Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Korinetia 1, 6:1-20

HAAPOTORAA O TE MAU TUMU PARAU

  • Hororaa i te haavaraa i rotopu i te mau Kerisetiano (1-8)

  • Te feia e ore e fatu i te Faatereraa arii (9-11)

  • Faahanahana i te Atua i to outou tino (12-20)

    • “A maue ê atu i te mau peu taotoraa tia ore!” (18)

6  Ua tupu ana‘e te peapea i rotopu ia outou, eaha te tahi i mana‘o ai e horo i te tahi atu i te haavaraa a te feia parau-tia ore e eiaha râ i mua i te feia mo‘a?  Aita paha ïa outou i ite e e haava te feia mo‘a i to teie nei ao? E i te mea e e haava outou i to teie nei ao, mea aravihi mau ïa outou no te haava i te mau peapea rii, e ere anei?  Aita outou i ite e e haava tatou i te mau melahi? Eaha ’tu â ïa te mau mea o teie oraraa nei!  E i te mea e e haava mau outou i te mau mea o teie oraraa nei, eaha ïa outou i rave ai i te feia i ore i fariihia e te amuiraa ei haava no outou?  Te parau nei au i te reira no te faahaama ia outou. Eaha, aita anei ïa hoê a‘e taata feruriraa paari te nehenehe e haava i rotopu i to ’na mau taeae?  Aita râ. Te horo ra te taeae i te taeae i te haavaraa, e hau atu â, na te feia aita e tiaturi ra ia Iesu e haava ia raua!  Oia mau, mea haama roa no outou ia horo te tahi i te tahi i te haavaraa. No te aha e ore ai e faaoromai noa i te ino? No te aha e ore ai e vaiiho noa ia faaerehia outou?  Aita. O outou iho râ te hamani ino ra e te faaere ra, e hau atu â, i to outou iho mau taeae!  Eaha! Aita outou i ite e eita te feia parau-tia ore e fatu i te Faatereraa arii a te Atua?* Eiaha outou e vare.* Eita roa ’tu te feia o te rave i te mau peu taotoraa tia ore,* e te haamori idolo, e te faaturi, e te tane e haapeu vahine, e te tane e taoto i te tane, 10  e te eiâ, e te nounou, e te inu ava, e te parau ino,* e te taviri taata, eita roa ’tu ïa e fatu i te Faatereraa arii a te Atua. 11  Mai te reira na hoi vetahi o outou. Ua tamâ-roa-hia râ outou, e ua haamo‘ahia, e ua faarirohia ei taata parau-tia i te i‘oa o te Fatu ra o Iesu Mesia e na roto i te varua o to tatou Atua. 12  No ’u, e mea tia ana‘e te mau mea atoa, eita râ te taata e faufaahia i te mau mea atoa. No ’u, e mea tia ana‘e te mau mea atoa, eita râ vau e vaiiho ia faaterehia vau e te tahi noa ’‘e mea.* 13  No te opu te maa e no te maa te opu, e haamou râ te Atua i te reira. E ere te tino no te rave i te mau peu taotoraa tia ore,* no te rave râ i te ohipa a te Fatu, e e aupuru te Fatu i te tino. 14  Ua faatia mai râ te Atua i te Fatu, e na roto i to ’na mana, e faatia atoa mai oia ia tatou mai te pohe mai. 15  Aita anei outou i ite e e mero to outou mau tino o to te Mesia ra tino? Nafea ïa, e faataa ê anei au i te mau mero o te tino o te Mesia a taati atu ai i te reira i te hoê vahine taiata? Eiaha roa ’tu! 16  Aita anei outou i ite e te taata i ati atu i te hoê vahine taiata, ua riro ïa ei tino hoê e taua taiata ra? Te parau ra hoi te Atua, “e riro raua ei hoê.” 17  Te taata râ tei hoê e te Fatu, hoê â ïa mana‘o* to raua. 18  A maue ê atu i te mau peu taotoraa tia ore!* Eita hoi te tahi atu hara e tuino i te tino, area râ o te rave i te mau peu taotoraa tia ore, te hara ra ïa i to ’na iho tino. 19  Aita anei outou i ite e to outou tino, o te hiero ïa o te varua mo‘a o te Atua e vai ra i roto ia outou? E ere atoa outou no outou iho, 20  no te mea ua hoohia mai outou i te hoê hoo. No reira, e faahanahana ïa i te Atua i to outou tino.

Nota i raro i te api

Aore ra “Basileia o te Atua.”
Aore ra “ia haavarehia.”
A hi‘o i te titionare.
Aore ra “tuhi.”
Aore ra “ia mana te tahi noa ’‘e mea i nia ia ’u.”
A hi‘o i te titionare.
Heleni peneuma. A hi‘o i te titionare.
A hi‘o i te titionare.