Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ioane 20:1-31

HAAPOTORAA O TE MAU TUMU PARAU

  • Aita faahou i roto i te menema (1-10)

  • Faraa Iesu ia Maria Magadala (11-18)

  • Faraa Iesu i ta ’na mau pǐpǐ (19-23)

  • Feaa Toma na mua, e papu mai ai i muri iho (24-29)

  • No te aha teie otaro i papaihia ’i? (30, 31)

20  I te mahana matamua o te hebedoma, haere atura Maria Magadala i te menema* i te poipoi roa, te poiri noa ra hoi, e ite atura e ua turai-ê-hia na te ofai e opani ra i te menema.*  Horo atura oia ia Simona Petero ra e i te tahi atu pǐpǐ mea here* na Iesu, e na ô atura ia raua: “Ua hopoi-ê-hia te Fatu mai roto atu i te menema, e aita matou i ite ihea o ’na i te tuuraahia.”  Reva ’tura Petero e te tahi atu pǐpǐ i te menema.  Haamata ’tura raua i te horo, o te tahi atu râ pǐpǐ tei tae na mua i te menema, no te mea mea vitiviti a‘e oia i te horo ia Petero.  Fâao ihora taua pǐpǐ ra i roto e ite atura i te ahu lino i reira. Aita râ oia i tomo atu.  Tae atoa maira Simona Petero, tei na muri mai ia ’na, e tomo ihora i roto i te menema. Ite atoa ’tura oia i te ahu lino i reira.  Te ahu i vehîhia ’i to Iesu upoo, aita ïa i amuihia i te tahi atu mau ahu. Ua potarohia râ a tuuhia ’tu ai i te tahi atu vahi.  Tomo atoa ’tura te pǐpǐ tei tae na mua i te menema, ite atura e tiaturi ihora.  Aita â hoi i taa ’tura ia raua tei papaihia e ia tia mai oia mai te pohe mai e tia ’i. 10  Ho‘i atura Simona Petero i ǒ ’na e te tahi atu pǐpǐ i ǒ ’na. 11  O Maria râ, te tia noa ra ïa i rapaeau i pihai iho i te menema e te ta‘i ra. E a ta‘i noa ’i oia, fâao ihora oia i roto i te menema 12  e ite atura e piti melahi, e ahu uouo to raua, e parahi noa ra i te vahi i tuuhia ’i te tino o Iesu, hoê i te pae upoo e hoê i te pae avae. 13  Na ô maira raua ia ’na: “No te aha oe e ta‘i ai?” Parau atura oia: “Ua ravehia to ’u Fatu e aita vau i ite ihea o ’na i te tuuraahia.” 14  I muri a‘e i to ’na parauraa i te reira, hi‘o a‘era oia i muri e ite ihora i te hoê taata. Aita râ i taa ia ’na e o Iesu tera. 15  Na ô maira Iesu: “No te aha oe e ta‘i ai? O vai ta oe e imi nei?” Mana‘o ihora Maria e o te taata tamâ aua tera e na ô atura: “Mai te peu e na oe i hopoi ê ia ’na, faaite mai ïa ihea to oe tuuraa ia ’na, e rave hoi au ia ’na.” 16  Na ô maira Iesu: “Maria!” Fariu ihora Maria e parau atura na roto i te reo Hebera: “Raboni!” (“Orometua!” te auraa.) 17  Na ô maira Iesu: “A faaea na i te turui noa i nia ia ’u. Aita â hoi au i haere atura i nia i te Metua ra. A haere na râ i to ’u mau taeae ra e a parau atu: ‘Te haere nei au i nia i to ’u Metua ra e to outou Metua e i to ’u Atua e to outou Atua.’” 18  Haere atura Maria Magadala e faaite i te parau apî i te mau pǐpǐ: “Ua ite au i te Fatu!” E faatia ’tura i ta Iesu i parau. 19  I te ahiahi o taua mahana matamua ra o te hebedoma, to roto te mau pǐpǐ i te hoê fare ua ponaohia te mau opani no to ratou mǎta‘u i te ati Iuda. Fa maira Iesu i rotopu ia ratou e na ô maira: “Ei ia outou na te hau.” 20  I muri a‘e i to ’na parauraa i te reira, faaite atura oia i to ’na na rima e to ’na atoa aoao. Oaoa a‘era te mau pǐpǐ i te iteraa ’tu i te Fatu. 21  Na ô faahou atura Iesu: “Ei ia outou na te hau. Mai te Metua i tono mai ia ’u, te tono atoa nei au ia outou.” 22  I muri a‘e i to ’na parauraa i te reira, puhi atura oia i te aho i nia iho ia ratou e na ô atura: “A farii i te varua mo‘a. 23  Ia faaore outou i te hara a te tahi taata, ua faaore ê na te Atua i te reira. Ia ore râ outou e faaore i ta ’na hara, aita ïa te Atua i faaore i te reira.” 24  Area Toma parauhia te Maehaa, hoê o na 12,* aita ïa ia ratou ra i to Iesu faraa mai. 25  No reira ïa te tahi atu mau pǐpǐ i parau ai ia ’na: “Ua ite matou i te Fatu!” Na ô maira râ oia: “Ia ore au e ite i te puta naero i nia i to ’na na rima, e ia ore au e fafa i te reira i to ’u manimani rima e to ’na aoao i to ’u rima, e ore roa vau e tiaturi.” 26  E va‘u mahana i muri iho, to roto faahou te mau pǐpǐ a Iesu i te fare e to reira atoa Toma. Noa ’tu e ua ponaohia te mau opani, fa maira Iesu i rotopu ia ratou e na ô maira: “Ei ia outou na te hau.” 27  Na ô maira oia ia Toma: “Fafa mai na i to ’u na rima i to manimani rima e to ’u aoao i to rima, e a faaea i te feaa, a tiaturi râ.” 28  Pahono atura Toma: “To ’u Fatu e to ’u Atua!” 29  Na ô maira Iesu: “No to oe iteraa mai ia ’u i tiaturi ai oe? E oaoa te feia aita e ite ra, o te tiaturi râ.” 30  Mea rahi atu â hoi te semeio ta Iesu i rave i mua i ta ’na mau pǐpǐ, aita i papaihia i roto i teie otaro. 31  Tera râ, ua papaihia teie mau mea ia tiaturi outou e o Iesu iho â te Mesia te Tamaiti a te Atua e ia noaa ia outou te ora na roto i to ’na i‘oa no te mea te tiaturi ra outou.

Nota i raro i te api

Aore ra “menema haamana‘oraa.”
Aore ra “menema haamana‘oraa.”
Heleni phileo.
Oia hoi na 12 aposetolo.