Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Korinetia 1, 12:1-31

HAAPOTORAA O TE MAU TUMU PARAU

  • Te mau ô pae varua (1-11)

  • Hoê noa tino, e rave rahi mero (12-31)

12  Taeae ma, te hinaaro nei au e haamaramarama maitai ia outou no nia i te mau ô pae varua.  Ua ite outou e i te mea e e feia outou no te mau nunaa ěê* na mua ’‘e, i vare na e i pee hanoa na outou i tera mau idolo vava a arato-noa-hia ’i outou.  No reira, te hinaaro nei au e haapapu ia outou e aore e taata e parau na roto i te varua o te Atua: “Ia vai noa te ino i nia ia Iesu!” E aore e taata e nehenehe e parau: “O Iesu te Fatu,” na roto noa râ i te varua mo‘a.  E teie nei, rau noa ’tu â te mau ô, hoê noa râ varua mo‘a,  e rau noa ’tu â te taviniraa, hoê noa râ Fatu,  e rau noa ’tu â te ohipa,* hoê noa râ Atua te tauturu i te taata atoa ia rave i taua mau ohipa atoa ra.  Tera râ, te ite-papu-hia ra te ohiparaa a te varua mo‘a i roto i te taata tataitahi no te maitai o te taata atoa.  Maoti hoi te varua mo‘a e nehenehe ai te tahi e paraparau ma te paari,* e maoti taua noa varua ra e nehenehe ai te tahi e parau ma te ite,  e maoti taua noa varua ra e nehenehe ai te tahi e faatupu i te faaroo, e te tahi atu, e faaora i te ma‘i, 10  e te tahi atu, e faatupu i te mau ohipa mana, e te tahi atu, e tohu, e te tahi atu, e haro‘aro‘a e no ǒ mai anei te tahi parau i te Atua ra aore ra eita, e te tahi atu, e paraparau na roto i te reo e rave rahi, e te tahi atu, e auvaha i te reo e rave rahi. 11  Tera râ, na taua noa â varua mo‘a ra e rave i taua mau ohipa atoa ra, i te opereraa i teie mau ô na te taata tataitahi ia au i tei hinaarohia. 12  Oia hoi, hoê noa tino, e rave rahi râ mero. E teie nei mau mero atoa, rahi noa ’tu â ratou, hoê noa râ tino. Oia atoa te Mesia. 13  Ua bapetizohia hoi tatou paatoa i taua varua mo‘a ra ia riro tatou ei tino hoê ra, te ati Iuda e te Heleni atoa, te tîtî e te tiamâ atoa, e ua niniihia mai taua varua ra i nia ia tatou paatoa. 14  Oia hoi, e ere hoê noa mero to te tino, e rave rahi râ. 15  Ia parau mai te avae, “No te mea e ere au i te hoê rima, e ere ïa vau i te hoê tuhaa o te tino,” no te reira anei e ere ai teie avae i te hoê tuhaa o te tino? 16  Ia parau mai te tari‘a, “No te mea e ere au i te hoê mata, e ere ïa vau i te hoê tuhaa o te tino,” no te reira anei e ere ai teie tari‘a i te hoê tuhaa o te tino? 17  Ahiri e mata te tino taatoa, nafea tatou e faaroo ai? Ahiri e tari‘a te tino taatoa, nafea tatou e hau‘a ’i? 18  E teie nei râ, ua tuu te Atua i te mero tataitahi o te tino i to ratou vairaa mau. 19  Ahiri hoê â te mau mero atoa, e nehenehe anei ïa e parauhia e tino? 20  E teie nei, e rave rahi mero, hoê noa râ tino. 21  Eita te mata e nehenehe e parau i te rima, “Aita to oe e faufaa no ’u,” e eita te upoo e nehenehe e parau i na avae, “Aita to orua e faufaa no ’u.” 22  Tera râ, te mau mero o te tino e au ra e mea paruparu a‘e, e mero faufaa ana‘e ïa, 23  e te mau tuhaa o te tino e au ra e e ere i te mea tura roa, o ta tatou ïa e tapo‘i maite ma te tura, ia faanehenehe-maite-hia to tatou mau tuhaa e ere i te mea nehenehe roa. 24  Area te mau tuhaa o te tino e mea nehenehe roa, aita ïa e faufaa ia faanehenehe-roa-hia. Ua faanaho te Atua i te tino ia faaturahia a‘e te mau tuhaa o te ere ra i te tura, 25  ia ore te faataa-ê-raa ia tupu i roto i te tino, tera râ, ia haapeapea te mau mero o te tino no te tahi e te tahi. 26  E ia mauiui te hoê, o te mau mero atoa o te tino te mauiui. Aore ra, ia haapopouhia te hoê, o te mau mero atoa ïa o te tino te oaoa. 27  E teie nei, o outou hoi te tino o te Mesia e e mero outou tataitahi no taua tino ra. 28  E ua faatoroa te Atua i te taata tataitahi i roto i te amuiraa: a tahi, te mau aposetolo, te piti, te mau peropheta, te toru, te mau orometua haapii, e i muri iho, te faatupuraa i te mau ohipa mana, te ô e faaora i te ma‘i, te tautururaa ia vetahi ê, te ite i te aratai e te mau reo ěê. 29  E aposetolo anei ratou paatoa? E ere! E peropheta anei ratou paatoa? E ere! E orometua haapii anei ratou paatoa? E ere! O ratou paatoa anei te faatupu i te mau ohipa mana? E ere! 30  Tei ia ratou paatoa anei te ô e faaora i te ma‘i? E ere! O ratou paatoa anei te parau na roto i te mau reo ěê? E ere! E auvaha* anei ratou paatoa? E ere! 31  A tutava noa ia noaa mai ia outou te mau ô faufaa a‘e.* E inaha, e faaite atu vau ia outou i te e‘a hau ê.

Nota i raro i te api

Oia hoi te feia aita e tiaturi ra ia Iesu.
Aore ra “huru raveraa.”
Aore ra “e horoahia mai ai te hoê poroi î i te paari i te tahi.”
Aore ra “taata huri.”
Aore ra “A tamau noa i te imi ma te itoito rahi i te mau ô faufaa a‘e.”