Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ioane 13:1-38

HAAPOTORAA O TE MAU TUMU PARAU

  • Horoi Iesu i te avae o ta ’na mau pǐpǐ (1-20)

  • Faaite Iesu o vai te tuu ia ’na i te enemi (21-30)

  • Faaueraa apî (31-35)

    • “I te mea e mea here outou te tahi i te tahi” (35)

  • Tohuhia e parau Petero aita oia i ite ia Iesu (36-38)

13  Ua ite Iesu hou te oroa Pasa e ua tae i te taime e faarue mai ai oia i teie nei ao no te haere i to ’na Metua ra. E no te mea e mea here na ’na ta ’na mau pǐpǐ e ora ra i roto i teie nei ao, here noa ’tura oia ia ratou e tae atu i te hopea.  Te tamaa ra ratou i taua taime ra. Ua tuu ê na te Diabolo i roto i te aau o Iuda Isakariota tamaiti a Simona, i te mana‘o e tuu ia Iesu i te rima o te enemi.  I te mea ua ite Iesu e i tuu mai na te Metua i te mau mea atoa i roto i to ’na rima e no ǒ mai o ’na i te Atua e te haere ra oia i te Atua ra,  tia a‘era oia mai te amuraa maa mai, iriti a‘era i to ’na ahu tapo‘i, rave maira i te hoê tauera e taamu atura i nia i to ’na tauupu.  Ninii ihora oia i te pape i roto i te hoê farii e haamata ’tura i te horoi i te avae o te mau pǐpǐ e i te tamǎrô atu i te tauera ta ’na i taamu i nia i to ’na tauupu.  I to ’na taeraa ’tu ia Simona Petero, na ô maira Petero: “E te Fatu, e horoi oe i to ’u avae?”  Pahono atura Iesu: “Aita e taa ra ia oe i teie nei i ta ’u e rave nei, e taa râ ia oe a muri a‘e.”  Na ô maira Petero: “Eiaha oe e horoi i to ’u avae.” Pahono atura Iesu: “Ia ore au e horoi i to avae, e ere ïa oe i te pǐpǐ na ’u.”  Parau maira Simona Petero: “E te Fatu, eiaha ïa to ’u noa avae, to ’u rima atoa râ e to ’u upoo.” 10  Na ô atura Iesu: “O tei hopu ê na i te pape, ua mâ ïa to ’na tino taatoa, o to ’na noa ïa avae te horoi. Mea mâ outou, e ere râ outou pauroa.” 11  Ua ite hoi oia na vai e tuu ia ’na i te rima o te enemi. No reira oia i parau ai: “E ere outou pauroa i te mea mâ.” 12  I muri a‘e i to ’na horoiraa i to ratou avae e oomoraa mai i to ’na ahu tapo‘i, tarava faahou ihora oia i te amuraa maa e na ô atura i ta ’na mau pǐpǐ: “Te taa ra ia outou ta ’u i rave iho nei ia outou? 13  E parau mai outou ia ’u ‘Orometua’ e ‘Fatu,’ ua tano outou, e Orometua e e Fatu iho â vau. 14  No reira, ua horoi au te Fatu e te Orometua i to outou avae, ia horoi atoa ïa outou i te avae o te tahi e te tahi e tia ’i. 15  Ua horoa ’tu hoi au i te hi‘oraa, mai ta ’u i rave ia outou, ia na reira atoa ïa outou e tia ’i. 16  E parau mau ta ’u e parau atu: Aita te hoê tavini i hau a‘e i to ’na fatu, aita atoa tei tonohia i hau a‘e i tei tono ia ’na. 17  Ua ite outou i teie mau mea, e oaoa outou ia rave outou i te reira. 18  E ere no outou pauroa teie parau. Ua ite au i te feia ta ’u i maiti. Ia tupu râ tei papaihia: ‘Tei amu noa na i ta ’u pane,* ua afai ïa i to ’na poro avae i nia e taahi mai ia ’u.’* 19  Te faaara ’tu nei au ia outou i teie parau, ia tiaturi hoi outou e no ’u tera parau i papaihia ia tupu te reira. 20  E parau mau ta ’u e parau atu: O tei farii i ta ’u e tono atu, e farii atoa ïa ia ’u. E tei farii ia ’u, e farii atoa ïa i tei tono mai ia ’u.” 21  I muri a‘e i to Iesu parauraa i teie mau mea, horuhoru roa ihora oia e na ô atura: “E parau mau ta ’u e parau atu: E tuu atu te hoê o outou ia ’u i te rima o to ’u mau enemi.” 22  Hi‘o a‘era te mau pǐpǐ te tahi i te tahi, aita hoi e taa ra o vai ta ’na e parau ra. 23  I pihai iho ia* Iesu, te tarava ra hoê o ta ’na mau pǐpǐ i te amuraa maa. Mea here na Iesu ia ’na. 24  Hi‘o noa maira Simona Petero i taua pǐpǐ ra e na ô maira: “Ani atu na o vai ta ’na e parau ra.” 25  Fariu maira taua pǐpǐ ra ia Iesu ra e ui maira: “E te Fatu, o vai ta oe e parau ra?” 26  Pahono atura Iesu: “O te taata ïa ta ’u e horoa ’tu i te pane ofatihia* ta ’u e tuu i roto i te au‘a.” Tuu ihora oia i te pane i roto i te au‘a, rave maira e horoa ’tura ia Iuda ra te tamaiti a Simona Isakariota. 27  Rave ihora Iuda i te pane e tomo ihora Satani i roto ia ’na. Na ô atura ïa Iesu ia Iuda: “Ta oe e rave nei, haaviti atu â ïa i te rave.” 28  Tera râ, aita hoê a‘e o te tarava ra i te amuraa maa i ite no te aha oia i na reira ’i i te parau. 29  Te mana‘o ra hoi vetahi e i te mea tei ia Iuda ra te afata moni, te na ô atu ra ïa Iesu ia ’na: “A hoo mai i tei hinaaro-mau-hia e tatou no te oroa,” aore ra ia horoa oia i te tahi mea na te feia veve. 30  I muri a‘e i te horoaraahia ’tu te pane, haere atura Iuda i rapae i reira iho. E po hoi. 31  I to Iuda revaraa ’tu, na ô atura Iesu: “I teie nei, te faahanahanahia ra te Tamaiti a te taata nei, e te faahanahanahia ra te Atua na roto ia ’na. 32  E faahanahana atoa te Atua i te Tamaiti a te taata nei e ua fatata roa oia i te na reira. 33  Ta ’u mau tamarii here e, e parahi rii mai â vau ia outou ra. E imi outou ia ’u. Mai ta ’u râ i parau i te ati Iuda: ‘I te vahi ta ’u e haere, eita outou e tae,’ o ta ’u atoa ïa e parau atu ia outou. 34  E faaueraa apî ta ’u e horoa ’tu nei, ia here outou te tahi i te tahi. Mai ia ’u i here ia outou, ia here atoa outou te tahi i te tahi. 35  I te mea e mea here outou te tahi i te tahi, e ite ïa te taata atoa e e pǐpǐ outou na ’u.” 36  Na ô maira Simona Petero: “E te Fatu, e haere oe ihea?” Pahono atura Iesu: “I te vahi ta ’u e haere, eita oe e nehenehe e pee mai ia ’u i teie nei, e pee mai râ oe ia ’u a muri a‘e.” 37  Parau maira Petero: “E te Fatu, no te aha e ore ai e tia ia ’u ia pee ia oe i teie nei? E horoa vau i to ’u ora* no oe.” 38  Pahono atura Iesu: “E horoa oe i to oe ora* no ’u? E parau mau ta ’u e parau atu: Hou te hoê moa e totereo ai, e parau oe e toru taime e aita oe i ite ia ’u.”

Nota i raro i te api

Aore ra “faraoa hopue ore.”
Aore ra “ua patoi mai ïa ia ’u.”
“I nia i te ouma o” na roto i te reo Heleni.
Aore ra “tâpû faraoa hopue ore.”
Heleni pusuke. A hi‘o i te titionare.
Heleni pusuke. A hi‘o i te titionare.