Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Korinetia 1, 1:1-31

HAAPOTORAA O TE MAU TUMU PARAU

  • Aroharaa (1-3)

  • Haamauruuru Paulo i te Atua no to Korinetia (4-9)

  • A‘oraa ia tahoê (10-17)

  • O te Mesia te mana e te paari o te Atua (18-25)

  • Haapeu ia Iehova ana‘e (26-31)

1  Paulo, tei titau-manihini-hia ei aposetolo na te Mesia ra o Iesu no te hinaaro o te Atua, e o Sositene to tatou taeae,  ia outou i te amuiraa o te Atua i Korinetia tei haamo‘ahia ia riro ei hoê e te Mesia ra o Iesu e tei titau-manihini-hia ei feia mo‘a, e i te feia atoa i te mau vahi atoa o te tiaturi* ra i te i‘oa o to tatou Fatu ra o Iesu Mesia, to ratou Fatu e to tatou atoa hoi:  Ei ia outou te hamani maitai rahi e te hau no ǒ mai i te Atua ra to tatou Metua e i te Fatu ra o Iesu Mesia.  Te haamauruuru noa nei au i te Atua i to ’na horoaraa mai i te hamani maitai rahi ia outou na roto i te Mesia ra o Iesu.  Na roto ia ’na i faufaahia ’i outou i te mau mea atoa, mai te parau e te ite atoa,  e no te mea ua mau papu te poroi no nia i te Mesia i rotopu ia outou,  ia ore roa ïa outou ia ere i te hoê noa ’‘e ô, a tiai ru noa ’i ia faaitehia mai to tatou Fatu ra o Iesu Mesia.  E haapuai atoa te Atua ia outou e tae noa ’tu i te hopea, ia ore outou ia pari-noa-hia a‘e i te mahana o to tatou Fatu ra o Iesu Mesia.  E Atua haapao maitai oia tei titau manihini ia outou no te amui* atu i ta ’na Tamaiti ra o Iesu Mesia, to tatou Fatu. 10  Taeae ma, te ani ru nei au ia outou na roto i te i‘oa o to tatou Fatu ra o Iesu Mesia ia tu ta outou mau parau e eiaha e faatupu i te amahamaha i rotopu ia outou. Ia tahoê-maite-hia râ outou i te hoê â feruriraa e i te hoê â aratairaa mana‘o. 11  To ’u mau taeae, ua faaite mai vetahi no te utuafare o Heloe e e aimârôraa tei rotopu ia outou. 12  Oia hoi, te parau nei outou: “No Paulo vau,” “O vau nei râ, no Apolo ïa,” “O vau, no Kepha”* “O vau râ, no te Mesia ïa.” 13  Ua amaha anei te Mesia? Eaha, o Paulo anei tei patitihia i nia i te pou no outou? Aore ra, i te i‘oa o Paulo anei outou i te bapetizoraahia? 14  Te haamauruuru nei au i te Atua i te mea e aita hoê o outou i bapetizohia e au, o Kerisepo ana‘e râ raua Gaio, 15  ia ore te tahi i rotopu ia outou ia parau e ua bapetizohia oia i to ’u nei i‘oa. 16  E! Ua bapetizo atoa vau i te utuafare o Setephana. Aita râ vau e haamana‘o ra e ua bapetizo anei au i te tahi atu. 17  Ua tono hoi te Mesia ia ’u, eiaha no te bapetizo atu, no te faaite râ i te parau apî oaoa,* e eiaha na roto i te parau a te feia ite* a haafaufaa-ore-hia ’tu ai te pohe o te Mesia i nia i te pou haamauiuiraa.* 18  No te feia e pohe ra, e mea maamaa te parau o te pou haamauiuiraa,* no tatou râ o te faaorahia ra e te Atua, o te mana ïa o te Atua. 19  Ua papaihia hoi: “E faaore au i te paari o te taata paari, e te maramarama o te taata maramarama, o ta ’u ïa e faarue.”* 20  Teihea te taata paari? Teihea te papai parau?* Teihea te taata mârô o teie faanahoraa o te ao nei?* Aita anei te Atua i faariro i te paari o teie nei ao ei mea maamaa? 21  Ia au hoi i te paari o te Atua, aita i noaa i teie nei ao, na roto i to ’na iho paari, ia ite i te Atua. Ua tia râ i te Atua, na roto i te poroi ta vetahi e mana‘o ra e mea maamaa, ia faaora i te feia e tiaturi ra. 22  Te ani ra hoi te ati Iuda i te tapao e te imi ra te Heleni i te paari. 23  Area tatou, te poro nei ïa e ua haapohehia te Mesia i nia i te pou. No te ati Iuda e ofai turoriraa teie, no te mau nunaa ěê râ e parau maamaa ïa. 24  Tera râ, no te feia i titau-manihini-hia, te ati Iuda e te Heleni atoa, o te Mesia te mana e te paari o te Atua. 25  E mana‘o paha te taata e mea maamaa e te paruparu te mau mea no ǒ mai i te Atua ra. Tera râ, e mea paari e e mea puai a‘e teie mau mea ia ratou. 26  Taeae ma, ua ite hoi outou e i to te Atua titau-manihini-raa ia outou, aita rea e taata paari ia au i te tino,* e aita rea e taata puai, aita rea e taata no roto mai i te opu hui arii.* 27  Tera râ, ua maiti te Atua i te mau mea maamaa o teie nei ao no te faahaama i te taata paari. Ua maiti te Atua i te mau mea paruparu o teie nei ao no te faahaama i te taata puai. 28  E ua maiti te Atua i te mau mea riirii o teie nei ao e te mau mea i vahavahahia, e te mau mea aore e vai ra, no te faaore roa i te mau mea e vai nei, 29  ia ore roa te tahi* ia faatietie ia ’na i mua i te Atua. 30  No te Atua râ i hoê ai tatou e te Mesia ra o Iesu, na ’na hoi i faaite ia tatou i te paari e te parau-tia o te Atua. Na roto ia ’na i mo‘a ’i tatou, e na roto i te hoo* i tiamâ ’i tatou. 31  E ia tupu iho â mai tei papaihia: “Te taata e haapeu ra, ia haapeu ïa ia Iehova.”*

Nota i raro i te api

“Faahiti” na roto i te reo Heleni.
Aore ra “apiti.”
Pii-atoa-hia Petero.
Aore ra “evanelia.”
Aore ra “te parau faahitihia ma te aravihi.”
A hi‘o i te titionare.
A hi‘o i te titionare.
Aore ra “o ta ’u ïa e turai i te hiti.”
Oia hoi te hoê taata mea ite roa i te ture a Mose.
Aore ra “teie tau.” A hi‘o i te titionare.
Aore ra “i ta te taata hi‘oraa.”
Aore ra “utuafare tiaraa teitei.”
“Te tahi i‘o” na roto i te reo Heleni.
A hi‘o i te titionare.
A hi‘o i te titionare.