Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Korinetia 1, 14:1-40

HAAPOTORAA O TE MAU TUMU PARAU

  • Ô o te tohu e te paraparau i te reo ê (1-25)

  • Tere-maite-raa o te mau putuputuraa Kerisetiano (26-40)

    • Parahiraa o te vahine i roto i te amuiraa (34, 35)

14  A tapi i te here. Ia tamau atoa râ outou i te titau* i te mau ô a te varua mo‘a, te ô iho â râ o te tohu.  Eita e taahia te parau a te taata e paraparau ra i te hoê reo ê, o te Atua ana‘e te taa. Noa ’tu e parau huna mo‘a ta ’na e faahiti na roto i te varua mo‘a, eita atoa e taahia.  Area te taata e tohu, te faaitoito ra ïa, te tauturu ra e te tamahanahana ra i te taata i ta ’na mau parau.  Te faaitoito ra te taata e parau i te hoê reo ê ia ’na iho, area te taata e tohu, te faaitoito ra ïa i te amuiraa taatoa.  E teie nei, e hinaaro vau ia parau outou paatoa i te mau reo ěê, tera râ mea au a‘e na ’u ia tohu outou. Ia ore hoi te taata o te parau i te mau reo ěê ia auvaha* i ta ’na mau parau, mea hau a‘e ïa te taata e tohu ia itoitohia te amuiraa i te taata e parau i te mau reo ěê.  Taeae ma, ia haere noa ’tu vau ia outou a paraparau atu ai na roto i te mau reo ěê, eaha te faufaaraa no outou ia ore au ia faahiti atu i te parau ta te Atua i faaite mai, aore ra i te ite, te parau tohu e te haapiiraa?  Hoê â huru atoa ia hautihia te upaupa mai te vivo aore ra te kinura. Ahiri eita te hoê nota e taa ê i te tahi atu, e nafea e taahia ’i tei hautihia i te vivo e aore ra i te kinura?  Ia ore hoi te oto o te pu ia faaroo-papu-hia, o vai te faaineine ia ’na no te aroraa?  Oia atoa, ia ore to outou vaha ia parau i te parau ohie ia taa, eaha te taata e taa ’i i te parauhia ra? Mai te huru ra e te parau ra outou i roto i te aore. 10  E rave rau hoi reo e paraparauhia ra na te ao nei, e e taahia hoi taua mau reo atoa ra. 11  Ia ore râ vau ia taa i te auraa o te parau, no te taata e parau mai ra e taata ê ïa vau, e no ’u e taata ê atoa te taata e parau mai ra. 12  Oia atoa outou, i te mea e e hinaaro rahi to outou i te mau ô a te varua mo‘a, a titau i te mau ô e rave rahi ia itoitohia te amuiraa. 13  No reira, ia pure te taata o te parau i te hoê reo ê, ia auvaha* atoa ïa i ta ’na parau. 14  Ia pure hoi au na roto i te hoê reo ê, te pure ra vau maoti teie ô a te varua mo‘a, aita râ vau e taa ra i ta ’u e pure ra. 15  E nafea ïa vau? E pure au maoti teie ô a te varua mo‘a, tera râ, ia taa atoa ia ’u te auraa o ta ’u pure. E himene au no te arue i te Atua maoti teie ô a te varua mo‘a, tera râ ia taa atoa ia ’u te auraa o ta ’u himene arueraa i te Atua. 16  E ia pure oe i te Atua maoti teie ô a te varua mo‘a, e nafea te taata haapii-ore-hia i rotopu ia outou e parau ai “Amene” i ta oe haamaitairaa, aita hoi oia e taa ra i ta oe e parau mai ra? 17  Mea au roa iho â ta oe haamaitairaa, tera râ, aita te taata haapii-ore-hia e itoitohia ra. 18  Te haamauruuru nei au i te Atua i te mea e ua hau atu te reo ta ’u e paraparau ra i ta outou paatoa. 19  Tera râ, i roto i te hoê amuiraa, mea au a‘e na ’u e faahiti e pae parau ohie ia taa a haapii atu ai ia vetahi ê, i te faahiti 10 000 parau na roto i te hoê reo ê. 20  Taeae ma, eiaha outou ia feruri mai te tamarii rii ra, no nia râ i te ino, ia riro ïa outou mai te tamarii rii. E ia feruri outou mai te taata paari ra e tia ’i. 21  Ua papaihia i roto i te ture a Mose: “‘E parau atu vau i teie nunaa na roto i te reo o te taata ěê e na roto i te vaha o te taata ěê, e eita iho â ratou e faaroo mai ia ’u,’ te na ô mai ra Iehova.”* 22  No reira, e tapao noa te mau reo ěê no te feia aita e tiaturi ra ia Iesu, eiaha râ no tei tiaturi. Area te parau tohu, e ere ïa no te feia aita e tiaturi ra ia Iesu, no tei tiaturi râ. 23  No reira, ia putuputu mai te amuiraa taatoa i te vahi hoê ra a haamata ’tu ai ratou paatoa i te parau na roto i te mau reo ěê, eita anei te taata haapii-ore-hia aore ra te taata aita e tiaturi ra ia Iesu e parau e ua inohia to outou upoo? 24  Ia haere mai râ te taata aita e tiaturi ra ia Iesu aore ra te taata haapii-ore-hia e te tohu ra outou paatoa, e faahapa ta outou mau parau ia ’na a hi‘opoa maite atu ai oia ia ’na iho. 25  I reira e ite-roa-hia ’i te mau mea huna o to ’na aau, e tipapa oia a haamori atu ai i te Atua, e e na ô oia: “Tei rotopu mau te Atua ia outou.” 26  Taeae ma, eaha ïa te rave? Ia putuputu mai outou, e himene te hoê i te salamo, e haapiiraa ta te tahi, e faahiti te tahi atu i te parau ta te Atua i faaite mai, e reo ê ta te tahi atu, e te tahi atu, e auvaha ïa. Ia ravehia te mau mea atoa no te faaitoito te tahi i te tahi. 27  E ia parauhia mai na roto i te hoê reo ê, ia piti aore ra ia toru ana‘e iho taata, te tahi râ i muri iho i te tahi. E ia auvahahia* te parau e tia ’i. 28  Aita ana‘e e auvaha,* ia mamû te taata e parau i te hoê reo ê i roto i te amuiraa, ia paraparau noa râ oia i roto i to ’na aau i te Atua ra. 29  Ia piti aore ra ia toru a‘e taata e tohu, e tia i te tahi atu pae ia taa i te auraa o taua tohu ra. 30  Ia parau mai râ te tahi taata i ta te Atua e faaite mai ra a parahi noa ’i oia, ia mamû ïa te taata e paraparau ra i taua taime ra. 31  E nehenehe hoi outou paatoa e tohu te tahi i muri iho i te tahi, e na reira outou paatoa e haapiihia ’i e e faaitoitohia ’i. 32  E tei te taata e tohu ra te faaohiparaa ma te au i te ô a te varua mo‘a e tohu. 33  E ere te Atua i te Atua no te huanane, no te hau râ. Mai tei itehia i roto i te mau amuiraa atoa a te feia mo‘a, 34  ia mamû te mau vahine i roto i te amuiraa, eita hoi ratou e faatiahia ia parau. Tera râ, ia auraro noa ratou, mai ta te ture a Mose e parau ra. 35  Ia ore ratou ia taa i te tahi parau, ei te fare ratou e uiui ai i ta ratou iho tane faaipoipo, e mea haama hoi no te hoê vahine ia parau i te amuiraa. 36  I ǒ outou anei te matararaa mai te parau a te Atua? Aore ra, ua tae noa anei ta ’na parau ia outou ana‘e ra? 37  Ia mana‘o râ te tahi e e taata tohu oia aore ra ua horoahia mai ia ’na te ô a te varua mo‘a, ia farii oia e, te mau parau ta ’u e papai atu nei ia outou, e faaueraa ïa no ǒ mai i te Fatu. 38  Ia ore râ te tahi ia tâu‘a i te reira, e tâu‘a-ore-atoa-hia oia.* 39  No reira, to ’u mau taeae, a tutava noa i te tohu, eiaha râ e opani i te tahi ia parau i te mau reo ěê. 40  Ia ravehia râ te mau mea atoa ma te au e te naho maitai.

Nota i raro i te api

Aore ra “Ma te itoito rahi, ia titau noa outou.”
Aore ra “huri.”
Aore ra “huri.”
A hi‘o i te titionare.
Aore ra “hurihia.”
Aore ra “taata huri.”
Nehenehe atoa e hurihia “Area te ma‘ua ra, e vai ma‘ua noa iho â ïa.”