horo i te hoê hororaa, tera râ, hoê ana‘e iho te haru i te re? A horo ia riro ia outou te re. 25  Hau atu â, te taata atoa e tata‘u i roto i te hoê tata‘uraa,* e haavî ratou ia ratou iho i te mau mea atoa. Mea papu, e na reira ratou ia noaa hoi te tahi hei upoo o te nehenehe e pe, area tatou, te tahi ïa hei upoo o te ore e pe. 26  No reira, aita vau e horo hanoa ra, e aita vau e moto ra mai te huru ra e te tairi ra vau i te mata‘i. 27  Tera râ, te tairi* noa nei au i to ’u iho tino, o ta ’u e faariro ei tîtî na ’u, eiaha te Atua ia faahapa ia ’u* i muri a‘e i to ’u pororaa ia vetahi ê.

Nota i raro i te api

“Aita anei to matou e mana no te amu e no te inu” na roto i te reo Heleni.
Pii-atoa-hia Petero.
Aore ra “e tiaturi atoa ra ia Iesu.”
Te raveraa teie e matara ’i te huero sitona i to ’na tumu i te taataahiraa avae aore ra i te hoê mauhaa e hutihia e te animara.
“E mana to matou no te na reira” na roto i te reo Heleni.
Aore ra “te maona atoa.”
Aore ra “faautua,” “haavî.”
Aore ra “ia ore au ia tuuhia i rapae i te hororaa.”