Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ioane 18:1-40

HAAPOTORAA O TE MAU TUMU PARAU

  • Tuu Iuda ia Iesu i te enemi (1-9)

  • Raveraa Petero i te ‘o‘e (10, 11)

  • Afaihia Iesu ia Ana ra (12-14)

  • A tahi parauraa Petero aita oia i ite ia Iesu (15-18)

  • Iesu i mua ia Ana (19-24)

  • A piti e a toru parauraa Petero aita oia i ite ia Iesu (25-27)

  • Iesu i mua ia Pilato (28-40)

    • “E ere ta ’u Faatereraa arii no teie nei ao” (36)

18  I muri a‘e i to Iesu parauraa i teie mau mea, haere atura oia e ta ’na mau pǐpǐ i tera pae mai o te peho no Kiderona. E aua to reira, tomo atura ratou i roto.  Ua ite atoa Iuda, o te tuu ia Iesu i te rima o te enemi, i taua vahi ra, no te mea i haere pinepine na Iesu i ǒ e ta ’na mau pǐpǐ.  Tii atura Iuda i te hoê pǔpǔ faehau e te mau tiai a te mau tahu‘a tiaau e a te mau Pharisea e haere atura ratou i ǒ e te mori e te mauhaa.  Haere maira Iesu ia ratou ra, ua ite pauroa hoi oia i te ohipa e tupu i nia ia ’na, e na ô maira: “O vai ta outou e imi nei?”  Pahono atura ratou: “O Iesu no Nazareta.” Na ô maira oia: “O vau ïa.” Teie râ, to reira atoa Iuda, o te tuu ia Iesu i te rima o te enemi.  Tera râ, i to Iesu parauraa: “O vau ïa,” otohe a‘era ratou e marua ihora.  Ui faahou maira oia: “O vai ta outou e imi nei?” Na ô atura ratou: “O Iesu no Nazareta.”  Pahono maira Iesu: “Ua parau atu hoi au e o vau. O vau ta outou e imi nei, a tuu ïa ia ratou ia haere.”  Ia tupu hoi ta ’na i parau na: “O te mau pǐpǐ ta oe i horoa mai, aita hoê noa ’‘e i mo‘e.” 10  Huti maira Simona Petero i ta ’na ‘o‘e, tairi ihora i te tavini a te tahu‘a rahi e mutu ê atura to ’na tari‘a atau. O Malako te i‘oa o taua tavini ra. 11  Teie râ na ô atura Iesu ia Petero: “A oomo i te ‘o‘e i roto i te vehî. Te au‘a ta te Metua i horoa mai, eiaha ïa vau e inu?” 12  Haru a‘era te mau faehau, te raatira o te nuu e te mau tiai a te ati Iuda ia Iesu e taamu ihora i to ’na na rima. 13  Afai atura ratou ia ’na ia Ana ra na mua, e metua tane hoovai hoi oia no Kaiapha, te tahu‘a rahi i taua matahiti ra. 14  Na Kaiapha hoi i a‘o i te ati Iuda e mea maitai a‘e no ratou ia pohe hoê noa taata no te nunaa. 15  Pee maira Simona Petero e te tahi atu pǐpǐ matauhia e te tahu‘a rahi, ia Iesu. Tomo atura taua pǐpǐ ra e o Iesu i roto i te aua o te tahu‘a rahi. 16  Area Petero, te tia noa ra ïa i rapaeau i te uputa ra. Haere maira taua pǐpǐ ra tei matauhia e te tahu‘a rahi i rapae, paraparau atura i te tavini vahine tiai opani e aratai maira ia Petero i roto. 17  Na ô maira te tavini vahine ia Petero: “E ere oe i te pǐpǐ atoa na tera taata?” Parau atura oia: “E ere.” 18  Te tia noa ra te mau tavini e te mau tiai na reira. I tahu na hoi ratou i te auahi no te to‘eto‘e e te tamahanahana ra ia ratou. Tei rotopu atoa Petero ia ratou e tamahanahana ra ia ’na. 19  Uiui maira te tahu‘a tiaau ia Iesu no nia i ta ’na mau pǐpǐ e ta ’na haapiiraa. 20  Pahono atura Iesu: “Ua paraparau vau i mua i te taata atoa. I haapii noa na vau ia vetahi ê i roto i te sunago e te hiero, i reira hoi te ati Iuda atoa e ruru ai, e aita vau i parau huna noa ’‘e i te tahi parau. 21  No te aha ïa oe e uiui mai ai ia ’u? A uiui i te feia o tei faaroo i ta ’u i parau ia ratou. Ua ite hoi ratou i ta ’u i parau.” 22  I muri a‘e i to Iesu parauraa ’tu, poara maira te hoê tiai e tia ra na reira ia Iesu e na ô maira: “Mea na ô oe ia pahono i te tahu‘a tiaau?” 23  Pahono atura Iesu: “Ua hape ta ’u parau, a faaite mai ïa eaha ta ’u hape. Teie râ, ua tano ta ’u parau, no te aha ïa oe i poara ’i ia ’u?” 24  Tuu atura Ana ia Iesu, tei taamuhia te rima, ia afaihia ia Kaiapha ra te tahu‘a rahi. 25  Te tia noa ra Simona Petero na pihai iho i te auahi a tamahanahana ’i ia ’na. Na ô maira ratou ia ’na: “E ere oe i te pǐpǐ atoa na ’na?” Parau atura oia: “E ere.” 26  Na ô maira te hoê tavini a te tahu‘a rahi, e fetii no te taata ta Petero i tâpû i te tari‘a: “Ua ite au ia oe i roto i te aua e o ’na, aita?” 27  Teie râ, parau faahou atura Petero e aita, e totereo ihora te hoê moa. 28  I te poipoi roa, aratai atura ratou ia Iesu mai ia Kaiapha mai ra i te aorai o te tavana ra o Pilato. Aita râ ratou i tomo i roto i te aorai o te tavana, a‘unei ratou e viivii ai, a ore atu ai e nehenehe e amu i te Pasa. 29  Haere maira Pilato i rapaeau ia ratou ra e na ô maira: “Eaha ta outou pariraa i tena taata?” 30  Pahono atura ratou: “Ahiri o ’na e ere i te taata ohipa ino, eita ïa matou e tuu ia ’na ia oe ra.” 31  Na ô maira ïa Pilato: “A rave atu ia ’na e a haava ’tu ia au i ta outou ture.” Parau atura te ati Iuda: “Ua opanihia matou ia haapohe i te taata.” 32  Ia tupu hoi ta Iesu i parau na i to ’na faaiteraa e nafea oia e pohe ai. 33  Ho‘i faahou atura Pilato i roto i te aorai, pii maira ia Iesu e na ô maira: “O oe te Arii o te ati Iuda?” 34  Pahono atura Iesu: “Na oe noa anei tena parau, aore ra na vetahi ê i parau ia oe?” 35  Na ô maira Pilato: “E ere au i te ati Iuda. Na to oe iho nunaa e na te mau tahu‘a tiaau i tuu mai ia oe ia ’u nei. Eaha hoi ta oe i rave?” 36  Pahono atura Iesu: “E ere ta ’u Faatereraa arii* no teie nei ao. Ahiri no teie nei ao ta ’u Faatereraa arii, e aro ïa to ’u mau taata ia ore au ia tuuhia i te ati Iuda ra. Tera râ, e ere ta ’u Faatereraa arii no teie nei ao.” 37  Na ô maira Pilato: “E arii ïa oe?” Pahono atura Iesu: “Te reira iho â mai ta oe e parau ra e arii au. Teie te tumu i fanauhia mai ai au e i haere mai ai i teie nei ao: Ia faaite au i te parau mau e tia ’i. O te pee maite i te parau mau, e faaroo ïa i to ’u reo.” 38  Na ô maira Pilato: “Eaha te parau mau?” I muri a‘e i to ’na na reiraraa i te parau, haere faahou atura oia i rapaeau i te ati Iuda ra e na ô ihora: “Aita e tumu e faautua ’i au ia ’na. 39  E peu matauhia atoa i ǒ outou ia tuu atu vau i te hoê taata tapeahia i te Pasa. Hinaaro outou ia tuu atu vau i to outou Arii?” 40  Tuô faahou a‘era ratou: “Eiaha tena taata, ia Baraba râ!” Teie râ, e eiâ o Baraba.

Nota i raro i te api

Aore ra “to ’u Basileia.”