Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Kolosa 2:1-23

HAAPOTORAA O TE MAU TUMU PARAU

  • Te parau huna mo‘a a te Atua, o te Mesia ïa (1-5)

  • A ara i te feia haavare (6-15)

  • Te mea mau, o te Mesia ïa (16-23)

2  E hinaaro hoi au ia ite outou e te tutava ra vau no to outou maitai, e to Laodikea e to te feia atoa aita i ite mata ia ’u,  ia mahanahana hoi to ratou aau e ia tahoê-maitai-hia ratou i te here e ia fana‘o i te mau faufaa atoa, oia hoi to ratou maramarama-papu-raa a noaa ’i te ite mau no nia i te parau huna mo‘a a te Atua, oia hoi te Mesia.  Ua huna-maitai-hia te tao‘a rau atoa o te paari e te ite i roto ia ’na.  Te parau atu nei au i te reira ia ore outou ia hema i te mau parau haavarevare.  Noa ’tu e aita vau i ǒ outou, to ’u râ mana‘o tei ia outou ra ïa, e te oaoa nei au i te ite e mea naho maitai outou e mea papu to outou faaroo i te Mesia ra.  No reira, mai ta outou i farii i te Fatu ra o Iesu Mesia, a tamau i te auraro maite ia ’na,  ma te a‘ahia i roto ia ’na e te patuhia i nia iho ia ’na e te mau papu i te faaroo, mai tei haapiihia ia outou, e ia haamauruuru outou i te Atua no te rahi o to outou faaroo.  A ara eiaha outou ia faatîtîhia* i te haapiiraa philosopho e te haavare faufaa ore ia au i te peu tutuu a te taata e te mau mea rii a teie nei ao, eiaha râ ia au i te Mesia.  No te mea te ite-maitai-hia ra* te mau huru maitatai atoa o te Atua i roto ia ’na. 10  Ua fana‘o outou i te mau mea atoa maoti ia ’na, o ’na hoi te upoo o te faatereraa e te mana atoa. 11  No to outou hoêraa e te Mesia i peritome-atoa-hia ’i outou i te hoê peritomeraa o tei ore i ravehia e te rima taata, ua peritomehia râ outou i te peritomeraa a te Mesia ma te haapae i ta te tino hara. 12  Ua hunahia outou e o ’na atoa na roto i te hoê â bapetizoraa e to ’na, e maoti to outou hoêraa e o ’na i faatia-atoa-hia mai ai outou no to outou faaroo i te ohipa mana a te Atua, o tei faatia mai ia ’na mai roto mai i te feia pohe. 13  Hau atu â, noa ’tu e i pohe na outou no ta outou mau hapa e no to outou peritome-ore-raahia i te tino, ua faaora faahou mai te Atua ia outou e te Mesia atoa. Ua farii oia i te faaore i ta tatou mau hapa atoa 14  e ua tumâ* oia i te ture papaihia a Mose, i roto e taiohia ’i e rave rahi faaueraa o te faahapa ia tatou. Ua hopoi ê oia i te reira ma te patiti atu i nia i te pou haamauiuiraa.* 15  Maoti te pou haamauiuiraa* i pau ai te mau faatereraa e te mau mana ia ’na, e ua faariro oia ia ratou ei mataitairaa na te taata atoa, a aratai ai ia ratou mai te tîtî ra i roto i te hoê poroteraa upootiaraa. 16  No reira, eiaha te tahi noa ’‘e taata ia faahapa ia outou no nia i ta outou e amu e e inu aore ra no nia i te haapaoraa i te oroa, te ava‘e apî aore ra i te Sabati.* 17  E ata ana‘e teie mau mea no te mau mea e tupu a muri a‘e, area te mea mau ra, o te Mesia ïa. 18  Eiaha outou ia faaerehia i ta outou re e te tahi noa ’‘e taata, e mea au hoi na ’na te faahua haehaa e te haamoriraa melahi, “ma te turui i nia”* i te mau mea ta ’na i ite. E mea faaoru oia e aita e tumu mau, no to ’na huru feruriraa e au i to te taata hara, 19  e aita oia e ati maite ra i te upoo, oia hoi tei horoa i ta te tino taatoa e hinaaro e tei faatuatiati maite i te mau tuhaa atoa maoti te mau puoiraa ivi e te mau uaua, a paari mai ai te tino taatoa i te tupuraa no ǒ mai i te Atua ra. 20  I te mea e ua haapae outou i te mau mea rii a teie nei ao e ua pohe outou e te Mesia atoa, eaha ïa outou e ora ’i mai te mea ra e no teie nei ao outou, a auraro atu ai i teie mau faaueraa: 21  “Eiaha e rave noa ’tu, eiaha e tamata noa ’tu, eiaha e tapea noa ’tu,” 22  no te mau mea ïa o te riro i te pau i te amuhia e te inuhia, ia au i te mau faaueraa e te mau haapiiraa a te taata? 23  Mai te mea ra e faaueraa paari teie, i te mea e na te taata e faaoti e nafea ratou e haamori ai i te Atua, e te faahua haehaa ra ratou e te haamauiui ra i to ratou tino, aita râ te reira e tauturu ra i te taata ia patoi i te mau hinaaro o te tino.

Nota i raro i te api

Aore ra “haruhia.”
“Te parahi tino ra” na roto i te reo Heleni.
Aore ra “faaore.”
A hi‘o i te titionare.
Nehenehe atoa e hurihia “Maoti o ’na.”
A hi‘o i te titionare.
No roto mai teie parau i te peu faaroo mo‘e a te mau nunaa ěê.