Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Korinetia 1, 15:1-58

HAAPOTORAA O TE MAU TUMU PARAU

  • Te tia-faahou-raa o te Mesia (1-11)

  • Tia-faahou-raa, te niu ïa o te faaroo (12-19)

  • E haapapuraa te tia-faahou-raa o te Mesia (20-34)

  • Tino taata, tino varua (35-49)

  • Pohe ore e tahuti ore (50-57)

  • Ia rahi noa te ohipa i roto i te Fatu (58)

15  Taeae ma, e haamana‘o vau ia outou i te parau apî oaoa ta ’u i faaite atu, o ta outou atoa i farii e e mau papu noa ra.  E faaorahia outou ia tapea maite outou i te parau apî oaoa ta ’u i faaite atu. Aita ana‘e, ua faufaa ore to outou tiaturiraa ia Iesu.  I te mau parau faufaa atoa hoi ta ’u i haapii ia outou, o ta ’u atoa i farii, oia hoi ua pohe te Mesia no ta tatou mau hara ia au i te mau Papai,  e ua hunahia, oia mau, e i te toru o te mahana ua faatiahia mai oia ia au i te mau Papai,  fa ihora oia ia Kepha,* e i muri iho i na 12.*  Fa ’tura oia i mua hau atu e 500 taeae i te hoê â vahi. Te ora noa ra te rahiraa o ratou, area te tahi pae ra ua taoto ïa i roto i te pohe.  Fa ’tura oia ia Iakobo, e i muri iho i te mau aposetolo atoa.  I te hopea roa râ, fa atoa maira oia ia ’u mai te hoê aita â i tia ’tura te taime ia fanauhia mai.  O vau hoi te aposetolo haihai roa ’‘e, e eita e au ia parauhia vau e aposetolo, no te mea i hamani ino na vau i te amuiraa o te Atua. 10  Tera râ, ua fana‘o vau i teie toroa maoti te hamani maitai rahi o te Atua. E aita i faufaa ore to ’na hamani maitai rahi ia ’u, tera râ ua rohi au hau a‘e ia ratou paatoa, ua rohi au eiaha na roto i to ’u iho puai, na roto râ i te hamani maitai rahi o te Atua ia ’u nei. 11  No reira, na ’u anei i poro ia outou aore ra na ratou, hoê ana‘e poroi tei porohia, e mea na reira hoi outou i te tiaturiraa. 12  E teie nei, te porohia ra e ua faatiahia mai te Mesia mai roto mai i tei pohe, eaha ïa vetahi e parau ai e aita e tia-faahou-raa to te feia pohe? 13  Ahiri hoi aita iho â e tia-faahou-raa to te feia pohe, aita atoa ïa te Mesia i faatiahia mai. 14  Ahiri râ aita te Mesia i faatiahia mai, ua faufaa ore mau ta tatou pororaa e oia atoa to outou faaroo. 15  Hau atu â, ahiri eita mau te feia pohe e faatiahia mai, aita ïa te Atua i faatia mai i te Mesia. Te auraa, te haavare ra tatou no nia i te Atua a parau ai e ua faatia mai oia i te Mesia. 16  Ahiri hoi eita te feia pohe e faatiahia mai, aita atoa ïa te Mesia i faatiahia mai. 17  E ahiri aita te Mesia i faatiahia mai, ua faufaa ore to outou faaroo e te vai noa ra outou i roto i ta outou mau hara. 18  Oia atoa tei hoê e te Mesia i roto i te pohe, ua mou ratou. 19  Ahiri i roto noa i teie oraraa e tiai ai tatou i te mea maitai na roto i te Mesia, mea aroha roa ïa tatou. 20  E teie nei râ, ua faatiahia iho â te Mesia mai roto mai i tei pohe, te hotu matamua no tei taoto i roto i te pohe. 21  No te taata hoê ra i ô mai ai te pohe, oia atoa no te taata hoê e faatia-faahou-hia ’i tei pohe. 22  No Adamu hoi te taata atoa e pohe ai, no te Mesia atoa e noaa ’i i te taata atoa te ora, 23  te taata tataitahi râ ia au i to ’na iho tiaraa: te Mesia te hotu matamua, e i muri a‘e te feia no te Mesia i te tau o to ’na ho‘iraa mai.* 24  E i te hopea, e tuu oia i te Faatereraa arii* i te rima o to ’na Atua e Metua ia haamou oia i te mau faatereraa e mana e puai atoa. 25  E faatere oia ei arii e ia tuu roa mai te Atua i to ’na mau enemi atoa i raro a‘e i to ’na na avae. 26  O te pohe te enemi hopea ta ’na e haamou. 27  “Ua tuu” hoi te Atua “i te mau mea atoa i raro a‘e i to ’na na avae.” Ia parauhia râ e ‘ua tuuhia te mau mea atoa i raro a‘e ia ’na,’ e ere iho â ïa teie parau no te Atua tei tuu i te mau mea atoa i raro a‘e ia ’na. 28  Ia tuuhia râ te mau mea atoa i raro a‘e ia ’na, i reira te Tamaiti iho e auraro atoa ’i i te Atua tei tuu i te mau mea atoa i raro a‘e ia ’na, ia riro hoi te Atua ei Arii hoê roa no te mau mea atoa. 29  Ahiri e ore roa te feia pohe e faatiahia mai, eaha ïa te faufaa no te feia e bapetizohia ra i te mea e e pohe ratou? No te aha ïa ratou e bapetizohia ’i a pohe atu ai? 30  No te aha atoa hoi tatou e faaruru noa ’i i te ati?* 31  E faaruru na vau i te pohe i te mau mahana atoa. Taeae ma, e parau mau iho â te reira mai ia ’u e oaoa nei ia outou i roto i te Mesia ra o Iesu to tatou Fatu. 32  I te mea e ua aro vau i te mau animara taehae i Ephesia mai te tahi atu mau taata,* eaha te maitai no ’u? Ahiri eita te feia pohe e faatiahia mai, “e tamaa e e inu ana‘e ïa, inaha ananahi tatou e pohe ai.” 33  Eiaha outou ia vare. E ino te haerea maitai i te amuimuiraa i te feia iino. 34  A ara mai ma te rave i te parau-tia e eiaha e rave i te hara, aita hoi te tahi pae i ite i te Atua. Te parau atu nei au i te reira ia haama outou. 35  Tera râ, e parau mai paha te tahi: “Nafea te feia pohe e faatiahia mai ai? Oia hoi, i teihea huru tino e tia mai ai ratou? 36  Auê oe i te maamaa! Eita te mea ta oe e ueue e ora mai ia ore te reira ia pohe na mua. 37  Ia ueue oe, eita oe e ueue i te raau* o te tupu, e ueue râ oe i te huero, e sitona anei aore ra te tahi atu huru huero. 38  Na te Atua râ e faatupu i te huero mai tei au ia ’na e mai tei au i te tupuraa o tera e tera huero. 39  E ere hoê â huru te i‘o atoa, mea ê hoi to te huitaata, mea ê to te puaatoro, mea ê to te manu e mea ê to te i‘a. 40  E tino ê to te mau mea e vai ra i nia i te ra‘i i to tei nia i te fenua. E anaana ê to te mau mea e vai ra i nia i te ra‘i i to tei nia i te fenua. 41  E anaana ê hoi to te mahana i to te ava‘e e i to te mau fetia atoa. Oia mau, e anaana taa ê to te hoê fetia i to te tahi atu. 42  Hoê â atoa e te tia-faahou-raa o te feia pohe. E ueuehia ei mea tahuti, e faatiahia mai ei mea tahuti ore. 43  E ueuehia ei mea vahavahahia, e faatiahia mai ei mea hanahana. E ueuehia ei mea paruparu, e faatiahia mai ei mea puai. 44  E ueuehia ei tino taata, e faatiahia mai ei tino varua. Mai te peu e te vai ra te tino taata, te vai atoa ra te tino varua. 45  Mai tei papaihia: “Riro maira te taata matamua ra o Adamu ei taata* ora.” Ua riro râ te Adamu hopea ei varua o te horoa i te ora. 46  E ere te tino matamua i te tino varua. Na mua te tino taata, e i muri a‘e te tino varua. 47  No te fenua mai te taata matamua, oia hoi tei hamanihia i te repo. No te ra‘i mai te piti o te taata. 48  Mai te taata tei hamanihia i te repo, te huru atoa ïa o te feia i hamanihia i te repo. E mai ia ’na tei haere mai na te ra‘i mai, to ratou atoa ïa huru to tei parahi i nia i te ra‘i. 49  Mai ia tatou i hoho‘a i te taata i hamanihia i te repo, e hoho‘a atoa tatou i tei haere mai na te ra‘i mai. 50  Taeae ma, e parau râ vau ia outou e aita ta te tino taata* e tuhaa i roto i te Faatereraa arii a te Atua, e aita atoa ta te mea tahuti e tuhaa i roto i te mea tahuti ore. 51  Inaha, e faaite atu vau ia outou i te hoê parau huna mo‘a: Eita tatou paatoa e taoto i roto i te pohe, o tatou paatoa râ te tauihia, 52  i reira iho mai te amoraa mata ra, ia oto te pu hopea. E oto hoi te pu e e faatiahia mai tei pohe ei mea tahuti ore e e tauihia tatou. 53  E mea tia hoi i te mea tahuti ia tauihia ei mea tahuti ore, e te mea pohe ei mea pohe ore. 54  Tera râ, ia tauihia te mea tahuti ei mea tahuti ore e te mea pohe ei mea pohe ore, i reira e tupu ai te parau: “Ua horomiihia te pohe e a muri noa ’tu.” 55  Pohe, teihea ta oe re? Pohe, teihea to oe tara? 56  Te tara o te faatupu i te pohe, o te hara ïa, e te puai o te hara, o te ture a Mose ïa.* 57  Ia haamauruuruhia râ te Atua, na ’na hoi e horoa mai i te re ia tatou na roto i to tatou Fatu ra o Iesu Mesia! 58  No reira, to ’u mau taeae here, ia mau papu outou, eiaha e aueue, ia rahi noa ta outou ohipa i roto i te Fatu, ma te ite e e ere ta outou e rave i roto i te ohipa a te Fatu i te mea faufaa ore.

Nota i raro i te api

Pii-atoa-hia Petero.
Oia hoi na 12 aposetolo.
Heleni parusia. A hi‘o i te titionare.
Aore ra “Basileia.”
Aore ra “e faaruru ai i te ati i te mau taime atoa?”
Nehenehe atoa e hurihia “i ta te taata hi‘oraa.”
“Tino” na roto i te reo Heleni.
Heleni pusuke. A hi‘o i te titionare.
“Te i‘o e te toto” na roto i te reo Heleni.
Aore ra “no roto mai i te ture a Mose te puai o te hara.”