Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Kolosa 4:1-18

HAAPOTORAA O TE MAU TUMU PARAU

  • A‘oraa no te mau fatu (1)

  • “A tamau i te pure” (2-4)

  • Ei haerea paari i nia i te feia no rapae (5, 6)

  • Aroharaa hopea (7-18)

4  Outou te mau fatu, a horoa i te mea tia e te maitai i ta outou mau tîtî ma te ite e e Fatu atoa to outou i te ra‘i ra.  A tamau i te pure e eiaha e haamo‘e i te pure,* ma te haamauruuru i te Atua.  E a pure atoa no matou ia iriti te Atua i te hoê uputa no ta matou poroi ia nehenehe matou e faaite haere i te parau huna mo‘a no nia i te Mesia, i mau ai hoi au i te fare tapearaa,  e ia faaite au i te reira ma te maramarama roa mai tei tia ia ’u.  Ei haerea paari noa to outou i nia i te feia no rapae, ma te faaohipa maitai i to outou taime.*  Ei parau nehenehe noa ta outou e te tamitihia, ia ite hoi outou e nafea ia pahono i te taata tataitahi.  Na to ’u taeae here o Tuhiko, e tavini haapao maitai e e hoa tavini o te Fatu, e faaite ia outou i te parau apî no ’u.  Te tono atu ra vau ia ’na ia ite outou eaha to matou huru e ia mahanahana to outou aau.  Te haere atu ra raua Onesimo, to ’u taeae here haapao maitai no ǒ mai ia outou. Na raua e faaite ia outou i te mau mea atoa e tupu ra i ǒ nei. 10  Te aroha ’tu nei o Arisetareho, mâua to roto i te fare tapearaa nei, e te aroha atoa ’tu nei o Mareko te fetii o Baranaba (o ta matou i faaue ia farii maitai outou ia ’na ia haere noa ’tu oia), 11  e o Iesu atoa tei piihia o Iuseto, no roto mai i te feia peritomehia. O ratou ana‘e to ’u mau hoa ohipa no te Faatereraa arii a te Atua,* e ua tamahanahana* rahi mai ratou ia ’u. 12  Te arohahia nei outou e Epaphera, e tavini na te Mesia ra o Iesu no ǒ mai ia outou. Te tutava maite ra oia no outou i roto i ta ’na mau pure, ia nehenehe outou e mau papu ei taata paari i te pae varua e ma te tiaturi papu i te hinaaro atoa o te Atua. 13  Te haapapu nei hoi au e ua rohi mau oia no outou e no to Laodikea e no to Hierapoli. 14  Te aroha ’tu nei o Luka, te taote here, e oia atoa o Dema. 15  A aroha ’tu i te mau taeae i Laodikea e i te tuahine ra o Numepha e i te amuiraa e putuputu i roto i to ’na fare. 16  E ua taio-ana‘e-hia ’tu teie rata i ǒ outou, a haapao e ia taio-atoa-hia te reira i te amuiraa i Laodikea. E te rata ta ’u i hapono i to Laodikea, ia taio-atoa-hia ïa i ǒ outou. 17  A parau atoa ’tu ia Arehipo: “A haapao maitai ia rave hope roa oe i te taviniraa ta oe i farii i te Fatu ra.” 18  Te faatae atu nei au, o Paulo, i to ’u aroha ia outou ta ’u i papai i to ’u iho rima. A haamana‘o e tei roto vau i te fare tapearaa. Ei ia outou te hamani maitai rahi o te Atua.

Nota i raro i te api

“E vai ara noa i roto i te pure” na roto i te reo Heleni.
“Ma te faaherehere i te taime faataahia” na roto i te reo Heleni.
Aore ra “Basileia o te Atua.”
Aore ra “faaitoito.”