Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ioane 21:1-25

HAAPOTORAA O TE MAU TUMU PARAU

  • Faraa Iesu i ta ’na mau pǐpǐ (1-14)

  • Haapapu Petero i to ’na here ia Iesu (15-19)

    • “A faaamu i ta ’u mau fanau‘a mamoe” (17)

  • Te ananahi o ta Iesu mau pǐpǐ here (20-23)

  • Parau faaotiraa (24, 25)

21  I muri a‘e i teie mau mea, fa faahou atura Iesu i te mau pǐpǐ i te miti o Tiberia. Mai teie to ’na faraa ’tu:  Te vai ra i reira o Simona Petero, Toma parauhia te Maehaa, Natanaela no Kana i Galilea, na tamaiti a Zebedaio e e piti pǐpǐ ê atu a Iesu.  Na ô atura Simona Petero ia ratou: “Te haere nei au e tai‘a.” Parau maira ratou: “E na muri atoa matou ia oe.” Haere atura ratou i nia i te poti, aita râ i noaa ta ratou i‘a i taua po ra.  E ao a‘era, te tia noa ra Iesu i tatahi, aita râ i taa i te mau pǐpǐ e o Iesu tera.  Na ô atura Iesu ia ratou: “Ta ’u mau tamarii here, e maa* ta outou?” Pahono maira ratou: “Aita!”  Na ô atura oia: “A taora i te upe‘a i te pae atau o te poti, e noaa ta outou i‘a.” Taora ihora ratou i te upe‘a, aita râ i haere ia ratou ia huti mai no te rahi o te i‘a.  Parau maira te pǐpǐ herehia e Iesu ia Petero: “O te Fatu!” I to Simona Petero faarooraa i taua parau ra, oomo ihora oia i to ’na ahu, aita hoi e ahu i nia iho ia ’na,* e ou‘a ’tura i roto i te miti.  Teie râ, hôe maira te tahi atu mau pǐpǐ i te poti, a huti atoa mai ai i te upe‘a ua î i te i‘a, aita hoi ratou i atea roa, piri i te 90 metera* i tai.  Tera râ, i to ratou pouraa mai, ite a‘era ratou i tatahi i te arahu e ama noa ra e te i‘a i nia iho, e te faraoa.* 10  Na ô atura Iesu: “Afai mai na maa i‘a i noaa mai nei ia outou.” 11  Haere atura Simona Petero i nia i te poti e huti maira i uta i te upe‘a ua î roa i te i‘a rarahi, 153 rahiraa. Noa ’tu râ tera rahiraa i‘a, aita te upe‘a i mutu. 12  Na ô atura Iesu: “Haere mai e tamaa.” Taiâ a‘era te mau pǐpǐ i te ui ia ’na o vai o ’na, no te mea ua ite ratou e o te Fatu tera. 13  Rave ihora Iesu i te faraoa e horoa ’tura ia ratou ra, e te i‘a atoa. 14  Teie ïa te toru o te taime i fa ’tu ai Iesu i te mau pǐpǐ i muri a‘e i to ’na faatiaraahia mai te pohe mai. 15  Paia a‘era ratou e na ô atura Iesu ia Simona Petero: “Simona tamaiti a Ioane, mea here anei na oe ia ’u hau a‘e i teie mau mea?” Parau maira Petero: “E, e te Fatu, ua ite oe e mea here* na ’u ia oe.” Na ô atura Iesu: “A faaamu i ta ’u mau fanau‘a mamoe.” 16  Na ô faahou atura oia, te piti ïa o te taime: “Simona tamaiti a Ioane, mea here anei na oe ia ’u?” Parau maira Petero: “E, e te Fatu, ua ite oe e mea here* na ’u ia oe.” Na ô atura Iesu: “A aupuru i ta ’u mau fanau‘a mamoe.” 17  Na ô atura oia, te toru ïa o te taime: “Simona tamaiti a Ioane, mea here* anei na oe ia ’u?” Oto ihora Petero i te mea e teie te toru o te taime to Iesu parauraa ’tu: “Mea here* anei na oe ia ’u?” Na ô maira Petero: “E te Fatu, ua ite oe i te mau mea atoa. Ua ite oe e mea here* na ’u ia oe.” Na ô atura Iesu: “A faaamu i ta ’u mau fanau‘a mamoe. 18  E parau mau ta ’u e parau atu: I to apîraa, na oe iho i faaahu noa na ia oe e i haere na oe i te vahi ta oe i hinaaro. Ia ruhiruhia râ oe, e toro oe i to oe na rima e na te tahi ê e faaahu ia oe e e amo ia oe i te vahi eita oe e hinaaro e haere.” 19  Te faaite atu ra hoi Iesu i teihea huru pohe e hanahana ’i te Atua. I muri iho, na ô atura oia ia Petero: “A pee noa mai ia ’u.” 20  Fariu maira Petero e ite maira i te pǐpǐ herehia e Iesu e pee mai ra ia raua. O taua pǐpǐ ra hoi tei tarava na i pihai iho ia Iesu a tamaa ’i ratou e tei na ô atu: “E te Fatu, o vai te tuu ia oe i te rima o te enemi?” 21  I to Petero iteraa i taua pǐpǐ ra, na ô maira oia ia Iesu: “E te Fatu, e teie taata ïa?” 22  Na ô atura Iesu: “Ia hinaaro vau ia faaea mai o ’na e ia ho‘i roa mai au, no te aha ïa oe e haapeapea ’i? O oe, a pee noa mai ia ’u.” 23  Tae atura te parau i te mau pǐpǐ ra e e ore taua pǐpǐ ra e pohe. E ere hoi te reira ta Iesu i parau atu, teie râ: “Ia hinaaro vau ia faaea mai o ’na e ia ho‘i roa mai au, no te aha ïa oe e haapeapea ’i?” 24  Na taua pǐpǐ ra i faaite e i papai i teie mau mea, e ua ite matou e e parau mau ta ’na i faaite. 25  Mea rahi atu â te ohipa ta Iesu i rave. Ahiri te reira i papai-pauroa-hia, i to ’u mana‘o, eita tera mau otaro papaihia e ô i te fenua nei.

Nota i raro i te api

Aore ra “e i‘a.”
Aore ra “e tihere noa hoi to ’na.”
“Piri i te 200 kubiti” na roto i te reo Heleni.
Aore ra “pane.”
Heleni phileo.
Heleni phileo.
Heleni phileo.
Heleni phileo.
Heleni phileo.