Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ioane 17:1-26

HAAPOTORAA O TE MAU TUMU PARAU

  • Ta Iesu pure hopea e ta ’na mau aposetolo (1-26)

    • Ia ite i te Atua ia noaa mai te ora mure ore (3)

    • E ere te mau Kerisetiano no teie nei ao (14-16)

    • “E parau mau ta oe parau” (17)

    • “Ua faaite au i to i‘oa” (26)

17  I muri a‘e i to Iesu parauraa i teie mau mea, hi‘o a‘era oia i nia i te ra‘i e na ô atura: “To ’u Metua, ua tae i te taime. A faahanahana i to tamaiti ia faahanahana hoi to tamaiti ia oe.  Inaha ua horoa oe i to tamaiti i te mana i nia i te taata atoa, ia horoa ’tu hoi oia i te ora mure ore i te feia atoa ta oe i horoa na ’na.  No te fana‘o i te ora mure ore, ia ite ïa ratou ia oe te Atua mau hoê roa e i ta oe i tono mai o Iesu Mesia e tia ’i.  Ua faahanahana vau ia oe i te fenua nei e ua faaoti au i te ohipa ta oe i horoa mai ia rave au.  I teie nei, to ’u Metua, a faahanahana mai ia ’u i pihai iho ia oe i te hanahana ta ’u i fana‘o na i pihai iho ia oe hou te huitaata* i fanauhia mai ai.  Ua faaite au i to i‘oa i te mau pǐpǐ ta oe i horoa mai no ’u no roto mai i teie nei ao. No oe ratou e ua horoa mai oe ia ratou no ’u e te haapao* ra ratou i ta oe parau.  I teie nei, ua ite ratou e no ǒ mai ia oe ra te mau mea atoa ta oe i horoa mai.  Inaha i to ’u faaiteraa ia ratou i ta oe i parau mai, ua farii ratou e ite papu atura e no ǒ mai au ia oe ra, a tiaturi atoa ’i e na oe i tono mai ia ’u.  Te pure nei au no ratou. Aita vau e pure nei no to te ao, no te mau pǐpǐ râ ta oe i horoa mai. No oe hoi ratou, 10  e ta ’u mau mea atoa, na oe ïa e ta oe na ’u ïa, e ua faahanahanahia vau i rotopu i te mau pǐpǐ ta oe i horoa mai. 11  E faarue au i teie nei ao, o ratou râ, to roto â ïa i teie nei ao e te haere nei au ia oe ra. To ’u Metua mo‘a, paruru na oe ia ratou no to i‘oa ta oe i horoa mai no ’u, ia hoê* hoi ratou mai ia tâua. 12  A parahi ai au ia ratou ra, i paruru noa na vau ia ratou no to i‘oa ta oe i horoa mai no ’u. Ua paruru vau ia ratou e aita ratou i mou, hoê ana‘e râ te taata o te haamouhia, ia tupu hoi tei papaihia. 13  I teie nei râ, te haere nei au ia oe ra, e te parau nei au i teie mau mea to roto noa â vau i teie nei ao, ia oaoa roa hoi ratou mai ia ’u. 14  Ua faaite au i ta oe parau ia ratou, ua hae râ teie nei ao ia ratou, no te mea e ere ratou no teie nei ao, mai ia ’u nei e ere no teie nei ao. 15  Aita vau e pure nei ia oe ia hopoi ê ia ratou i teie nei ao, ia paruru râ ia ratou i te varua ino.* 16  E ere ratou no teie nei ao, mai ia ’u nei e ere no teie nei ao. 17  A haamo‘a* na ia ratou maoti te parau mau. E parau mau ta oe parau. 18  Mai ia oe i tono mai ia ’u i roto i teie nei ao, ua tono atoa vau ia ratou i roto i teie nei ao. 19  E te haamo‘a nei au ia ’u no ratou, ia mo‘a atoa hoi ratou maoti te parau mau. 20  Aita vau e pure nei no ratou noa, no te feia atoa râ e tiaturi ia ’u no ta ratou haapiiraa, 21  ia hoê hoi ratou mai ia tâua to ’u Metua, e ia hoê atoa ratou ia tâua, a tiaturi atu ai to te ao e na oe i tono mai ia ’u. 22  Ua horoa ’tu vau ia ratou i te hanahana ta oe i horoa mai no ’u, ia hoê hoi ratou mai ia tâua. 23  Mea hoê matou e mea hoê tâua, ia hoê mau â* hoi ratou, ia ite to te ao e na oe i tono mai ia ’u e mea here na oe ia ratou mai ia oe e here nei ia ’u. 24  To ’u Metua, te hinaaro nei au e i te vahi to reira vau, to reira atoa te mau pǐpǐ ta oe i horoa mai, ia ite hoi ratou i to ’u hanahana ta oe i horoa mai no to here ia ’u hou te omuaraa mai â o teie nei ao.* 25  To ’u Metua parau-tia, aita iho â to te ao nei i ite o vai oe, ua ite râ vau o vai oe, e ua ite ratou e na oe i tono mai ia ’u. 26  Ua faaite au i to i‘oa ia ratou e e faaite â vau, ia here hoi ratou ia vetahi ê mai ia oe e here atoa nei ia ’u e ia hoê matou.”

Nota i raro i te api

Oia hoi te mau tamarii a Adamu raua Eva.
Aore ra “pee.”
Aore ra “tahoê.”
Aore ra “ia Satani.”
Aore ra “faataa ê.”
Aore ra “ia tahoê roa.”
Oia hoi a tamariihia ’i Adamu raua Eva.