Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Korinetia 1, 4:1-21

HAAPOTORAA O TE MAU TUMU PARAU

  • Ei tiaau haapao maitai (1-5)

  • Haehaa o te mau tavini Kerisetiano (6-13)

    • “Eiaha ia na nia ’tu i tei papaihia” (6)

    • E mataitairaa te mau Kerisetiano na to te ao (9)

  • Haapeapea ra Paulo no ta ’na mau tamarii pae varua (14-21)

4  E mea tia ia riro matou i mua i te taata mai te mau tauturu o te Mesia* e mai te mau tiaau o te mau parau huna mo‘a a te Atua.  No reira, tei titauhia i te mau tiaau, ia rave ïa i ta ratou ohipa ma te haapao maitai.  E teie nei, aita vau e tâu‘a roa ra ia haava mai outou aore ra te hoê tiripuna a te taata, ia ’u. O vau atoa nei hoi, aita vau e haava ra ia ’u iho.  Aita hoi au e ite ra i te tahi mea o te faahapa ra ia ’u. E ere râ no te reira e taata parau-tia ’i au. Na Iehova* e haava mai ia ’u.  Hau atu â, eiaha e haava i te taata hou te taime tano ra e ia tae roa mai te Fatu. E tuu oia i te mau mea huna o te poiri i te maramarama e e faaite oia i te mau opuaraa o te aau. E fana‘o ïa te taata tataitahi i te haamaitairaa e au ia ’na no ǒ mai i te Atua.  Taeae ma, hau atu â, ua faaau vau i teie mau parau no ’u e no Apolo no to outou maitai, ia ite outou i teie ture: “Eiaha ia na nia ’tu i tei papaihia,” ia ore ïa outou ia faaoru a mana‘o ai mea hau a‘e te tahi i te tahi atu.  Eaha oe e hau ê ai i te tahi atu? Oia, e aha ta oe, e ere i te mea horoahia mai? E i te mea hoi mea horoahia mai, eaha ïa ta oe e teoteo ra mai te huru ra e e ere i te mea horoahia mai?  Ua mâha a‘enei outou? Ua tao‘a-rahi-hia a‘enei outou? Ua faatere ê na anei outou ei arii e aita matou? Aita iho â. Ahiri hoi ua faatere ê na outou ei arii, e oaoa ïa vau, no te mea o matou atoa te faatere ei arii e o outou.  No ’u nei, e au ra e ua tuu te Atua ia matou, te mau aposetolo, i nia i te tahua no te opani i te hautiraa, mai te feia i faataahia no te pohe, e ua riro matou ei mataitairaa na to te ao, e na te mau melahi e na te mau taata atoa. 10  Ua riro matou mai te maamaa no te Mesia, area outou, mea paari ïa ia au i te Mesia. Mea paruparu matou, area outou, mea puai ïa. Te faahanahana-noa-hia ra outou, area matou, te vahavaha-noa-hia ra ïa. 11  E tae roa mai i teie hora, te poia noa ra matou e te poihâ noa ra, aita matou e ravai ra i te ahu,* te tairi-noa-hia* ra matou, te ere noa ra i te fare 12  e te tautoo noa ra i te rave i te ohipa i to matou iho rima. Ia faainohia mai, e haamaitai atu matou. Ia hamani-ino-hia mai, e faaoromai tamau matou. 13  Ia tuhihia mai, e pahono matou na roto i te mǎrû.* Ua riro matou e tae roa mai i teie nei mai te pehu o teie nei ao, mai te mau mea i faaruehia e te taata. 14  Te papai atu nei au i teie mau parau, eiaha no te faahaama ia outou, no te a‘o atu râ mai ta ’u mau tamarii herehia. 15  Ahuru tausani noa ’tu â ta outou orometua* i te Mesia, mea papu aita rea e metua tane to outou. No te mea, i te Mesia ra o Iesu, ua riro vau mai te metua no outou na roto i te parau apî oaoa. 16  No reira, te ani ru atu nei au ia outou, a pee mai i to ’u haerea. 17  Te tumu ïa e tono atu ai au ia Timoteo ia outou ra, o ta ’u tamaiti herehia hoi teie e te haapao maitai i roto i te taviniraa a te Fatu. E haamana‘o atu oia ia outou i ta ’u huru raveraa ia au i ta te Mesia* ra o Iesu, mai ta ’u atoa e haapii ra i te mau vahi atoa i roto i te mau amuiraa atoa. 18  Mea faaoru roa vetahi e te parau nei ratou, “Eita oia e haere mai.” 19  Tera râ, fatata iho â vau i te haere atu ia outou, ia tia ia Iehova.* E hinaaro vau e farerei i taua feia faaoru ra, eiaha no te faaroo i ta ratou mau parau, no te ite râ e tei ia ratou anei te puai o te Atua aore ra aita. 20  E ere hoi te Faatereraa arii a te Atua* tei te parau ra, tei te puai râ no ǒ mai i te Atua. 21  Teihea ta outou e hinaaro? Ia haere atu vau ia outou ma te tapu raau i te rima? Aore ra na roto i te here e te aau mǎrû?

Nota i raro i te api

Aore ra “tavini a te Mesia.”
A hi‘o i te titionare.
“Te vai tahaa noa ra matou” na roto i te reo Heleni.
Aore ra “moto-noa-hia.”
“Te taparuparuraa” na roto i te reo Heleni.
Aore ra “tiai.”
“To ’u mau haerea tei au i to te Mesia” na roto i te reo Heleni.
A hi‘o i te titionare.
Aore ra “Basileia o te Atua.”