Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ioane 3:1-36

HAAPOTORAA O TE MAU TUMU PARAU

  • Iesu e Nikodemo (1-21)

    • Fanau-faahou-hia (3-8)

    • To te Atua here rahi i to te ao (16)

  • Poroi hopea a Ioane no nia ia Iesu (22-30)

  • O te haere mai no nia mai (31-36)

3  Te vai ra te hoê Pharisea o Nikodemo te i‘oa, e raatira ati Iuda oia.  Haere maira taua taata ra ia Iesu i te po e parau maira: “Rabi,* ua ite matou e e orometua oe no ǒ mai i te Atua ra, aore roa hoi e taata e nehenehe e rave i teie mau semeio ta oe e rave nei ia ore te Atua e turu ia ’na.”  Pahono atura Iesu: “E parau mau ta ’u e parau atu: Ia ore te hoê taata e fanau-faahou-hia,* e ore oia e ite i te Faatereraa arii a te Atua.”*  Parau maira Nikodemo: “E nafea te hoê taata paari e fanau-faahou-hia mai ai? Eita oia e nehenehe e tomo faahou i roto i te opu o to ’na metua vahine, a fanau-faahou-hia mai ai, e ere anei?”  Pahono atura Iesu: “E parau mau ta ’u e parau atu: Ia ore te hoê taata e fanauhia i te pape e te varua mo‘a, e ore oia e ô i roto i te Faatereraa arii a te Atua.  Ta te tino e fanau, e tino ïa, e ta te varua mo‘a e fanau, e varua ïa.  Eiaha oe e maere i to ’u parauraa ’tu ia oe: E fanau-faahou-hia mai outou e tia ’i.  E puhi te mata‘i i te vahi ta ’na e hinaaro, e faaroo oe i te reira, aita râ oe i ite nohea mai e te haere ra ihea. Mai tera atoa no te taata ta te varua mo‘a i fanau.”  Pahono maira Nikodemo: “E nafea teie mau mea e tupu ai?” 10  Pahono atura Iesu: “E orometua oe i Iseraela, aita oe i ite i teie mau mea? 11  E parau mau ta ’u e parau atu: Ta matou i ite, o ta matou ïa e parau. E ta matou i hi‘o, o ta matou ïa e faatia, aita râ outou i farii i ta matou parau. 12  Ia parau atu vau i te mau mea o te fenua, eita outou e tiaturi mai, e nafea ïa outou e tiaturi mai ai ia parau atu vau i te mau mea o te ra‘i? 13  Aore atoa e taata i haere i nia i te ra‘i, hoê ana‘e tei pou mai te ra‘i mai, o te Tamaiti ïa a te taata nei. 14  E mai ia Mose i faateitei i te ophi i te medebara, ia faateitei-atoa-hia ïa te Tamaiti a te taata nei e tia ’i, 15  ia noaa hoi i te taata e tiaturi ia ’na te ora mure ore. 16  No to ’na here rahi i to te ao i horoa mai ai te Atua i ta ’na Tamaiti otahi ia ore ia mou te taata o te faatupu i te faaroo ia ’na, ia roaa râ te ora mure ore. 17  I tono mai hoi te Atua i ta ’na Tamaiti i te ao nei, eiaha no te haava i to te ao nei, ia ora râ to te ao nei na roto ia ’na. 18  Te taata o te faatupu i te faaroo ia ’na, e ore ïa e haavahia. Te taata e ore e faatupu i te faaroo ia ’na, ua haava-ê-hia na ïa, no te mea aita oia i faatupu i te faaroo i te i‘oa o te Tamaiti otahi a te Atua. 19  I haere mai na te maramarama i roto i te ao, o te poiri râ ta te taata i au eiaha te maramarama, mea ino hoi ta ratou mau ohipa e no reira ratou e faautuahia ’i. 20  Te taata hoi e rave ra i te mau mea ino mau, mea au ore roa na ’na te maramarama, aita atoa e haere mai ra i te maramarama ia ore hoi ia itehia ta ’na mau ohipa ino. 21  Tera râ, te taata e rave i te mea tia, e haere mai ïa i te maramarama ia itehia e ua tuati ta ’na mau ohipa i te hinaaro o te Atua.” 22  I muri a‘e i teie mau mea, haere atura Iesu e ta ’na mau pǐpǐ na te mataeinaa i Iudea, parahi ihora i reira e bapetizo atura oia i te taata. 23  Teie râ, te bapetizo atoa ra Ioane i te taata i Aino i pihai iho ia Salima, no te mea mea rahi te pape i reira, e haere noa maira te taata ia bapetizohia ratou, 24  aita â hoi Ioane i hurihia ’tura i roto i te tapearaa. 25  Mârô a‘era te mau pǐpǐ a Ioane e te hoê ati Iuda no nia i te peu tamâraa. 26  Haere maira ratou ia Ioane ra e na ô maira: “Rabi, a hi‘o na, te taata tei haere atu ia oe ra i tera pae mai o Ioridana e ta oe i faahiti, te bapetizo nei ïa i te taata e te haere nei te taata atoa ia ’na ra.” 27  Pahono atura Ioane: “E fana‘o te taata i te tahi mea mai te peu noa e mea horoahia mai no te ra‘i mai. 28  Ua ite outou e i parau na vau: E ere au i te Mesia, teie râ ua tonohia mai au ia na mua ia ’na. 29  Te taata na ’na te vahine, o te tane faaipoipo ïa. Ia tia râ te hoa o te tane faaipoipo, a faaroo atu ai i to ’na reo, e oaoa roa ïa oia. Ua hope roa ïa vau i te oaoa. 30  E haere oia i te rahiraa e tia ’i, o vau nei râ, i te itiraa ïa.” 31  O te haere mai no nia mai, ua hau a‘e ïa i te taata atoa. Te taata no te fenua nei, no te fenua nei ïa e e faahiti oia i te mau mea o te fenua nei. O te haere mai no te ra‘i mai, ua hau a‘e ïa i te taata atoa. 32  E faaite oia i ta ’na i ite e i faaroo, eita râ te taata e farii i ta ’na mau parau. 33  Te taata tei farii i ta ’na mau parau, ua haapapu ïa* e e parau mau ta te Atua. 34  O tei tonohia mai hoi e te Atua, e faahiti ïa i te mau parau a te Atua, e horoa rahi hoi oia i to ’na varua mo‘a. 35  Mea here na te Metua i te Tamaiti e ua tuu oia i te mau mea atoa i roto i to ’na rima. 36  Te taata e faatupu i te faaroo i te Tamaiti, e fana‘o ïa i te ora mure ore. Te taata e ore e faaroo i te Tamaiti, e ore ïa e ite i te ora, e vai mai râ te riri o te Atua i nia ia ’na.

Nota i raro i te api

“Orometua” te auraa.
Nehenehe atoa e hurihia “fanauhia mai nia mai.”
Aore ra “Basileia o te Atua.”
“Ua tuu ïa i ta ’na tapao” na roto i te reo Heleni.