Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Iuda 1:1-25

HAAPOTORAA O TE MAU TUMU PARAU

  • Aroharaa (1, 2)

  • E haavahia iho â te mau orometua haavare (3-16)

    • Mârôraa Mikaela raua te Diabolo (9)

    • Parau tohu a Enoha (14, 15)

  • A tamau i te rave i te mau mea e here ai te Atua ia outou (17-23)

  • Faaho‘iraa i te hanahana i te Atua (24, 25)

 Te papai nei au o Iuda, tavini na Iesu Mesia, e taeae râ no Iakobo, i te feia tei titau-manihini-hia e tei herehia e te Atua ra te Metua, e tei faahereherehia no Iesu Mesia:  Ia rahi te aroha hamani maitai e te hau e te here no ǒ mai i te Atua ra i roto ia outou.  Taeae here ma, e hinaaro iti rahi to ’u e papai ia outou no nia i te faaoraraa ta tatou e tiai nei. Mea faufaa râ ia papai atu vau no te faaitoito ia outou ia aro u‘ana no te faaroo tei horoahia ’tu hoê roa horoaraa i te feia mo‘a.  Te tumu, ua faaô omo‘e mai te tahi mau tane i rotopu ia tatou. Ua faataa-a‘ena-hia ratou e te mau Papai no te faautuaraa. E feia faatura ore hoi ratou i te Atua e o te haafaufaa ore nei i to ’na hamani maitai rahi ma te rave i te mau peu faufau,* a taiva ’tu ai i to tatou Fatu hoê roa o Iesu Mesia tei hoo mai ia tatou.  Te hinaaro nei au e haamana‘o atu, noa ’tu e ua ite ê na outou, e i faaora na Iehova* i to ’na nunaa mai te fenua Aiphiti mai. I muri a‘e râ, ua haamou oia i tei ere i te faaroo.  E te mau melahi tei ore i mau i to ratou tiaraa matamua, ua faarue râ i to ratou iho nohoraa, ua tapea ïa te Atua ia ratou e a muri noa ’tu i roto i te poiri ta‘ota‘o no te haavaraa i te mahana rahi.  Ua rave atoa Sodoma e Gomora e te mau oire tapiri i te mau peu taotoraa tia ore* ino mau e te mau hinaaro tia ore o te tino opanihia. Ua faautuahia ratou i te auahi mure ore, a riro atu ai ei faaararaa no tatou.  Oia atoa teie mau tane tei faaô omo‘e mai, te faatupu noa nei ïa i te mana‘o hape, te haaviivii nei i te tino o vetahi ê, te vahavaha nei i te mana faatere* e te faaino nei i te feia hanahana o te Atua.  Area Mikaela te melahi rahi, i to raua te Diabolo mârôraa no nia i te tino o Mose, aita ïa i faahapa noa ’‘e ia ’na e i faaino atu. Ua na ô atu râ: “Na Iehova* e faahapa ia oe.” 10  Teie râ mau tane, te faaino nei ïa i te mau mea atoa aita ratou e taa ra. Area te mau mea atoa ta ratou e taa ra mai te animara aita to ratou e feruriraa, ta ratou ïa e rave nei e o te haaviivii nei ia ratou. 11  Ua ati ratou, ua pee hoi ratou i te haerea o Kaina, ua horo tia ’tu i roto i te hapa a Balaama tei nounou i te moni, e ua pohe i te parau orure hau a Kora. 12  I ta outou mau tamaaraa e te mau taeae, mai te mau to‘a ite-ore-hia i roto i te miti teie mau tiai, a haapao noa ’i i to ratou opu ma te mǎta‘u ore. E ata ratou o te pee hanoa i te mata‘i a ore ai e horoa mai i te ûa. E tumu raau ratou o te ore e horoa mai i te maa i te taime tano, tei pohe roa e tei iriti-tumu-hia. 13  E are miti arepurepu ratou o te hue nei i te mau hairiiri i tatahi a haama ’tu ai ratou, e fetia atoa o te tere hanoa ra e tei faataahia no te poiri ta‘ota‘o e a muri noa ’tu. 14  Ua tohu atoa Enoha, te toohitu mai ia Adamu mai â, no nia i teie mau tane a na ô ai: “Inaha, ua haere mai Iehova* e ta ’na mau ahuru tausani melahi mo‘a 15  no te haava i te taata atoa e no te faautua i te feia atoa aita e faatura ra i te Atua no ta ratou mau ohipa ino atoa i rave e no te mea ua tuhi teie mau taata rave hara i te Atua.” 16  E feia ohumu ratou, feia mutamuta no nia i to ratou huru oraraa, a haapao noa ’i i to ratou iho mau hinaaro. Te faaahaaha nei ratou, a faatietie atoa ’i ia vetahi ê* ia noaa mai ta ratou e hinaaro. 17  Outou râ, taeae here ma, a haamana‘o i te mau parau i faahiti-a‘ena-hia* e te mau aposetolo a to tatou Fatu ra o Iesu Mesia, 18  tei na ô noa ’tu na: “I te tau hopea, e tia mai te feia faaooo o te haapao noa i to ratou iho mau hinaaro ino.” 19  O ratou te faaamahamaha nei i te amuiraa, teie mau tane e haa nei mai te animara,* aita hoi te varua o te Atua* ia ratou ra. 20  Outou râ, taeae here ma, a haapuai i to outou faaroo mo‘a roa e a pure ia au i te aratairaa a te varua mo‘a, 21  a tamau ai i te rave i te mau mea e here ai te Atua ia outou, a tiai noa ’i i te aroha hamani maitai o to tatou Fatu ra o Iesu Mesia ma te tiaturi i te ora mure ore. 22  A tamau atoa i te aroha hamani maitai atu i te feia e feaa ra, 23  a faaora ia ratou ma te huti mai ia ratou mai roto mai i te auahi o te haamouraa. A tamau râ i te aroha hamani maitai ia vetahi ê e ma te mǎta‘u, a faufau* atoa ’i i te ahu tei tafetafeta i ta ratou mau ohipa ino. 24  Ei te Atua o te nehenehe e paruru ia outou ia ore ia hi‘a, a tia ’tu ai ma te hapa ore i mua i to ’na hanahana* ma te oaoa rahi, 25  ei te Atua hoê roa, to tatou Faaora na roto ia Iesu Mesia to tatou Fatu, te hanahana, te teitei, te puai e te mana mai mutaa iho mai â, i teie nei e a muri noa ’tu. Amene.

Nota i raro i te api

Aore ra “haerea haama ore.” A hi‘o i te titionare.
A hi‘o i te titionare.
A hi‘o i te titionare.
Oia hoi te Atua e te feia ta ’na i faatoroa.
A hi‘o i te titionare.
A hi‘o i te titionare.
Aore ra “a haafaahiahia atoa ’i i te feia tiaraa teitei.”
Aore ra “te mau mea i faaite-atea-hia.”
Aore ra “e rave nei i to ratou iho mau hinaaro.”
Aore ra “puai ohipa o te Atua.”
“Au ore roa” na roto i te reo Heleni.
Aore ra “i mua i to ’na aro hanahana.”