Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Korinetia 1, 7:1-40

HAAPOTORAA O TE MAU TUMU PARAU

  • A‘oraa no te feia taa noa e te feia faaipoipo (1-16)

  • Faaea noa mai te huru iho â i titau-manihini-hia ’i outou (17-24)

  • Te feia taa noa e te mau vahine ivi (25-40)

    • Te maitai ia faaea taa noa (32-35)

    • Faaipoipo ‘i roto noa i te Fatu’ (39)

7  E teie nei, no te pahono atu i te mau uiraa ta outou i papai mai, e mea maitai a‘e no te hoê tane eiaha ia taoto i te hoê vahine.  No te mea râ te rahi noa ’tu ra te mau peu taotoraa tia ore,* ei vahine faaipoipo ïa ta te tane tataitahi e ei tane faaipoipo ta te vahine tataitahi e tia ’i.  Ia haamâha te tane faaipoipo i te mau hinaaro o ta ’na iho vahine* e ia na reira atoa ’tu te vahine faaipoipo i ta ’na iho tane.  E ere tei te vahine faaipoipo te parau i nia i to ’na iho tino, tei ta ’na iho râ tane. Oia atoa, e ere tei te tane faaipoipo te parau i nia i to ’na iho tino, tei ta ’na iho râ vahine.  Eiaha orua ia faaere te tahi i te tahi, maori râ ia tia ia orua toopiti atoa, e no te hoê taime poto noa a faataa ’i orua i te taime no te pure. I muri a‘e, ia apiti faahou orua e tia ’i, ia ore Satani ia râmâ noa ia orua no te oreraa e vî ia orua i te faaoromai.  Tera râ, e a‘oraa noa teie ta outou e nehenehe e pee, e ere i te faaheporaa.  Te hinaaro nei hoi au e ia riro te taata atoa mai ia ’u atoa nei. Tera râ, ua horoa te Atua i te ô na te taata tataitahi, ia faaipoipo aore ra ia faaea taa noa.  E teie nei, te parau atu nei au i te feia taa noa* e i te mau vahine ivi e mea maitai a‘e no ratou ia faaea noa mai ia ’u atoa nei.  Ia ore râ ia vî ia ratou i te faaoromai, ia faaipoipo ïa, e mea maitai a‘e hoi te faaipoiporaa i te ura-noa-raa i te hinaaro. 10  Teie atu te mau faaueraa i te feia faaipoipo, e ere hoi na ’u, na te Fatu râ. Eiaha te vahine faaipoipo e faataa ê i ta ’na iho tane. 11  Tera râ, ia faataa ê noa ’tu oia, eiaha oia ia faaipoipo faahou, aore ra ia hau faahou raua ta ’na tane faaipoipo. E eiaha roa te hoê tane faaipoipo e faarue i ta ’na iho vahine. 12  I te tahi atu râ feia faaipoipohia, o vau teie e parau atu nei, e ere ïa te Fatu: Mai te peu e ua faaipoipohia te hoê taeae i te hoê vahine e ere i te tuahine i roto i te faaroo, e ua farii taua vahine ra ia noho noa raua, eiaha ïa te taeae e faarue ia ’na. 13  E mai te peu e ua faaipoipohia te hoê vahine i te hoê tane e ere i te taeae i roto i te faaroo, e ua farii taua tane ra ia noho noa raua, eiaha ïa te vahine e faarue i ta ’na iho tane. 14  No ta ’na hoi vahine faaipoipo i haamo‘ahia ’i te tane e ere i te taeae i roto i te faaroo, e no te taeae i haamo‘ahia ’i te vahine e ere i te tuahine i roto i te faaroo. Aita ana‘e, e mea viivii ïa ta outou mau tamarii. E teie nei râ, e mea mo‘a ratou. 15  Tera râ, ia faaoti te hoa faaipoipo aita i roto i te faaroo e haere ê,* ia haere ê ïa. Ia tupu noa ’tu râ te reira, eita te taeae aore ra te tuahine e faahepohia ia faaea mai, ua titau manihini hoi te Atua ia outou ia ora ma te hau. 16  E teie nei vahine faaipoipo, e nafea oe i ite ai e eita ta oe iho tane e ora mai ia oe? E teie nei tane faaipoipo, e nafea oe i ite ai e eita ta oe iho vahine e ora mai ia oe? 17  Ia ora noa te taata tataitahi ia au i te tuhaa ta Iehova* i horoa ia ’na a titau-manihini-hia ’i oia e te Atua. No reira, te horoa nei au i teie faaueraa i te mau amuiraa atoa. 18  Ua peritomehia anei te tahi a titau-manihini-hia ’i oia? Eiaha ïa to ’na peritomeraa ia faaorehia. Aita anei te tahi i peritomehia a titau-manihini-hia ’i oia? Eiaha ïa ia peritomehia. 19  O te haapaoraa i te mau faaueraa a te Atua te mea faufaa roa, eiaha râ te peritomeraa e aore ra te peritome-ore-raa. 20  Te huru iho â i titau-manihini-hia ’i te taata tataitahi, ia faaea noa ïa oia mai te reira. 21  E tîtî anei oe i to oe titau-manihini-raahia? Eiaha e haapeapea. Ia nehenehe râ oe ia faatiamâhia, ia na reirahia ïa. 22  E riro hoi te taata i titau-manihini-hia i roto i te Fatu a vai tîtî noa ’i ei taata faatiamâhia no te Fatu. E te taata atoa i titau-manihini-hia a vai tiamâ noa ’i, e riro ïa ei tavini na te Mesia. 23  Ua hoohia mai outou i te hoê hoo, eiaha faahou ïa outou ia riro ei tîtî na te taata. 24  Taeae ma, te huru iho â i titau-manihini-hia ’i te taata tataitahi, ia faaea noa ïa oia mai te reira i mua i te Atua. 25  E teie nei, no te feia aita i faaipoipo a‘enei,* aita ta ’u e faaueraa no ǒ mai i te Fatu. Tera râ, e horoa atu vau i to ’u mana‘o. No te mea ua aroha* mai te Fatu ia ’u, e nehenehe ïa outou e tiaturi i ta ’u parau. 26  No reira, i to ’u mana‘o, i te mea e e tau fifi mau teie, e mea maitai a‘e no te hoê tane ia faaea noa oia mai ta ’na e faaea nei. 27  Ua taatihia anei oe i te hoê vahine faaipoipo? Eiaha e imi i te faarue ia ’na. Ua matara anei oe i ta oe vahine faaipoipo? Eiaha e imi faahou i te vahine na oe. 28  Tera râ, ia faaipoipo noa ’tu oe, eita oe e hara. Oia atoa te feia aita i faaipoipo a‘enei,* eita ratou e hara ia faaipoipo noa ’tu ratou, e fifihia râ ratou i te tino. E hinaaro râ vau eiaha outou ia fifihia. 29  Taeae ma, te parau atoa ’tu nei au e ua poto te taime. Mai teie atu nei â, ia riro te mau tane i faaipoipohia i te vahine mai te huru ra e aita ta ratou e vahine, 30  e te feia e ta‘i ra mai te huru ra e aita ratou e ta‘i ra, e te feia e oaoa ra mai te huru ra e aita ratou e oaoa ra, e te feia e hoo mai ra mai te huru ra e aita ta ratou, 31  e te feia e faaohipa ra i te mau mea o teie nei ao, mai te huru ra e aita ratou e faaohipa roa ra i te reira, te taui ra hoi te tupuraa o teie nei ao. 32  E hinaaro hoi au eiaha outou ia haapeapea faahou. E haapeapea te tane taa noa no te ohipa a te Fatu, e nafea hoi te Fatu e nehenehe ai e mauruuru ia ’na. 33  E haapeapea râ te tane faaipoipo no te mau mea o teie nei ao, e nafea ta ’na iho vahine e nehenehe ai e mauruuru ia ’na, 34  e e feaa noa o ’na. Hau atu â, te vahine faaipoipo-ore-hia, aore ra te tamahine aita i taoto a‘enei i te tane,* e haapeapea ïa no te ohipa a te Fatu, e nafea to ’na tino e to ’na feruriraa* e mo‘a ’i. Area te vahine faaipoipo, e haapeapea ïa no te mau mea o teie nei ao, e nafea ta ’na iho tane e nehenehe ai e mauruuru ia ’na. 35  Tera râ, e parau atu vau i te reira no to outou iho maitai, eiaha no te haavî ia outou,* no te faaitoito atu râ ia rave i te mea tano e ia tavini noa i te Fatu ma te aau atoa, eiaha râ ma te aau piti. 36  Ia mana‘o râ te tahi taata e eita e vî ia ’na i te faaoromai i to ’na faaea-taa-noa-raa,* e ua mairi ana‘e to ’na taurearearaa mai te umoa tiare i uaa ra, teie ïa te tupu: Ia rave oia i ta ’na e hinaaro, eita oia e hara. Ia faaipoipo ïa. 37  Mai te peu râ aita tera hinaaro i roto i te tahi taata tei papu i roto i to ’na aau, tei ia ’na atoa hoi te parau no nia ia ’na iho a faaoti ai i roto i to ’na iho aau e faaea taa noa,* mea maitai ïa. 38  No reira ïa, ia faaipoipo te hoê taata, mea maitai. Ia faaea taa noa râ, mea maitai a‘e ïa. 39  Ua taatihia te hoê vahine faaipoipo i ta ’na iho tane a ora noa ’i ta ’na tane. Ia taoto noa ’tu râ ta ’na tane i roto i te pohe, ua tiamâ ïa te vahine i te faaipoipo atu i te tane ta ’na e hinaaro, i roto noa râ i te Fatu. 40  I to ’u râ mana‘o, mea oaoa a‘e taua vahine ra ia ore ia faaipoipo faahou. Te tiaturi nei au e tei ia ’u atoa ra te varua o te Atua.

Nota i raro i te api

A hi‘o i te titionare.
Oia hoi ia taoto te tane faaipoipo i ta ’na iho vahine.
“Te feia aita i faaipoipohia” na roto i te reo Heleni.
Aore ra “faataa ê.”
A hi‘o i te titionare.
“Paretenia” na roto i te reo Heleni, oia hoi te feia aita i taoto a‘enei i te hoê apiti.
Aore ra “aroha hamani maitai.”
“Paretenia” na roto i te reo Heleni, oia hoi te feia aita i taoto a‘enei i te hoê apiti.
“Paretenia” na roto i te reo Heleni.
Heleni peneuma. A hi‘o i te titionare.
“Eiaha no te haru ia outou i te herepata” na roto i te reo Heleni.
“Paretenia” na roto i te reo Heleni, oia hoi te feia aita i taoto a‘enei i te hoê apiti.
“Paretenia” na roto i te reo Heleni, oia hoi te feia aita i taoto a‘enei i te hoê apiti.