Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ioane 9:1-41

HAAPOTORAA O TE MAU TUMU PARAU

  • Faaora Iesu i te hoê matapo mai to ’na fanauraahia mai (1-12)

  • Uiui ra te mau Pharisea i te matapo i faaorahia (13-34)

  • Matapo o te mau Pharisea (35-41)

9  Te haere noa ra Iesu, ite atura oia i te hoê taata matapo mai to ’na fanauraahia mai.  Ui maira ta ’na mau pǐpǐ ia ’na: “Rabi,* o vai tei hara, teie taata aore ra to ’na na metua, i fanau-matapo-hia mai ai oia?”  Pahono atura Iesu: “Aita teie taata i hara, aita atoa to ’na na metua, na roto râ ia ’na e itehia ’i te mau ohipa a te Atua.  Ia rave tatou i te mau ohipa a tei tono mai ia ’u e tia ’i e te ao noa ra. Ua fatata hoi i te po, aore roa e taata e tia ia rave i te ohipa.  A vai noa ’i au i roto i teie nei ao, o vau te maramarama o teie nei ao.”  I muri a‘e i to ’na parauraa i te reira, tutuha ihora oia i raro, ôi a‘era i te repo e te huare, parai atura i nia i te mata o taua taata ra  e na ô atura: “A haere a horoi i to mata i te pape hopu o Siloama” (“Tonohia” te auraa). Haere atura oia, horoi ihora i to ’na mata e ho‘i maira te ite ra oia.  Na ô a‘era te feia tapiri e te feia tei ite noa na ia ’na ia taparu haere: “E ere anei teie te taata tei parahi noa na a taparu haere ai?”  Parau maira vetahi: “O ’na iho â.” Te tahi atu râ: “E ere, hoho‘a râ raua.” Na ô maira taua taata ra: “O vau iho â.” 10  Ui atura ratou: “Mea nafea ïa to oe mata i te araararaa?” 11  Pahono maira oia: “Ua ôi te taata o Iesu te i‘oa i te repo e te huare, ua parai maira i nia i to ’u mata e ua na ô maira: ‘A haere i Siloama e horoi i to mata.’ Haere atura vau, horoi ihora i to ’u mata e ite a‘era vau.” 12  Ui atura ratou: “Teihea tena taata?” Na ô maira oia: “Aita vau i ite.” 13  Aratai atura ratou i te taata e matapo na mua ’‘e i te mau Pharisea ra. 14  Teie râ, e Sabati te mahana i ôi ai Iesu i te repo e te huare, a faaaraara ’tu ai i te mata o taua taata ra. 15  Ui atoa maira te mau Pharisea ia ’na mea nafea oia i ite ai. Parau atura oia: “Ua parai oia i nia i to ’u mata i te repo e te huare ôihia, horoi ihora vau i to ’u mata e ite a‘era vau.” 16  Na ô a‘era te tahi mau Pharisea: “E ere tena taata no te Atua, no te mea aita oia e faatura ra i te Sabati.” Parau a‘era te tahi atu: “E nafea e tia ’i i te hoê taata rave hara ia rave i te semeio mai tera te huru?” Amahamaha ihora ratou. 17  Parau faahou maira ratou i taua taata ra: “Eaha ta oe e parau no ’na, na ’na hoi i faaaraara i to oe mata?” Pahono atura oia: “E peropheta oia.” 18  Teie râ aita te ati Iuda i tiaturi e e matapo oia na mua ’‘e e te ite nei oia. I to ratou noa tiiraa i to ’na na metua i tiaturi ai ratou. 19  Ui maira ratou ia raua: “Na orua teie tamaiti? E matapo o ’na i to ’na fanauraahia mai? Mea nafea ïa o ’na i ite ai i teie nei?” 20  Pahono atura na metua: “E, na mâua teie tamaiti e e matapo o ’na i to ’na fanauraahia mai. 21  Aita râ mâua i ite mea nafea to ’na iteraa i teie nei, aita atoa mâua i ite na vai i faaaraara i to ’na mata. A ui ia ’na. E ere faahou o ’na i te tamarii. Na ’na iho e pahono ia outou.” 22  Te mǎta‘u ra hoi to ’na na metua i te ati Iuda i na reira ’i raua i te parau. Ua faaau ê na hoi ratou i te parau e tiavaru i te taata o te faaite noa ’tu e o Iesu te Mesia i rapae i te sunago. 23  No reira na metua i parau ai: “E ere faahou o ’na i te tamarii. A ui ia ’na.” 24  Pii faahou maira ratou i te taata e matapo na mua ’‘e e na ô maira ia ’na: “A faahanahana i te Atua ma te faaite i te parau mau. Ua ite matou e e taata rave hara tena.” 25  Pahono atura oia: “Aita vau i ite e e taata rave hara anei o ’na. Ta ’u râ i ite, e matapo vau na mua ’‘e, i teie nei te ite ra vau.” 26  Na ô maira ïa ratou: “Ua aha o ’na ia oe? Mea nafea to ’na faaaraararaa i to oe mata?” 27  Pahono atura oia: “Ua faaite a‘ena vau ia outou, aita râ outou i faaroo mai. No te aha ïa outou e hinaaro faahou ai e faaroo i ta ’u pahonoraa? Te hinaaro ra outou e riro ei pǐpǐ na ’na?” 28  Faaino ihora ratou ia ’na e na ô maira: “E pǐpǐ oe na tera taata, matou râ, e pǐpǐ ïa na Mose. 29  Ua ite matou e ua paraparau te Atua ia Mose, teie râ taata, aita ïa matou i ite nohea mai o ’na.” 30  Pahono atura oia: “Te maere nei au e aita outou i ite nohea mai o ’na, e na ’na hoi i faaaraara i to ’u mata. 31  Ua ite tatou e eita te Atua e faaroo i te feia rave hara, te taata râ e mǎta‘u i te Atua e e rave i to ’na hinaaro, o ’na ta ’na e faaroo. 32  Aita hoi i faaroohia a‘enei e ua faaaraara te tahi taata i te mata o te hoê matapo mai to ’na fanauraahia mai. 33  Ahiri e ere o ’na i te taata no te Atua, aore roa ïa e mea e tia ia ’na ia rave.” 34  Pahono maira ratou: “Ua fanau-roa-hia oe i roto i te hara, e na oe ïa e haapii mai ia matou?” Tiavaru ihora ratou ia ’na! 35  Faaroo a‘era Iesu e ua tiavaru ratou ia ’na. I to ’na iteraa ’tu ia ’na, na ô atura oia: “Te tiaturi ra anei oe i te Tamaiti a te taata nei?” 36  Pahono maira taua taata ra: “E te Fatu, o vai ïa oia e tiaturi ai au ia ’na?” 37  Na ô atura Iesu: “Ua ite oe ia ’na, inaha te taata e paraparau nei ia oe, o ’na ïa.” 38  Parau maira oia: “E te Fatu, te tiaturi nei au ia ’na.” Tahopu ihora oia ia Iesu. 39  Na ô atura Iesu: “Ua haere mai au i roto i teie nei ao ia haavahia te taata: ia ite hoi te feia aita e ite nei, e ia riro te feia e ite nei ei matapo.” 40  Faaroo maira te mau Pharisea tei reira atoa e na ô maira ia Iesu: “E matapo atoa anei ïa matou?” 41  Na ô atura Iesu: “Ahiri e matapo outou, aita ïa e hara ta outou. Te parau nei râ outou: ‘Te ite nei matou.’ E ore ïa ta outou hara e faaorehia.”

Nota i raro i te api

“Orometua” te auraa.