Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ioane 19:1-42

HAAPOTORAA O TE MAU TUMU PARAU

  • Huihia e faaooohia Iesu (1-7)

  • Uiui faahou Pilato ia Iesu (8-16a)

  • Patitihia Iesu i nia i te pou i Gologota (16b-24)

  • Ta Iesu i faanaho no to ’na metua vahine (25-27)

  • Poheraa o Iesu (28-37)

  • Hunaraa o Iesu (38-42)

19  Faaue ihora Pilato i te mau faehau ia rave ia Iesu e ia hui ia ’na.  Firi a‘era te mau faehau i te hoê hei taratara, tuu atura i nia i to Iesu upoo, faaahu maira ia ’na i te hoê ahu roa vareau,  e haere noa maira ia ’na ra a na ô ai: “Ia ora na* te Arii o te ati Iuda!” Poara noa atoa maira ratou ia ’na.  Haere faahou maira Pilato i rapae e na ô maira i te nahoa: “Te aratai mai nei au ia ’na i rapae ia outou ra ia ite outou e aita e tumu e faautua ’i au ia ’na.”  Haere maira ïa Iesu i rapae ma te hei taratara i nia i te upoo e te ahu roa vareau i nia ia ’na. Parau maira Pilato i te nahoa: “Teie taua taata ra!”  Teie râ, i to te mau tahu‘a tiaau e to te mau tiai iteraa mai ia ’na, tuô ihora ratou: “I nia i te pou! I nia i te pou!”* Parau maira Pilato: “Na outou iho e rave ia ’na no te haapohe atu,* aita hoi e tumu e faautua ’i au ia ’na.”  Pahono atura te ati Iuda: “E ture ta matou, e ia au i ta matou ture, ia pohe oia e tia ’i, no te mea ua parau oia e e tamaiti oia na te Atua.”  I to Pilato faarooraa i ta ratou e parau ra, rahi roa ’tura to ’na mǎta‘u,  ho‘i faahou atura oia i roto i te aorai e na ô atura ia Iesu: “Nohea mai oe?” Aita râ Iesu i pahono atu. 10  Na ô atura Pilato: “Eita oe e pahono mai? Aita oe i ite e e mana to ’u no te tuu ia oe aore ra no te haapohe ia oe?”* 11  Pahono maira Iesu: “Aita to oe e mana i nia ia ’u mai te peu aita taua mana ra i horoahia mai ia oe ra e te Atua. No reira, te taata tei tuu ia ’u ia oe ra, e hara rahi a‘e ïa ta ’na.” 12  No reira, imi noa ’tura Pilato i te tahi ravea no te tuu ia Iesu. Te ati Iuda râ, tuô maira ïa: “Ia tuu oe i tena taata, e ere ïa oe i te hoa no Kaisara.* Te taata o te faaarii ia ’na iho, te patoi ra ïa ia Kaisara.” 13  I muri a‘e i to Pilato faarooraa i teie mau parau, afai atura oia ia Iesu i rapae e parahi ihora i nia i te terono haavaraa i te vahi parauhia Tahua ofai aore ra Gabata na roto i te reo Hebera. 14  O te mahana Faaineineraa ïa i te Pasa, piri i te ono o te hora.* Na ô atura oia i te ati Iuda: “Teie to outou arii!” 15  Tera râ, tuô maira ratou: “Haapohe ia ’na! Haapohe ia ’na! I nia i te pou!”* Na ô atura Pilato: “E haapohe au i to outou arii?” Pahono maira te mau tahu‘a tiaau: “O Kaisara to matou arii, aita ’tu.” 16  Tuu atura oia ia Iesu ia ratou ra ia haapohehia i nia i te pou. Afai a‘era ratou ia Iesu. 17  A amo noa ’i Iesu i te pou haamauiuiraa,* haere atura oia i te vahi parauhia Apu upoo aore ra Gologota na roto i te reo Hebera. 18  Patiti atura ratou ia ’na i nia i te pou e e piti taata ê atu, hoê i te pae atau o Iesu, hoê i te pae aui. 19  Papai atoa ihora Pilato i teie parau: “Iesu no Nazareta te Arii o te ati Iuda” e tamau atura i nia i te pou haamauiuiraa.* 20  Mea rahi te ati Iuda tei taio i taua parau ra, no te mea te vahi i patitihia ’i Iesu i nia i te pou, mea fatata ïa i te oire, e ua papaihia te reira na roto i na reo Hebera, Latino e Heleni. 21  Teie râ, na ô maira te mau tahu‘a tiaau a te ati Iuda ia Pilato: “Eiaha e papai ‘te Arii o te ati Iuda,’ a papai râ i ta ’na i parau: ‘O vau te Arii o te ati Iuda.’” 22  Pahono atura Pilato: “Ta ’u i papai, ua oti ïa parau.” 23  I muri a‘e i to te mau faehau patitiraa ia Iesu i nia i te pou, rave a‘era ratou i to ’na mau ahu, pahae atura ei maha tuhaa, hoê faehau hoê tuhaa, e rave atoa maira i to ’na ahu e au i te piriaro. Aita râ e niraraa to taua ahu ra, mea raraa-noa-hia mai nia mai e raro roa. 24  Na ô a‘era te tahi i te tahi: “Eiaha e pahae i teie ahu, e pere* râ tatou no te faaoti na vai e rave atu.” Ia tupu hoi tei papaihia: “Ua opere ratou i to ’u mau ahu i rotopu ia ratou e ua pere i to ’u ahu e au i te piriaro.” Na reira ’tura iho â te mau faehau. 25  Tera râ, i pihai iho i te pou haamauiuiraa* o Iesu, te tia noa ra to ’na metua vahine, te tuahine o to ’na metua vahine, o Maria te vahine faaipoipo a Kelopa e o Maria Magadala. 26  I to Iesu hi‘oraa i to ’na metua vahine e te pǐpǐ herehia e ana e tia noa ra i pihai iho mai, na ô atura oia i to ’na metua vahine: “O ’na ta oe tamaiti i teie nei!” 27  E na ô atura oia i te pǐpǐ: “O ’na to oe metua vahine i teie nei!” E mai reira mai, rave maira taua pǐpǐ ra ia Maria i ǒ ’na. 28  I muri iho, i to Iesu iteraa e ua hope ia ’na i te rave i ta to ’na Metua i te ra‘i i ani mai ia ’na, na ô ihora oia: “Te poihâ ra vau.” Ua na reira oia i te parau ia tupu hoi tei papaihia. 29  E farii to reira ua î i te uaina toavaava. Tutau ihora ratou i te hoê rimu i roto, tuu a‘era i taua rimu ra i nia iho i te hoê amaa hisopa e haafatata ’tura i te vaha o Iesu. 30  Tamata ihora Iesu i taua uaina toavaava ra e na ô atura: “Ua hope ia ’u i te rave i ta oe i ani mai!” I muri iho, pi‘o ihora to ’na upoo i raro e pohe atura oia.* 31  E no te mea e mahana Faaineineraa, ani maira te ati Iuda ia Pilato ia ofatihia te avae o na taata tei patitihia i nia i te pou e ia hopoi-ê-hia to ratou tino, ia ore hoi taua mau tino ra ia vai noa i nia i te pou haamauiuiraa i te Sabati* (e mahana rahi hoi taua Sabati ra). 32  Haere maira te mau faehau e ofati ihora i na avae o na toopiti taata tei patitihia i nia i te pou e o Iesu. 33  Tera râ i to ratou taeraa ia Iesu, ite ihora ratou e ua pohe ê na o ’na, aita ’tura ratou i ofati i to ’na na avae. 34  Teie râ patia ’tura te hoê faehau i te aoao o Iesu i te hoê omore. I reira iho, tahe maira te toto e te pape. 35  E o tei ite mata i te reira, ua faaite mai ïa, e e parau mau ta ’na i faaite mai. Ua ite taua taata ra e e parau mau ta ’na i parau, ia tiaturi hoi outou atoa. 36  Ua tupu hoi teie mau mea ia tupu tei papaihia: “E ore hoê noa ’‘e o to ’na mau ivi e ofatihia.” 37  E teie atoa parau tei papaihia: “E hi‘o ratou i tei patiahia e ratou.” 38  I muri a‘e i teie mau mea, ani atura Iosepha no Arimataio ia Pilato e e nehenehe anei ta ’na e rave i te tino o Iesu. E pǐpǐ oia na Iesu, aita râ i faaite no to ’na mǎta‘u i te ati Iuda. Faatia maira Pilato, haere atura Iosepha e hopoi ê atura i te tino o Iesu. 39  Haere atoa maira Nikodemo, o tei haere a‘ena mai ia Iesu ra i te po. Ua afai mai oia i te mura anoihia i te aloe piri i te 30 kilo. 40  Rave maira raua i te tino o Iesu e vehî atura i te ahu lino ma te raau no‘ano‘a atoa, mai ta te ati Iuda i matau i te rave no te faaineine i te hoê hunaraa. 41  Teie râ, i te vahi i haapohehia ’i Iesu,* te vai ra te hoê aua, e i roto i taua aua ra te hoê menema* apî, aita e taata i tuuhia a‘enei i roto. 42  Tuuhia ’tura Iesu i reira, no te mea e mahana Faaineineraa na te ati Iuda e mea fatata taua menema ra.

Nota i raro i te api

Aore ra “Maeva.”
Aore ra “Haapohe ia ’na i nia i te pou! Haapohe ia ’na i nia i te pou!”
Aore ra “haapohe ia ’na i nia i te pou.”
Aore ra “haapohe ia oe i nia i te pou?”
Aore ra “te emepera no Roma.”
I te area hora 12 i te avatea.
Aore ra “Haapohe ia ’na i nia i te pou!”
A hi‘o i te titionare.
A hi‘o i te titionare.
A hi‘o i te titionare.
A hi‘o i te titionare.
Aore ra “faaea ’tura i te huti i te aho.”
A hi‘o i te titionare.
Aore ra “i haapohehia ’i Iesu i nia i te pou.”
Aore ra “menema haamana‘oraa.”