Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ioane 5:1-47

HAAPOTORAA O TE MAU TUMU PARAU

  • Faaorahia te hoê taata ma‘i i Betezeta (1-18)

  • Tuuhia mai te mana ia Iesu e to ’na Metua (19-24)

  • E faaroo tei pohe i te reo o Iesu (25-30)

  • Faaiteraa i te parau no nia ia Iesu (31-47)

5  I muri a‘e, i te haamataraa te hoê oroa a te ati Iuda, pauma ’tura Iesu i Ierusalema.  I Ierusalema i te pae Uputa o te mau mamoe, te vai ra te hoê pape hopu parauhia Betezeta na roto i te reo Hebera, haaatihia e pae anairaa pou.  E rave rahi taata ma‘i, matapo, piri‘o‘i e te feia ua mǎrô* to ratou rima aore ra avae e tarava ra na reira.  *——  Teie râ, to reira te hoê tane e 38 matahiti to ’na ma‘i-noa-raa.  I to Iesu iteraa ia ’na e tarava noa ra e mea maoro to ’na ma‘i-noa-raa, parau atura oia: “Hinaaro anei oe ia maitai mai oe?”  Pahono maira teie tane ma‘i: “Aita hoi ta ’u e taata no te tuu ia ’u i roto i te pape ia arepurepu te pape. E ia haere atu vau, e na mua mai te tahi atu ia ’u.”  Na ô atura Iesu: “A tia, a rave i to oe ro‘i e a haere.”  I reira iho, maitai maira taua tane ra, rave a‘era i to ’na ro‘i e haere atura. E Sabati* hoi taua mahana ra. 10  Na ô maira te ati Iuda i te tane ua ora to ’na ma‘i: “E Sabati teie, mea opanihia ia amo oe i to oe ro‘i.” 11  Tera râ, pahono atura oia: “Na te taata hoi o tei faaora i to ’u ma‘i i parau mai: ‘A rave i to oe ro‘i e a haere.’” 12  Ui maira ratou: “O vai tei parau ia oe: ‘A rave i to oe ro‘i e a haere’?” 13  Teie râ, aita te tane tei faaorahia to ’na ma‘i i ite o vai oia, no te mea ua faarue Iesu i taua vahi ra no te rahi o te taata. 14  I muri a‘e, ite atura Iesu ia ’na i roto i te hiero e parau atura: “Ua maitai mai oe. Eiaha ïa oe e hara faahou ia ore oe e roohia i te tahi mea ino roa ’tu â.” 15  Haere atura teie tane e faaite atura i te ati Iuda e na Iesu i faaora i to ’na ma‘i. 16  No reira, haapeapea a‘era te ati Iuda ia Iesu, no te mea te rave ra oia i teie mau mea i te Sabati. 17  Teie râ pahono maira Iesu ia ratou: “Te ohipa noa nei â to ’u Metua e te ohipa noa nei au.” 18  Rahi roa ’tura to te ati Iuda imiraa i te ravea no te haapohe ia ’na, no to ratou mana‘o e aita oia e faatura ra i te Sabati e te parau atoa ra o ’na e o te Atua to ’na Metua, a faafaito ai ia ’na i te Atua. 19  Pahono maira Iesu ia ratou: “E parau mau ta ’u e parau atu: Eita ta te Tamaiti e nehenehe e rave i te tahi noa ’‘e mea mai ta ’na e hinaaro, i ta ’na noa râ i ite i te Metua i te raveraa. O ta te Metua hoi e rave, o ta te Tamaiti atoa ïa e rave. 20  Mea here* roa hoi na te Metua i te Tamaiti e te faaite nei oia ia ’na i te mau mea atoa ta ’na iho e rave ra, e e faaite atu oia i te mau ohipa rahi a‘e i teie, a faahiahia ’tu ai paha outou. 21  E faatia mai hoi te Metua i tei pohe, a horoa ’tu ai i te ora, e horoa atoa ïa te Tamaiti i te ora no te feia ta ’na e hinaaro. 22  E ore hoi te Metua e haava i te taata, ua tuu atu râ oia i te Tamaiti ra i te mana taatoa no te haava, 23  ia faatura hoi te taata atoa i te Tamaiti mai ta ratou e faatura i te Metua. O te ore e faatura i te Tamaiti, e ore atoa ïa e faatura i te Metua tei tono mai ia ’na. 24  E parau mau ta ’u e parau atu: O te faaroo i ta ’u parau e o te tiaturi i tei tono mai ia ’u, e noaa ïa ia ’na te ora mure ore, e ore atoa oia e faautuahia, ua haere mai râ oia mai te pohe mai i te ora. 25  E parau mau ta ’u e parau atu: Ua fatata te taime, teie ïa te taime, e faaroo ai tei pohe i te reo o te Tamaiti a te Atua e te feia tei haapao i ta ’na parau, e ora ïa. 26  E mana hoi to te Metua no te horoa i te ora, ua horoa atoa ïa oia i taua mana ra i te Tamaiti. 27  E ua horoa atoa ’tu oia i te mana no te haava, no te mea o ’na te Tamaiti a te taata nei. 28  Eiaha ïa e maere, no te mea ua fatata te hora e faaroo ai te feia atoa i roto i te menema* i to ’na reo, 29  a haere mai ai i rapae. E tia mai te feia i rave i te mea maitai no te ora, e te feia i rave noa i te mea ino, e tia mai ïa no te haavaraa. 30  Eita ta ’u e nehenehe e rave i te tahi noa ’‘e mea mai ta ’u e hinaaro. E haava vau mai ta te Metua e parau mai e e haavaraa parau-tia ta ’u, no te mea te rave nei au eiaha i to ’u iho hinaaro, i te hinaaro râ o te Metua tei tono mai ia ’u. 31  Ia faaite au i te taata i te parau no ’u, eita ratou e tiaturi i ta ’u parau. 32  Na te tahi atu* e faaite ra i te parau no ’u, e ua ite au e e parau mau ta ’na. 33  Ua tono outou i te taata ia Ioane ra e ua faaite oia i te parau mau. 34  Tera râ, eiaha na te taata e faaite i te parau no ’u, te parau nei râ vau i teie mau mea ia fana‘o outou i te ora. 35  E au teie taata i te mori ama e anaana ra, e no te hoê taime poto i hinaaro na outou e oaoa rahi i to ’na maramarama. 36  E haapapuraa rahi a‘e ta ’u i ta Ioane, na te mau ohipa hoi ta to ’u Metua i faaue ia ’u e rave e ta ’u ïa e rave nei e haapapu mai ra e na te Metua i tono mai ia ’u. 37  Ua faaite atoa te Metua iho tei tono mai ia ’u i te parau no ’u. Aita roa outou i faaroo i to ’na reo e aita atoa i ite i to ’na aro. 38  Aita atoa ta ’na parau e vai ra i roto i to outou aau, no te mea aita outou e tiaturi nei i tei tonohia mai e ana. 39  Te hi‘opoa maite ra outou i te mau Papai, no te mea te mana‘o ra outou e na roto i te reira e noaa ’i te ora mure ore e na teie hoi mau Papai e faaite ra i te parau no ’u. 40  Tera râ, aita outou e hinaaro nei e haere mai ia ’u ra ia fana‘o outou i te ora. 41  Eiaha na te taata e faahanahana ia ’u, 42  ua ite maitai râ vau e aita outou e here ra i te Atua. 43  Ua haere mai au ma te i‘oa o to ’u Metua, aita râ outou i farii mai ia ’u. Ia haere mai te tahi taata na nia i to ’na iho i‘oa, e farii ïa outou ia ’na. 44  E nafea outou e nehenehe ai e tiaturi ia ’u, outou o te faahanahana nei te tahi i te tahi e aita e imi nei i te hanahana no ǒ mai i te Atua hoê roa? 45  Eiaha outou e mana‘o e e faahapa vau ia outou i te aro o to ’u Metua. Te vai ra te hoê taata o te faahapa ia outou, o Mose, ta outou i tiaturi na. 46  I tiaturi na iho â outou ia Mose, e tiaturi atoa ïa outou ia ’u, i papai na hoi o ’na no nia ia ’u. 47  Teie râ ia ore outou e tiaturi i te mau parau ta ’na i papai, e nafea ïa outou e tiaturi ai i ta ’u parau?”

Nota i raro i te api

Aore ra “paruparu.”
Te vai ra teie irava i roto i te tahi mau huriraa Bibilia, aita râ i roto e rave rau papai Heleni tahito fariihia.
A hi‘o i te titionare.
Heleni phileo.
“Menema haamana‘oraa” na roto i te reo Heleni.
Oia hoi te Atua.