Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ioane 8:12-59

HAAPOTORAA O TE MAU TUMU PARAU

  • Iesu i te Oroa patiaraa tiahapa (1-13)

  • Horoa Iesu i te haapiiraa i te oroa (14-24)

  • Mana‘o rave rau no nia i te Mesia (25-52)

  • Faaite te Metua i te parau no Iesu (12-30)

    • Iesu “te maramarama o teie nei ao” (12)

  • Tamarii a Aberahama (31-41)

    • “Na te parau mau e faatiamâ ia outou” (32)

  • Tamarii a te Diabolo (42-47)

  • Iesu e Aberahama (48-59)

8  12  Parau faahou atura Iesu i te mau taata: “O vau te maramarama o teie nei ao. O te pee mai ia ’u, e ore roa ïa e haere na te poiri, e noaa râ ia ’na te maramarama o te horoa mai i te ora.” 13  Parau maira te mau Pharisea ia ’na: “Te faaite ra oe i te parau no oe. Eita matou e tiaturi i ta oe parau.” 14  Pahono atura Iesu: “Ia faaite noa ’tu vau i te parau no ’u, e parau mau ta ’u, no te mea ua ite au nohea mai au e te haere ra vau ihea. Outou râ, aita ïa i ite nohea mai au e te haere ra vau ihea. 15  Te haava ra outou ia au i te tino.* Eita roa vau e faautua i te hoê noa ’‘e taata. 16  E ia haava noa ’tu vau, e haavaraa tia ta ’u, no te mea e ere o vau ana‘e te haava ra, o mâua râ te Metua tei tono mai ia ’u. 17  Ua papai-atoa-hia i roto i ta outou ture tei horoahia ’tu e Mose: ‘E parau mau te faaiteraa a toopiti taata.’ 18  Te faaite ra vau i te parau no ’u, e te faaite atoa ra te Metua tei tono mai ia ’u i te parau no ’u.” 19  No reira, ui a‘era ratou ia ’na: “Teihea roa ïa to oe Metua?” Pahono atura Iesu: “Aita outou i ite o vai au e o vai to ’u Metua. Ahiri outou i ite o vai au, e ite atoa ïa outou o vai to ’u Metua.” 20  Ua parau oia i te reira i te vahi to reira te mau afata moni a haapii ai oia i te taata i roto i te hiero. Aita râ hoê noa ’‘e taata i haru ia ’na, no te mea aita â to ’na taime i tae mai atura. 21  Na ô faahou atura oia i te mau Pharisea: “Te reva nei au, e imi outou ia ’u, tera râ, e feia hara noa â outou. I te vahi ta ’u e haere nei, e ore outou e tae.” 22  Parau a‘era te ati Iuda: “Te mana‘o ra anei o ’na e haapohe ia ’na i parau ai oia: ‘I te vahi ta ’u e haere nei, e ore outou e tae?’” 23  Na ô faahou atura oia: “No raro outou, no nia vau. No teie nei ao outou, e ere au no teie nei ao. 24  No reira vau i parau atu ai e e feia hara noa â outou. Ia ore outou e tiaturi e o vau te Mesia, e feia hara noa â outou.” 25  Parau maira ratou ia ’na: “O vai hoi oe?” Na ô atura Iesu: “Mâu‘a noa to ’u taime i te paraparauraa ia outou. 26  E rave rahi mea ta ’u e faahiti â no nia ia outou e ta ’u e haava. E parau mau ta tei tono mai ia ’u, e te mau mea atoa ta ’u i faaroo ia ’na ra, te parau nei ïa vau i to teie nei ao.” 27  Aita i taa ia ratou e o te Metua ta ’na e parau ra. 28  Na ô atura Iesu: “Ia faateitei outou i te Tamaiti a te taata nei e ite ai outou e o vau te Mesia e eita roa vau e rave i te tahi noa ’‘e mea mai ta ’u e hinaaro. Mai ta te Metua râ i haapii mai, o ta ’u ïa e parau. 29  Tei pihai iho ia ’u tei tono mai ia ’u. Aita oia i faarue ia ’u, no te mea e rave noa vau i te mau mea atoa e mauruuru ai o ’na.” 30  A parau ai oia i teie mau mea, e rave rahi tei tiaturi ia ’na. 31  No reira, parau faahou atura Iesu i te ati Iuda tei tiaturi ia ’na: “Ia haapao noa outou i ta ’u parau, e pǐpǐ mau ïa outou na ’u, 32  e e ite outou i te parau mau e na te parau mau e faatiamâ ia outou.” 33  Pahono maira ratou: “E tamarii matou na Aberahama e aore roa matou i riro a‘enei ei tîtî na te taata. No te aha ïa oe e parau ai: ‘E tiamâ outou’?” 34  Pahono atura Iesu: “E parau mau ta ’u e parau atu: Te taata atoa e rave i te hara, e tîtî ïa no te hara. 35  Eita atoa te tavini e parahi noa i te fare o te fatu, o te tamaiti râ te parahi tamau i reira. 36  Ia faatiamâ te Tamaiti ia outou, e tiamâ mau â outou. 37  Ua ite au e e tamarii outou na Aberahama, te imi nei râ outou i te haapohe ia ’u, no te mea aita outou e farii ra i ta ’u parau. 38  Te mau mea ta ’u i ite a ora ’i au i pihai iho i to ’u Metua ra, o ta ’u ïa e parau. Outou râ, te rave nei ïa i te mau mea ta outou i faaroo i to outou metua.” 39  Na ô maira ratou: “O Aberahama to matou metua.” Parau atura Iesu: “E tamarii outou na Aberahama, a rave ïa i te mau ohipa a Aberahama. 40  Teie râ te imi nei outou i te haapohe ia ’u, tei faaite atu i te parau mau ta ’u i faaroo i te Atua. Aita Aberahama i na reira. 41  Te rave nei outou i te mau ohipa a to outou metua.” Na ô maira ratou: “Aita matou i fanauhia i roto i te peu tia ore.* Hoê ana‘e to matou Metua, o te Atua.” 42  Parau atura Iesu: “Ahiri o te Atua to outou Metua, e here ïa outou ia ’u, na te Atua hoi i tono mai ia ’u i ǒ nei. Aita vau i haere mai na nia noa i to ’u mana‘o, na ’na râ i tono mai ia ’u. 43  Aita outou e hinaaro ra e farii i ta ’u parau, no reira outou e ore ai e taa i ta ’u e parau nei. 44  O te Diabolo to outou metua e te hinaaro ra outou e rave i te hinaaro o to outou metua. E taparahi taata oia i to ’na haamataraa,* e aita oia i mau papu i roto i te parau mau, no te mea aita te parau mau i roto ia ’na. E parau oia i te haavare no te mea mai tera iho â o ’na, e haavare e te metua no te haavare. 45  O vau nei râ, te faaite nei hoi i te parau mau, aita outou e tiaturi ra ia ’u. 46  O vai o outou e tia ia haapapu e e taata hara vau? E parau mau ta ’u e faaite ra, no te aha ïa outou e ore ai e tiaturi ia ’u? 47  Te taata no te Atua ra, e faaroo ïa i te mau parau a te Atua. Outou râ, aita ïa e faaroo ra, no te mea e ere outou i te taata no te Atua.” 48  Parau maira te ati Iuda: “Ua tano iho â ïa to matou parauraa e e taata Samaria oe e e demoni to oe, e ere anei?” 49  Pahono atura Iesu: “Aita e demoni to ’u, te faatura nei râ vau i to ’u Metua, e te faaino nei outou ia ’u. 50  Aita vau e imi nei i te faahanahana ia ’u iho, te vai nei râ te tahi o te na reira ra e o ’na te haava. 51  E parau mau ta ’u e parau atu: O te haapao i ta ’u parau, e ore roa ïa e pohe.” 52  Parau maira te ati Iuda: “I teie nei, ua papu atura ia matou e e demoni to oe. Ua pohe Aberahama e te mau peropheta atoa, e te parau nei oe: ‘O te haapao i ta ’u parau, e ore roa ïa e pohe.’ 53  Mea faufaa a‘e oe i to matou metua o Aberahama tei pohe? Ua pohe atoa te mau peropheta. O vai hoi oe?” 54  Pahono atura Iesu: “Ia faahanahana vau ia ’u iho, e hanahana faufaa ore ïa to ’u. Na to ’u Metua e faahanahana ra ia ’u, o ’na ta outou e parau ra to outou Atua. 55  Teie râ aita outou i ite o vai o ’na. O vau râ, ua ite ïa o vai o ’na. Ahiri au i parau e aita vau i ite o vai o ’na, e haavare ïa vau mai ia outou. Ua ite râ vau o vai o ’na e te haapao nei au i ta ’na parau. 56  Ua oaoa roa Aberahama to outou metua i te tiaturiraa e ite i to ’u mahana. Ua ite oia e ua oaoa.” 57  Na ô maira ïa te ati Iuda: “Aita â to oe i 50 matahiti atura, e ua ite ïa oe ia Aberahama?” 58  Pahono atura Iesu: “E parau mau ta ’u e parau atu: Aita â Aberahama i fanauhia ’tura, i vai na vau.” 59  Ohi ihora ratou i te ofai no te taora i nia ia ’na. Tapuni atura Iesu e haere atura i rapae i te hiero.

Nota i raro i te api

Aore ra “mai ta te taata e rave ra.”
Aore ra “peu taotoraa tia ore.” A hi‘o i te titionare.
Aore ra “mai te haamataraa mai â.”