Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ioane 14:1-31

HAAPOTORAA O TE MAU TUMU PARAU

  • Iesu, te ravea hoê roa e faafatata i te Metua (1-14)

    • ‘O vau te e‘a, te parau mau, e te ora’ (6)

  • Fafau Iesu e e tonohia ’tu te varua mo‘a (15-31)

    • “Mea puai a‘e te Metua ia ’u” (28)

14  “Eiaha to outou aau ia horuhoru. A faatupu i te faaroo i te Atua, a faatupu atoa i te faaroo ia ’u.  Mea rahi te vahi faaearaa i roto i te fare o to ’u Metua. Ahiri aita, eita ïa vau e parau atu. Teie râ, te haere nei au e faaineine i te tahi vahi no outou.  Ia reva vau e faaineine i te tahi vahi no outou, e ho‘i mai â vau e aratai ia outou i ǒ ’u ra, i te vahi hoi to reira vau, to reira atoa ïa outou.  I te vahi ta ’u e haere nei, ua ite outou i te e‘a.”  Na ô maira Toma ia Iesu: “E te Fatu, aita matou i ite i te vahi ta oe e haere nei. Mea nafea ïa matou i ite ai i te e‘a?”  Parau atura Iesu: “O vau te e‘a e te parau mau e te ora. Aore roa e taata e tae i te Metua ra, na roto noa râ ia ’u.  Ahiri outou i ite o vai au, ua ite atoa ïa outou o vai to ’u Metua. I teie nei, e ite outou o vai o ’na. Inaha, ua ite ê na outou ia ’na.”  Na ô maira Philipa: “E te Fatu, a faaite mai i te Metua, atira ’tu ai.”  Parau atura Iesu: “Ahia ’tura maororaa to ’u parahiraa mai ia outou ra, aita â oe e Philipa i ite atura o vai au? O tei ite mai ia ’u, ua ite atoa ïa i te Metua. No te aha ïa oe i parau mai ai: ‘A faaite mai i te Metua’? 10  Aita oe e tiaturi ra e mea hoê mâua te Metua? Te mau mea ta ’u e parau ia outou pauroa, e ere ïa i to ’u iho mau mana‘o. Teie râ, te rave nei te Metua, i ta ’na mau ohipa na roto ia ’u mea hoê noa hoi mâua. 11  A tiaturi mai ia parau atu vau e mea hoê mâua te Metua. Aita ana‘e, a tiaturi mai ïa no te mau ohipa ta ’u i rave. 12  E parau mau ta ’u e parau atu: O te faatupu i te faaroo ia ’u, e rave atoa ïa oia i te mau ohipa ta ’u e rave nei. E ohipa rahi a‘e i teie ta ’na e rave, no te mea te haere nei au i te Metua ra. 13  E te mau mea atoa ta outou e ani ma to ’u i‘oa, e rave au, ia faahanahanahia hoi te Metua na roto i te Tamaiti. 14  Ia ani outou i te tahi mea ma to ’u i‘oa, e rave au. 15  Mea here na outou ia ’u, a haapao ïa i ta ’u mau faaueraa, 16  e na ’u e ani i te Metua e na ’na e horoa ’tu i te tahi atu tauturu* o te vai noa mai ia outou ra e a muri noa ’tu. 17  O te varua mo‘a ïa o te parau mau e ore e noaa i teie nei ao, no te mea aita teie nei ao e ite ra i te reira e aita atoa i ite eaha te reira. Outou râ, ua ite ïa, no te mea e vai noa mai te reira ia outou ra e tei roto ia outou. 18  Eita vau e vaiiho otare noa mai ia outou. E ho‘i mai â vau ia outou ra. 19  E maa taime â e ore teie nei ao e ite faahou mai ia ’u. Outou râ, oia ïa no te mea te ora nei au, e ora ïa outou. 20  I tera ïa mahana outou e ite ai e mea hoê mâua to ’u Metua e mea hoê tatou. 21  O te farii i ta ’u mau faaueraa e o te haapao i te reira, mea here ïa na ’na ia ’u. E o te here ra ia ’u, e herehia ïa o ’na e to ’u Metua. E here atoa vau ia ’na, a faaite maitai atu ai ia ’na o vai au.” 22  Na ô maira Iuda, eiaha o Iuda Isakariota: “E te Fatu, no te aha oe e hinaaro ai ia ite maitai matou o vai oe, eiaha râ to te ao?” 23  Pahono atura Iesu: “Ia here te hoê taata ia ’u, e haapao ïa o ’na i ta ’u parau, e here to ’u Metua ia ’na e e haere atu mâua ia ’na ra, a faaea roa ’tu ai i ǒ ’na. 24  O te ore e here ia ’u, eita ïa e haapao i ta ’u mau parau. Te parau ta outou e faaroo nei, e ere na ’u, na te Metua râ tei tono mai ia ’u. 25  Ua parau atu vau i teie mau mea a parahi ai au ia outou ra. 26  Area te tauturu, te varua mo‘a ta te Metua e tono atu ma to ’u i‘oa, na ’na e haapii ia outou i te mau mea atoa e e haamana‘o ia outou i te mau mea atoa ta ’u i parau atu. 27  E vaiiho atu vau i te hau, e horoa ’tu vau i to ’u nei hau. Te hau ta ’u e horoa ’tu, mea taa ê ïa i te hau ta teie nei ao e horoa ’tu. Eiaha to outou aau ia horuhoru, eiaha atoa ia taiâ. 28  Ua faaroo outou ia ’u i te parauraa ’tu, te reva nei au e e ho‘i mai â vau ia outou ra. Mea here na outou ia ’u, e oaoa ïa outou e te haere nei au i te Metua ra, no te mea mea puai a‘e te Metua ia ’u. 29  Ua parau atu vau i teie mea hou te reira e tupu ai, ia tiaturi hoi outou ia tupu te reira. 30  Eita vau e paraparau rahi faahou ia outou, te haere mai nei hoi te arii o teie nei ao e aita to ’na e mana i nia ia ’u. 31  Teie râ, ia ite to te ao e mea here na ’u te Metua, te rave nei au i ta te Metua i faaue mai. A tia, mai haere ana‘e.

Nota i raro i te api

Aore ra “tamahanahana.”