Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ioane 2:1-25

HAAPOTORAA O TE MAU TUMU PARAU

  • Faaipoiporaa i Kana, tauihia te pape ei uaina (1-12)

  • Tamâraa Iesu i te hiero (13-22)

  • Ua ite Iesu eaha to roto i te aau (23-25)

2  I te toru o te mahana, tupu a‘era te hoê oroa faaipoiporaa i Kana i Galilea, e to reira atoa te metua vahine o Iesu.  Ua titau-manihini-atoa-hia Iesu e ta ’na mau pǐpǐ i taua oroa faaipoiporaa ra.  Pau a‘era te uaina e parau atura to Iesu metua vahine ia ’na: “Aita ta ratou e uaina faahou.”  Teie râ parau maira Iesu: “Vahine, eaha tâua e haapeapea ’i no te reira?* Aita â to ’u taime i tae mai atura.”  Parau atura to ’na metua vahine i te mau tavini: “Ta ’na e faaue ia outou, a rave.”  E ono farii pape ofai to reira mai tei titauhia e te peu tamâraa a te ati Iuda. E ô e piti aore ra e toru faito pape* i roto i te farii hoê.  Parau atura Iesu i te mau tavini: “A faaî i te mau farii i te pape.” Faaî ihora ratou e tae roa ’tu i te auvaha.  Parau atura Iesu: “A taipu na i teie nei e a hopoi atu i te tiaau o te oroa.” Hopoi atura ratou.  Tamata ’tura te tiaau o te oroa i te pape o tei tauihia ei uaina, aita râ i ite nohea mai tera uaina. Ua ite râ te mau tavini o tei taipu i te pape. Pii maira te tiaau o te oroa i te tane faaipoipo 10  e parau atura: “E horoa te mau taata atoa i te uaina maitai roa na mua, e ia taero te mau manihini, te uaina ïa e ere i te mea maitai roa. Ua faaherehere oe i te uaina maitai roa no teie nei.” 11  Ua faatupu Iesu i te reira i Kana i Galilea ei haamataraa o ta ’na mau semeio e ua itehia to ’na hanahana. Tiaturi maira ta ’na mau pǐpǐ ia ’na. 12  I muri a‘e i te reira, pou atura Iesu, to ’na metua vahine, to ’na mau taeae e ta ’na mau pǐpǐ i Kaperenaumi, aita râ ratou i faaea maoro i reira. 13  Te piri mai ra te Pasa a te ati Iuda e pauma ’tura Iesu i Ierusalema. 14  Ite ihora oia i roto i te hiero i te feia e hoo atu ra i te puaatoro, te mamoe e te uupa e i te feia taui moni e parahi ra. 15  Hamani ihora oia i te hoê hui, tiahi atura i te taata atoa e ta ratou mamoe e puaatoro i rapae i te hiero, hue atura i te moni a te feia taui moni e huri atura i ta ratou mau amuraa maa. 16  Parau atura oia i te feia hoo uupa: “A hopoi ê i teie mau mea! A faaea i te faariro i te fare o to ’u Metua ei fare hoohooraa!”* 17  Haamana‘o a‘era ta ’na mau pǐpǐ i tei papaihia: “E î roa vau i te itoito rahi no to fare.” 18  Pahono maira te mau ati Iuda ia ’na: “I te mea e te rave nei oe i teie mau mea, eaha ïa te tapao ta oe e faaite mai?” 19  Pahono atura Iesu: “A vavahi i teie hiero, e faatia vau i te reira e toru mahana.” 20  Parau maira te mau ati Iuda: “E 46 matahiti te paturaahia teie hiero, e toru mahana ïa oe e faatia ’i i te reira?” 21  Te faahiti ra hoi oia i te hiero o to ’na tino. 22  Teie râ i to Iesu faatiaraahia mai te pohe mai, haamana‘o a‘era ta ’na mau pǐpǐ e i parau na hoi oia i te reira, e tiaturi a‘era ratou i te mau Papai e i ta Iesu i parau. 23  I to Iesu parahiraa i Ierusalema i te oroa Pasa, e rave rahi taata tei tiaturi i to ’na i‘oa, i to ratou iteraa i te mau semeio ta ’na i rave. 24  Tera râ, aita Iesu i tiaturi roa ia ratou, ua ite hoi oia i to ratou huru 25  e aita e faufaa ia faaite atu ia ’na i te huru o te taata, ua ite hoi oia eaha to roto i te aau o te taata.

Nota i raro i te api

“Eaha ta tâua?” na roto i te reo Heleni. E patoiraa teie. E ere te parau “vahine” i te mea faatura ore.
Hoê faito pape, hoê ïa bato, e 22 ïa litera.
Aore ra “ei matete,” “ei fare tapihooraa.”