Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ioane 6:1-71

HAAPOTORAA O TE MAU TUMU PARAU

  • Faatamaaraa Iesu e 5 000 tane (1-15)

  • Haereraa Iesu na nia i te miti (16-21)

  • Iesu “te maa o te horoa i te ora mau” (22-59)

  • Rave rahi tei huru ê i ta Iesu mau parau (60-71)

6  I muri a‘e i teie mau mea, fano atura Iesu i te tahi atu pae o te miti o Galilea, aore ra Tiberia.  E nahoa rahi tei apee noa ia ’na, no to ratou iteraa ia ’na i te raveraa i te mau semeio i nia i te feia ma‘i.  Haere atura ïa Iesu i nia i te hoê mou‘a e parahi ihora i reira e ta ’na atoa mau pǐpǐ.  Te piri mai ra te Pasa, te oroa a te ati Iuda.  I to Iesu hi‘oraa e iteraa i te hoê nahoa rahi e haere mai ra ia ’na, parau atura oia ia Philipa: “Ihea tatou e hoo mai ai i te faraoa* no te faatamaa i teie mau taata?”  Ua na reira Iesu i te parau no te tamata ia Philipa, ua ite hoi o ’na i ta ’na e rave.  Pahono maira Philipa: “Eita e navai e 200 denari* faraoa e noaa ’i ta te taata tataitahi maa faraoa iti.”  Parau maira hoê o ta ’na mau pǐpǐ, o Anederea te taeae o Simona Petero:  “To ǒ nei te hoê tamaiti iti e pae faraoa kerite ta ’na e e piti i‘a rii. E nafea ïa e navai ai no teie rahiraa taata?” 10  Parau atura Iesu: “A haaparahi i te taata.” Mea matie roa i tera vahi e parahi ihora ratou. Piri i te 5 000 tane to roto i taua nahoa ra. 11  Rave ihora Iesu i te mau faraoa, haamauruuru a‘era i te Atua, e opere atura na te feia e parahi ra. Opere atoa ’tura oia i te mau i‘a, amu a‘era ratou e paia ’tura. 12  I to te taata paiaraa, parau atura Iesu i ta ’na mau pǐpǐ: “A haaputu mai i te toea faraoa ia ore ia mâu‘a.” 13  Haaputu a‘era ratou i te toea faraoa o na faraoa kerite e pae ta te taata i amu e tuu ihora i roto 12 farii î maitai. 14  I to taua mau taata ra iteraa i te mau semeio ta Iesu i rave, parau a‘era ratou: “Teie mau â te peropheta o te haere mai i roto i te ao nei.” 15  No reira, reva faahou atura Iesu i nia i te mou‘a o ’na ana‘e, ua ite hoi oia e e haere mai ratou e haru ia ’na no te faaarii ia ’na. 16  E ahiahi ihora, pou atura te mau pǐpǐ a Iesu i tai, 17  haere atura i nia i te hoê poti e fano atura i Kaperenaumi. Ua poiri ê na e aita â Iesu i haere mai atura ia ratou. 18  Mea miti roa atoa no te mata‘i rahi. 19  Ua hôe ratou fatata e pae aore ra e ono kilometera i te atea,* ite atura ratou ia Iesu i te haereraa mai na nia i te miti e i te tapiriraa mai i te poti. Mehameha ihora ratou. 20  Parau atura râ Iesu ia ratou: “O vau teie, eiaha e mǎta‘u!” 21  Oaoa ihora ratou i te rave mai ia ’na i nia i te poti, e aita i maoro roa tapae atura ratou i te vahi ta ratou e fano atu. 22  E ao a‘era, ite ihora te nahoa tei faaea i tera ’tu pae o te miti e hoê ana‘e poti nainai to reira e aita Iesu i haere i nia i taua poti ra e ta ’na mau pǐpǐ. O ta ’na mau pǐpǐ ana‘e râ tei reva. 23  Teie râ tae maira te mau poti na Tiberia mai i pihai iho i te vahi i reira te nahoa i te amuraa i te faraoa i muri a‘e i to te Fatu haamauruururaa i te Atua. 24  Ite a‘era te nahoa e aita Iesu to reira e aita atoa ta ’na mau pǐpǐ. Haere atura ratou na nia i taua mau poti ra e fano a‘era i Kaperenaumi no te imi ia Iesu. 25  Ite atura ratou ia ’na i te tahi pae mai o te miti e parau a‘era ia ’na: “Rabi,* inafea oe i te taeraa mai i ǒ nei?” 26  Pahono atura Iesu: “E parau mau ta ’u e parau atu: Te imi ra outou ia ’u e ere no te mea ua ite outou i te mau semeio, no te mea râ ua amu outou i te faraoa e ua paia. 27  A rave i te ohipa eiaha no te maa o te pê, no te maa râ o te vai noa e noaa ’i te ora mure ore ta te Tamaiti a te taata nei e horoa ’tu, ua tuu hoi te Metua, te Atua iho, i ta ’na tapao i nia iho ia ’na ei faaiteraa e ua mauruuru oia ia ’na.” 28  Parau maira ratou: “Eaha ïa ta matou e rave e mauruuru ai te Atua ia matou?” 29  Pahono atura Iesu: “E mauruuru te Atua ia faatupu outou i te faaroo i tei tonohia mai e ana.” 30  Parau maira ïa ratou: “Eaha ïa ta oe e rave ei tapao ia ite matou i te reira e ia tiaturi ia oe? Eaha ta oe e rave? 31  I amu na to matou mau tupuna i te mâna i te medebara, mai tei papaihia: ‘Ua horoa mai oia i te maa no te ra‘i mai.’” 32  Na ô atura ïa Iesu: “E parau mau ta ’u e parau atu: Aita Mose i horoa na outou i te maa mau no te ra‘i mai, na to ’u râ Metua e horoa ’tu nei i te maa mau no te ra‘i mai. 33  Te maa ta te Atua e horoa mai, no te ra‘i mai ïa e e horoa te reira i te ora no to te ao nei.” 34  Parau maira ïa ratou: “E te Fatu, a horoa noa mai i teie maa na matou.” 35  Parau atura Iesu: “O vau te maa o te horoa i te ora mau. O te pee mai ia ’u, e ore roa ïa e poia faahou e o te faatupu i te faaroo ia ’u, e ore roa ïa e poihâ faahou. 36  Teie râ i parau na vau ia outou: Ua ite mai outou ia ’u e aita râ i tiaturi ia ’u. 37  Te taata atoa ta te Metua e horoa mai na ’u, e pee mai ïa ia ’u, e o te pee mai ia ’u, eita roa ïa vau e tiahi atu, 38  no te mea ua pou mai au mai te ra‘i mai no te rave, eiaha i to ’u hinaaro, i te hinaaro râ o tei tono mai ia ’u. 39  Teie te hinaaro o tei tono mai ia ’u, ia ore roa vau ia erehia i te hoê a‘e o te taata ta ’na i horoa mai, ia faatia faahou mai râ vau ia ’na i te mahana hopea. 40  Teie hoi te hinaaro o to ’u Metua, te taata o te ite i te Tamaiti e o te faatupu i te faaroo ia ’na, ia noaa ïa ia ’na te ora mure ore, e ia faatia faahou mai au ia ’na i te mahana hopea.” 41  Ohumu ihora te ati Iuda ia ’na no to ’na parauraa: “O vau te maa tei pou mai te ra‘i mai.” 42  Na ô a‘era ratou: “E ere o Iesu teie te tamaiti a Iosepha, ua ite hoi tatou i to ’na metua tane e metua vahine? Eaha ïa oia e parau ai: ‘Ua pou mai au mai te ra‘i mai’?” 43  Pahono atura Iesu: “A faaea i te ohumu. 44  E ore roa te taata e pee mai ia ’u aita ana‘e te Metua tei tono mai ia ’u e faafatata mai ia ’na ia ’u ra, e e faatia faahou mai au ia ’na i te mahana hopea. 45  Ua papaihia e te mau peropheta: ‘E haapiihia ratou pauroa e Iehova.’* Te taata tei faaroo i te Metua e tei farii i ta ’na haapiiraa, e pee mai ïa ia ’u. 46  Aita e taata i ite mata i te Metua, o vau ana‘e râ no ǒ mai i te Atua ra. O vau ana‘e tei ite mata i te Metua. 47  E parau mau ta ’u e parau atu: O te tiaturi ra, e noaa ïa ia ’na te ora mure ore. 48  O vau te maa o te horoa i te ora. 49  I amu na to outou mau tupuna i te mâna i te medebara e ua pohe hoi. 50  Te taata râ o te amu i te maa no te ra‘i mai, e ore ïa e pohe. 51  O vau te maa ora tei pou mai te ra‘i mai. Ia amu te taata i teie maa, e ora ïa e a muri noa ’tu. Inaha te maa ta ’u e horoa, o to ’u ïa tino ia ora to te ao nei.” 52  Mârô ihora te ati Iuda te tahi i te tahi a na ô ai: “Eaha hoi teie taata e horoa mai ai i to ’na tino ia amu tatou?” 53  Na ô atura Iesu: “E parau mau ta ’u e parau atu: Ia ore outou e amu i te tino o te Tamaiti a te taata nei e ia ore outou e inu i to ’na toto, aore ïa e ora i roto ia outou. 54  O te amu i to ’u tino e o te inu i to ’u toto, e noaa ïa ia ’na te ora mure ore, e e faatia faahou mai au ia ’na i te mahana hopea. 55  Inaha e maa mau to ’u tino e e inu mau to ’u toto. 56  O te amu i to ’u tino e o te inu i to ’u toto, e vai hoê noa ïa mâua. 57  Mai te Metua e ora ra e tei tono mai ia ’u e te ora ra vau maoti te Metua, oia atoa ïa te taata e amu i to ’u tino, e ora oia maoti ia ’u. 58  O te maa ïa no te ra‘i mai. E ere mai ta to outou mau tupuna i amu na e ua pohe hoi. O te amu i teie maa, e ora ïa e a muri noa ’tu.” 59  Te haapii ra hoi Iesu i te taata i roto i te hoê sunago i Kaperenaumi i parau ai oia i teie mau mea. 60  Na ô a‘era e rave rahi o ta ’na mau pǐpǐ o tei faaroo i te reira: “Mea huru ê roa teie parau, o vai hoi te farii i te reira?” 61  Teie râ ua ite Iesu e te ohumu ra ta ’na mau pǐpǐ no taua parau ra, na ô atura oia: “Te huru ê ra outou? 62  Eaha râ to outou huru ia ite outou i te Tamaiti a te taata nei ia haere i nia no reira mai o ’na? 63  Na te varua mo‘a o te Atua e horoa i te ora. Mea faufaa ore te tino. No ǒ mai te mau parau ta ’u i faahiti atu i te varua mo‘a e e horoa te reira i te ora. 64  Tera râ, aita vetahi o outou e tiaturi ra ia ’u.” Ua ite hoi Iesu mai te omuaraa mai â o vai ma aita i tiaturi ia ’na e na vai e tuu ia ’na i te rima o te enemi. 65  Na ô atura oia: “No reira vau i parau atu ai ia outou: E ore roa te taata e pee mai ia ’u aita ana‘e i faatiahia e to ’u Metua.” 66  No reira, ho‘i atura ta ’na mau pǐpǐ i ta ratou mau ohipa na mua ’‘e e aita ’tura i pee faahou ia ’na. 67  Na ô atura ïa Iesu i na 12:* “Hinaaro atoa anei outou e haere?” 68  Pahono maira Simona Petero: “E te Fatu, e haere ïa matou ia vai ra? Tei ia oe ra hoi te mau parau o te ora mure ore. 69  Ua tiaturi matou e ua ite e o oe te tavini Mo‘a a te Atua.” 70  Pahono atura Iesu: “Na ’u i maiti ia outou na 12, e ere anei? E pari haavare* râ hoê o outou.” 71  O Iuda hoi te tamaiti a Simona Isakariota ta ’na e parau ra, hoê o na 12, na ’na hoi e tuu ia Iesu i te rima o te enemi.

Nota i raro i te api

Aore ra “pane.”
A hi‘o i te titionare.
“Fatata e 25 aore ra e 30 setadia” na roto i te reo Heleni. Hoê setadia, fatata ïa 185 metera.
“Orometua” te auraa.
A hi‘o i te titionare.
Oia hoi na 12 aposetolo.
Aore ra “E diabolo.”