Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Kolosa 1:1-29

HAAPOTORAA O TE MAU TUMU PARAU

  • Aroharaa (1, 2)

  • Haamauruururaa no te faaroo o to Kolosa (3-8)

  • Pure ia paari i te pae varua (9-12)

  • Ohipa faufaa a te Mesia (13-23)

  • To Paulo rohiraa no te amuiraa (24-29)

1  Paulo, e aposetolo na te Mesia ra o Iesu na roto i te hinaaro o te Atua, e o Timoteo to tatou taeae,  i te feia mo‘a, e taeae haapao maitai, tei hoê e te Mesia ra i Kolosa: Ei ia outou te hamani maitai rahi e te hau no ǒ mai i te Atua ra to tatou Metua.  E haamauruuru noa matou i te Atua, te Metua o to tatou Fatu ra o Iesu Mesia, ia pure matou no outou,  i te mea e ua faarooroo matou i te parau o to outou faaroo i te Mesia ra o Iesu e i to outou here i te feia mo‘a atoa,  no te tiaturiraa i faahereherehia no outou i te ra‘i. Ua faaroo outou i taua tiaturiraa ra na roto i te poroi o te parau mau, oia hoi te parau apî oaoa*  tei tae atu i ǒ outou ra. Mai te parau apî oaoa e hotu e e atutu ra na te ao atoa, o te rave-atoa-hia ïa i rotopu ia outou mai te mahana mai â i faaroo e i ite ai outou ma te papu i te hamani maitai rahi mau o te Atua.  Tera ïa tei haapiihia ia outou e Epaphera to tatou hoa tavini here e tavini haapao maitai na te Mesia no to outou maitai.  Ua faaite atoa mai oia ia matou i to outou here faatupuhia e te varua o te Atua.  Te tumu atoa ïa i ore ai matou i faaea i te pure no outou mai te mahana mai â i faarooroo ai matou i te reira, e i ore atoa ’i i faaea i te ani ia fana‘o rahi outou i te ite mau o to ’na hinaaro na roto i te paari atoa e te maramarama pae varua, 10  ia au to outou haerea ia Iehova* ia mauruuru roa oia ia outou, a faatupu noa ’i outou i te hotu na roto i te mau ohipa maitatai atoa e a rahi noa ’i to outou ite mau i te Atua. 11  E ia faaetaetahia outou i te puai atoa ia au i te hanahana o to ’na mana ia nehenehe outou ia faaruru maite na roto i te faaoromai e te oaoa, 12  a haamauruuru noa ’i i te Metua, no ’na hoi i nehenehe ai outou e fana‘o atoa i ta ’na i fafau i te feia mo‘a tei roto i te maramarama. 13  Ua faaora oia ia tatou i te mana o te poiri e ua tuu ia tatou i roto i te faatereraa arii a ta ’na Tamaiti here, 14  na roto ia ’na i tiamâ ’i tatou maoti te hoo,* oia hoi te faaoreraa i ta tatou mau hara. 15  O ’na te hoho‘a o te Atua ite-ore-hia, te matahiapo o te mau mea atoa i poietehia. 16  E mea na roto hoi ia ’na i poietehia ’i to te ra‘i atoa e to te fenua atoa, tei itehia e tei ore i itehia, e terono anei, e mana, e faatereraa aore ra e hau. Ua poietehia te mau mea atoa na roto ia ’na e no ’na. 17  Hau atu â, ua na mua oia i te mau mea atoa nei, e na roto ia ’na te mau mea atoa nei i hamanihia ’i, 18  e o ’na te upoo o te tino, oia hoi te amuiraa. O ’na te haamataraa, te matahiapo no roto mai i tei pohe, no te riro mai ei matamua i te mau mea atoa ra. 19  Ua tia hoi i te Atua ia vai te mau mea atoa i roto ia ’na, 20  e na roto ia ’na, ia faahau ïa i te mau mea atoa ia ’na ra, to te fenua e to te ra‘i atoa, ma te faatupu i te hau na roto i te toto o te Mesia i niniihia i nia i te pou haamauiuiraa.* 21  Tei te atea ê hoi outou na mua ’‘e e mai te enemi na outou no te mea tei nia noa to outou feruriraa i te ohipa ino, 22  area i teie nei, ua faahau te Atua ia tatou na roto i taua tino taata ra, maoti to ’na pohe, a tia ’tu ai outou i mua i te Atua ma te mo‘a, te tafetafeta ore e te hapa ore. 23  Tera râ, ia tamau noa outou i roto i te faaroo, ma te haamauhia e te mau papu i nia i te niu o te faaroo, ma te ore e hahi ê i te tiaturiraa o taua parau apî oaoa ra ta outou i faaroo e tei porohia i rotopu i te taata atoa i raro a‘e i te ra‘i. Ua riro vau, o Paulo, ei tavini no te poro i teie parau apî oaoa. 24  Te oaoa nei au noa ’tu e te mauiui ra vau no outou, e te mauiui nei au mai te Mesia, e ia faaruru hope roa râ vau i taua mauiui ra no te tino o te Mesia, te amuiraa. 25  Ua riro vau ei tavini no teie amuiraa ia au i te hopoia ta te Atua i horoa ia ’u no to outou maitai e poro hope roa i te parau a te Atua, 26  te parau huna mo‘a tei hunahia i te mau faanahoraa o te ao nei* i mutaa iho ra e i te mau u‘i i mutaa iho ra. I teie nei râ ua faaitehia mai i to ’na feia mo‘a, 27  tei tia i te Atua ia faaite atu i rotopu i te mau nunaa ěê i te hanahana hau ê o teie parau huna mo‘a, oia hoi te Mesia tei hoê e outou, te tiaturiraa ïa e e faahanahanahia outou e o ’na. 28  O ’na ta matou e faaite haere nei, ma te faaara e te haapii i te taata atoa i te parau paari taatoa, no te pûpû i te taata atoa i te Atua ra ei pǐpǐ na te Mesia tei paari i te pae varua. 29  No reira, te rohi nei au, i te tautooraa na roto i to ’na puai o te ohipa ra i roto ia ’u.

Nota i raro i te api

Aore ra “evanelia.”
A hi‘o i te titionare.
A hi‘o i te titionare.
A hi‘o i te titionare.
Aore ra “te mau tau.” A hi‘o i te titionare.