Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Korinetia 1, 3:1-23

HAAPOTORAA O TE MAU TUMU PARAU

  • Haapao noa ra to Korinetia i ta te tino (1-4)

  • Na te Atua e faatupu (5-9)

    • Hoa ohipa no te Atua (9)

  • Patuhia ma te faaohipa i te mau tao‘a e ore e ama i te auahi (10-15)

  • O outou te hiero o te Atua (16, 17)

  • No te Atua, mea maamaa te paari o teie nei ao (18-23)

3  Taeae ma, no reira, aita vau i nehenehe e paraparau ia outou mai ta ’u e paraparau atu i te taata e haapao i ta te varua, mai ta ’u râ e paraparau atu i te taata e haapao i ta te tino, mai i te aiû ra i te Mesia.  Ua faaamu vau ia outou i te û, eiaha râ i te maa, aita â hoi outou i paari roa ’tura. E inaha, i teie nei e ere â outou i te taata paari,  te haapao noa ra hoi outou i ta te tino. I te mea e te itehia ra i rotopu ia outou te pohehae e te tatama‘iraa, aita anei ïa outou e haapao noa ra i ta te tino? E aita anei to outou haerea e au ra i to te taata o teie nei ao?  Te parau nei hoi te tahi “No Paulo vau” area te tahi atu “O vau, no Apolo ïa.” Ia na reira outou, aita anei outou e rave ra mai te taata o teie nei ao?  Eaha hoi o Apolo? Oia mau, eaha o Paulo? E tavini raua o te rave i te ohipa ta te Fatu i horoa mai ia raua. Mea na roto ia raua i tiaturi ai outou ia Iesu.  Ua tanu vau, ua pîpî Apolo i te pape. Na te Atua râ i tamau i te faatupu.  No reira, e ere roa ’tu tei te taata tanu ra te hanahana, e ere atoa tei te taata pîpî pape ra, tei te Atua râ o te faatupu.  Hoê ana‘e hoi te taata tanu e te taata pîpî pape,* tera râ, e fana‘o raua tataitahi i ta raua haamaitairaa ia au i te ohipa ta tera e tera i rave.  E hoa ohipa hoi mâua no te Atua. O outou te aua ta te Atua e faaapu ra, te fare hoi ta te Atua e patu ra. 10  No te hamani maitai rahi o te Atua ia ’u nei, ua riro vau mai te hoê tamuta aravihi.* Ua haamau vau i te hoê niu, tera râ, ua patu te tahi atu i nia iho. E haapao maitai ana‘e ïa i te huru o ta tatou paturaa i nia i taua niu ra. 11  Eita hoi hoê noa ’‘e taata e nehenehe e haamau i te tahi atu niu i tei haamau-a‘ena-hia, oia hoi o Iesu Mesia. 12  E teie nei, ia patu te tahi i nia iho i te niu ma te faaohipa i te auro, te ario, te ofai moni rahi, te raau, te aihere mǎrô, aore ra te aeho, 13  e faaitehia mai te ohipa a te taata tataitahi ia tae mai te mahana tamataraa, na te auahi hoi e faaite mai e no te auahi e ite-roa-hia ’i te huru paturaa a te taata tataitahi. 14  Ia ore ta te taata i patu i nia i te niu ia pau i te auahi, e haamaitaihia oia. 15  Ia ninahia râ i te auahi, e pau iti rahi ïa ta ’na. Tera râ, e ora oia mai te huru ra e mea na roto mai i te auahi. 16  Aita anei outou i ite e o outou te hiero o te Atua, e te parahi ra te varua o te Atua i rotopu ia outou? 17  Ia vavahi noa ’tu te tahi i te hiero o te Atua, e haamou te Atua ia ’na, mea mo‘a hoi te hiero o te Atua e o outou taua hiero ra. 18  Eiaha te taata ia haavare ia ’na iho: Ia mana‘o noa ’tu te tahi i rotopu ia outou e e mea paari oia i te hi‘oraa a te taata o teie faanahoraa o te ao nei,* ia riro oia ei maamaa, i reira ïa e noaa ’i ia ’na te paari mau. 19  No te Atua, mea maamaa hoi te paari o teie nei ao, mai tei papaihia: “E vaiiho te Atua i te taata paari ia topa i roto i ta ratou iho marei haavarevare.” 20  Hau atu â: “Ua ite Iehova* e mea faufaa ore te huru feruriraa o te taata paari.” 21  No reira, eiaha te tahi ia teoteo i ta te taata i rave, no outou hoi te mau mea atoa, 22  o Paulo anei, o Apolo anei, o Kepha* anei, teie nei ao anei, te ora anei aore ra te pohe, te mau mea e vai nei aore ra te mau mea e haere mai, no outou te mau mea atoa. 23  Area outou, no te Mesia ïa, e te Mesia, no te Atua ïa.

Nota i raro i te api

Aore ra “Hoê â fa ta te taata tanu e te taata pîpî pape.”
Aore ra “tiaau ohipa aravihi.”
Aore ra “teie tau.” A hi‘o i te titionare.
A hi‘o i te titionare.
Pii-atoa-hia Petero.