Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ioane 7:1-52

HAAPOTORAA O TE MAU TUMU PARAU

  • Iesu i te Oroa patiaraa tiahapa (1-13)

  • Horoa Iesu i te haapiiraa i te oroa (14-24)

  • Mana‘o rave rau no nia i te Mesia (25-52)

7  I muri a‘e i te reira, tere* atura Iesu na Galilea, aita hoi oia i hinaaro e tere na Iudea no te mea te imi ra te ati Iuda i te haapohe ia ’na.  Tera râ, te piri mai ra te Oroa patiaraa tiahapa a te ati Iuda.  Parau maira ïa to ’na mau teina ia ’na: “A faarue i teie vahi e a haere i Iudea ia ite atoa ta oe mau pǐpǐ i te mau ohipa ta oe e rave nei.  Aore roa hoi e taata e rave huna i te tahi mea ia hinaaro oia ia itehia o ’na e te taata. Te rave ra oe i teie mau mea, a rave ïa i mua i te taata.”  Aita hoi to ’na mau teina e faatupu ra i te faaroo ia ’na.  Parau atura ïa Iesu: “Aita â to ’u taime i tae mai atura, no outou râ e tano ïa te mau taime atoa.  Aita e tumu e hae ai teie nei ao ia outou, te hae nei râ ia ’u no te mea te faaite nei au e mea ino ta ratou mau ohipa.  A pauma outou i te oroa. Eita vau e haere i taua oroa ra i teie nei, no te mea aita â to ’u taime i tae maira.”  I muri a‘e i to ’na parauraa i te reira, faaea ihora oia i Galilea. 10  Teie râ, haere atura to ’na mau teina i te oroa, i muri iho haere huna atoa ’tura oia. 11  Paimi atura te ati Iuda ia ’na i te oroa a na ô ai: “Teihea tera taata?” 12  Mea rahi hoi te paraparau mǎrû noa ra te tahi i te tahi no ’na. Te na ô ra vetahi: “E taata maitai o ’na.” Te na ô ra te tahi atu: “E ere, te haavare nei hoi oia i te nahoa.” 13  Teie râ, aita hoê a‘e e paraparau ra no ’na i mua i te taata no to ratou mǎta‘u i te ati Iuda. 14  E tae a‘era i ropu i te oroa, pauma ’tura Iesu i te hiero e haapii atura i te taata. 15  Maere ihora te ati Iuda e na ô a‘era: “Nohea mai te ite o teie taata i te mau Papai, aita hoi oia i haere i te haapiiraa?”* 16  Pahono ihora Iesu ia ratou: “E ere na ’u iho ta ’u e haapii nei, na tei tono mai râ ia ’u. 17  Ia opua te hoê taata e rave i te hinaaro o te Atua, e ite oia e no ǒ mai anei i te Atua ra ta ’u e haapii nei aore ra o to ’u iho mau mana‘o ta ’u e faahiti nei. 18  Te taata o te faahiti i to ’na iho mau mana‘o, te imi ra ïa i to ’na iho hanahana. Te taata râ o te faahanahana i tei tono mai ia ’na, e parau mau ïa ta ’na e aita e parau-tia ore i roto ia ’na. 19  Ua horoa ’tu Mose i te ture ia outou, e ere anei? Aita râ hoê a‘e o outou e haapao ra i te ture a Mose. Eaha outou e imi ai i te haapohe ia ’u?” 20  Pahono maira te nahoa: “E demoni to oe. O vai teie e imi nei i te haapohe ia oe?” 21  Na ô atura Iesu: “Hoê noa ohipa ta ’u i rave, e ua maere outou pauroa. 22  No reira Mose i horoa ’tu ai ia outou i te ture o te peritomeraa, no ǒ mai hoi i te mau tupuna e ere no ǒ mai ia Mose, e te peritome ra outou i te tamaroa i te Sabati.* 23  Ia peritome outou i te tamarii tamaroa i te Sabati ia ore te ture a Mose ia ofatihia, eaha ïa outou e hae mai ai ia ’u no to ’u faaora-roa-raa i te ma‘i o te hoê taata i te Sabati? 24  A faaea i te haava ma te haapao i te huru rapaeau, a haava râ ma te parau-tia.” 25  Parau a‘era vetahi mau taata no Ierusalema: “Teie te taata ta ratou e imi nei i te haapohe, e ere anei? 26  A hi‘o na râ, te paraparau nei oia i te vahi taata e aita ratou e parau noa ’‘e ra ia ’na. Aita paha ïa i papu i to matou mau raatira e o te Mesia teie. 27  Tatou râ, ua ite ïa nohea mai teie taata. Ia haere mai râ te Mesia, aore roa ïa e taata e ite nohea mai o ’na.” 28  Pii atura Iesu a haapii ai oia i te taata i roto i te hiero: “Ua ite outou ia ’u e ua ite outou nohea mai au. Aita vau i haere mai ia au i to ’u iho hinaaro, te vai mau nei râ tei tono mai ia ’u e aita outou i ite ia ’na. 29  Ua ite au ia ’na no te mea e tia vau no ’na, e na ’na i tono mai ia ’u.” 30  Tamata a‘era te mau raatira ati Iuda i te haru ia ’na, aita râ hoê a‘e i na reira no te mea aita â to ’na taime i tae mai atura. 31  Teie râ mea rahi o taua mau taata ra tei tiaturi ia ’na e tei na ô: “Ia tae mai te Mesia, eita e rahi a‘e ta ’na semeio e rave i ta teie taata e rave nei.” 32  Faaroo a‘era te mau Pharisea i te nahoa i te paraparau-mǎrû-raa no ’na, e tono maira te mau tahu‘a tiaau e te mau Pharisea i te mau tiai e haru ia ’na. 33  Parau atura ïa Iesu: “E parahi rii mai â vau ia outou ra hou vau a haere ai i tei tono mai ia ’u. 34  E imi outou ia ’u, e ore râ vau e itehia e outou. I te vahi ta ’u e haere, eita outou e tae.” 35  Na ô a‘era ïa te ati Iuda te tahi i te tahi: “E haere teie taata ihea, a ore atu ai oia e itehia e tatou? Te opua ra anei o ’na e haere i ǒ te mau ati Iuda tei purara i rotopu i to Heleni, a haapii atu ai i to Heleni? 36  Eaha ïa te auraa o ta ’na i parau mai: ‘E imi outou ia ’u, e ore râ vau e itehia e outou. I te vahi ta ’u e haere, eita outou e tae’?” 37  I te mahana hopea, oia hoi te mahana faufaa roa ’‘e o te oroa, tia a‘era Iesu e pii atura: “Te taata e poihâ ra, ia haere mai ïa ia ’u nei, e na ’u e horoa ’tu i te pape ia inu oia. 38  O te tiaturi ia ’u, mai ta te mau Papai e parau ra: ‘No roto roa mai ia ’na e tahe rahi mai ai te pape ora.’” 39  Teie râ te faahiti ra oia i te varua mo‘a, ta te feia e tiaturi ra ia ’na e fatata i te fana‘o. Aita â ratou i fana‘o atura i te reira, no te mea aita â Iesu i faahanahanahia ’tura. 40  Parau a‘era ïa vetahi o taua mau taata ra o tei faaroo i teie mau parau: “Teie mau â te peropheta i tohuhia na.” 41  Na ô a‘era te tahi pae: “Teie te Mesia.” Te tahi atu râ: “E ere te Mesia no ǒ mai i Galilea, e ere anei? 42  Aita anei te mau Papai i parau e no te huaai o Davida te Mesia e no ǒ mai o ’na i Betelehema te oire rii o Davida?” 43  Amahamaha ihora te nahoa no nia ia ’na. 44  Te hinaaro ra hoi vetahi o ratou e haru ia ’na, aita râ hoê a‘e i na reira. 45  I to te mau tiai ho‘iraa mai, ui atura te mau tahu‘a tiaau e te mau Pharisea: “No te aha outou i ore ai i aratai mai ia ’na?” 46  Pahono maira te mau tiai: “Aore roa e taata i paraparau a‘enei mai tera.” 47  Na ô atura te mau Pharisea: “Outou atoa tei vare i ta ’na parau? 48  Aita hoê a‘e raatira aore ra Pharisea i tiaturi ia ’na, e ere anei? 49  Teie râ mau taata aita i ite i te ture a Mose, eita roa ïa te Atua e au ia ratou.” 50  Na ô atura Nikodemo, e Pharisea tei haere ê na e hi‘o ia Iesu: 51  “Ia au i ta tatou ture, ia faautua tatou i te hoê taata, ia faaroo ïa tatou ia ’na na mua e tia ’i no te ite eaha ta ’na e rave nei, e ere anei?” 52  Pahono atura ratou: “Eaha hoi, no Galilea atoa oe? A imi na, e ite oe e aita e peropheta e tia mai no Galilea mai.”*

Nota i raro i te api

Aore ra “haere.”
Oia hoi te haapiiraa a te mau Rabi.
A hi‘o i te titionare.
Aita te irava 53 e tae atu i te pene 8 irava 11 i roto i te tahi mau papai tahito faaturahia.