Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ioane 12:1-50

HAAPOTORAA O TE MAU TUMU PARAU

  • Ninii Maria i te mono‘i no‘ano‘a i nia i te avae o Iesu (1-11)

  • Tomoraa Iesu i Ierusalema ma te hanahana (12-19)

  • Tohu ra Iesu i to ’na pohe (20-37)

  • Tupu te parau tohu i to te ati Iuda ereraa i te faaroo (38-43)

  • Haere mai Iesu no te faaora i to te ao (44-50)

12  E ono mahana hou te Pasa, tae atura Iesu i Betania, te vahi e faaeahia ra e Lazaro ta Iesu i faatia mai na mai te pohe mai.  Faaineine ihora te tahi mau taata i te maa na ’na i reira, o Mareta te tuati e o Lazaro te hoê o te feia e tamaa atoa ra* e o Iesu.  Rave a‘era Maria afa litera mono‘i no‘ano‘a, e naradi mau moni rahi, ninii ihora i nia i te avae o Iesu e tamǎrô atura i to ’na rouru. Î roa a‘era te fare i te no‘ano‘a o taua mono‘i ra.  Area Iuda Isakariota, hoê o ta Iesu mau pǐpǐ, o te tuu ia ’na i te rima o te enemi, na ô maira ïa:  “No te aha teie mono‘i no‘ano‘a i ore ai i hoohia no e 300 denari,* a horoa ’tu ai i te moni na te feia veve?”  E ere no to ’na haapeapea no te feia veve i na reira ’i oia i te parau, no te mea râ e eiâ o ’na. Na ’na hoi e haapao ra i te afata moni e e eiâ noa na oia i te moni i roto.  Parau atura Iesu: “A vaiiho na ia ’na, ia rave hoi oia i te reira no te faaineine ia ’u no to ’u hunaraa.  E vai noa mai hoi te feia veve i ǒ outou. O vau nei râ, e ore ïa e vai noa mai i ǒ outou.”  Faaroo a‘era e rave rahi ati Iuda e tei Betania Iesu e haere maira eiaha no te ite ia Iesu noa, ia Lazaro atoa râ ta ’na i faatia mai na mai te pohe mai. 10  Opua a‘era te mau tahu‘a tiaau e haapohe ia Lazaro atoa, 11  no te mea no ’na i haere ai e rave rahi ati Iuda i Betania, a tiaturi atu ai ia Iesu. 12  I te mahana i muri iho, faaroo ihora te nahoa tei haere mai i Ierusalema no te oroa e te haere mai ra Iesu. 13  Rave a‘era ratou i te mau amaa tamara, haere atura e farerei ia ’na e pii atura: “A faaora na ia ’na!* Ia haamaitaihia tei haere mai ma te i‘oa o Iehova!* Ia haamaitaihia te Arii o Iseraela!” 14  Ite a‘era Iesu i te hoê fanau‘a asini e parahi ihora i nia iho, mai tei papaihia: 15  “Eiaha e mǎta‘u, tamahine a Ziona. A hi‘o na! Te haere mai ra to arii, o te parahi ra i nia iho i te hoê fanau‘a asini.” 16  I te omuaraa aita i taa i ta ’na mau pǐpǐ teie mau mea. I to Iesu râ faahanahanaraahia, haamana‘o a‘era ratou e ua papaihia taua mau parau ra no ’na e ua na reira-mau-hia oia. 17  Te feia o tei ite ia Iesu i te piiraa ia Lazaro ia haere mai i rapae i te menema,* a faatia mai ai ia ’na mai te pohe mai, ua faaite haere noa ïa i ta ratou i ite. 18  No reira atoa te nahoa i haere mai ai e farerei ia ’na, ua faaroo hoi ratou e i rave na oia i taua semeio ra. 19  Na ô a‘era te mau Pharisea: “Te ite ra outou, aita tatou i manuïa. A hi‘o na, te pee ra to te ao atoa ia ’na.” 20  I rotopu i te feia tei haere mai i te oroa e haamori i te Atua, e taata Heleni vetahi. 21  Haere maira ratou ia Philipa ra no Betesaida i Galilea e na ô maira ia ’na: “Te hinaaro nei matou e ite ia Iesu.” 22  Haere atura Philipa e faaite ia Anederea e haere atura raua e parau ia Iesu. 23  Tera râ, pahono maira Iesu ia raua: “Ua tae i te taime e faahanahanahia ’i te Tamaiti a te taata nei. 24  E parau mau ta ’u e parau atu: Ia ore te hoê huero sitona ia mairi i raro i te repo e ia ore ia pohe, e vai noa ïa te reira ei hoê noa huero. Ia pohe râ, e hotu mai ïa e rave rahi maa. 25  Te taata e nounou i to ’na ora,* e erehia ïa oia i te reira. O tei ineine râ i te pohe* i roto i teie nei ao, e tapea ïa i to ’na ora* no te fana‘o i te ora mure ore. 26  Ia hinaaro te tahi taata e tavini ia ’u, ia pee mai ïa oia ia ’u, e i te vahi to reira vau, to reira atoa ïa ta ’u tavini. Ia hinaaro te tahi taata e tavini ia ’u, e haamaitai te Metua ia ’na. 27  Te horuhoru nei au,* eaha ïa ta ’u e parau? To ’u Metua, faaora mai ia ’u i teie taime ahoaho. No teie râ taime ahoaho i haere mai ai au. 28  To ’u Metua, a faahanahana i to i‘oa.” Na ô maira te hoê reo mai te ra‘i mai: “Ua faahanahana vau e e faahanahana â vau i te reira.” 29  I to te nahoa e tia ra i reira faarooraa i taua reo ra, parau a‘era ratou e e patiri. Te tahi atu râ, na ô a‘era ïa: “E melahi tei paraparau ia ’na.” 30  Pahono atura Iesu: “E ere no ’u i faaroohia ’i taua reo ra, no outou râ. 31  Te haava nei te Atua i teie nei ao e e tiavaru oia i te arii o teie nei ao i rapae. 32  O vau nei râ, ia faateiteihia vau, e faafatata mai au i te mau huru taata atoa ia ’u.” 33  Te faahiti ra oia i teie mau parau no te faataa e nafea oia e pohe ai. 34  Pahono maira ïa te nahoa ia ’na: “Ua ite matou i roto i te mau papai mo‘a* e e ora te Mesia e a muri noa ’tu. Eaha ïa oe e parau ai e ia faateiteihia te Tamaiti a te taata nei e tia ’i? O vai tena Tamaiti a te taata nei?” 35  Parau atura Iesu: “E vai rii mai â te maramarama i rotopu ia outou. A haere a vai noa mai ai te maramarama ia outou ra, ia ore outou ia roohia i te poiri. O te haere na roto i te poiri, e ore ïa e ite e te haere ra oia ihea. 36  A vai noa mai ai te maramarama ia outou ra, a faatupu i te faaroo i te maramarama ia riro hoi outou ei tamarii* na te maramarama.” I muri a‘e i to Iesu faahitiraa i teie mau parau, haere atura oia e haamo‘e atura ia ’na. 37  Noa ’tu te semeio e rave rahi roa ta ’na i rave na i mua ia ratou, aita ratou i tiaturi ia ’na, 38  ia tupu hoi ta Isaia te peropheta i parau: “Iehova,* o vai tei tiaturi i te mau parau ta matou i faaite atu?* E ua faaitehia te puai o te rima o Iehova* ia vai?” 39  Ua faahiti atoa Isaia i te tumu i ore ai i tia ia ratou ia tiaturi: 40  “Ua haamatapo oia ia ratou e ua faaetaeta i to ratou aau, ia ore hoi to ratou mata e ite e to ratou aau e taa i te auraa, e ia ore ratou e ho‘i mai, a ore atu ai au e faaora ia ratou.” 41  Ua faahiti Isaia i teie mau parau no nia i te Mesia no te mea ua ite oia i to ’na hanahana. 42  Mea rahi atoa te raatira ati Iuda tei tiaturi mau â ia ’na, no to ratou râ mǎta‘u i te mau Pharisea, aita ratou i faaite e te tiaturi ra ratou ia ’na, ia ore hoi ratou ia tiavaruhia i rapae i te sunago. 43  Mea au a‘e hoi na ratou te hanahana no ǒ mai i te taata eiaha râ te hanahana no ǒ mai i te Atua. 44  Tera râ, tuô atura Iesu e na ô ihora: “O te tiaturi ia ’u, te tiaturi ra ïa eiaha ia ’u noa, i tei tono atoa mai râ ia ’u. 45  E o tei ite mai ia ’u, ua ite atoa ïa i tei tono mai ia ’u. 46  Ua haere mai au i roto i teie nei ao mai te maramarama, ia ore hoi te taata atoa e tiaturi ia ’u e parahi noa i roto i te poiri. 47  Tera râ, ia faaroo te tahi taata i ta ’u mau parau e ia ore o ’na e haapao, eita vau e faautua ia ’na. Ua haere mai hoi au, eiaha no te haava i to te ao, no te faaora râ i to te ao. 48  Te taata o te patoi mai ia ’u e o te ore e farii i ta ’u mau parau, te vai ra ïa o te faautua ia ’na. Na te parau ta ’u i faahiti e haava ia ’na i te mahana hopea. 49  E ere na ’u iho ta ’u i parau, ua horoa mai râ te Metua tei tono mai ia ’u i te hoê faaueraa no nia i ta ’u e parau e ta ’u e haapii i te taata. 50  Ua ite atoa vau e maoti ta ’na faaueraa e noaa ’i te ora mure ore. No reira te mau mea ta ’u e parau, mai ta te Metua i faaue mai, e parau ïa vau.”

Nota i raro i te api

Aore ra “e tarava atoa ra i te amuraa maa.”
A hi‘o i te titionare.
E aniraa teie i te Atua ia faaora ia Iesu.
A hi‘o i te titionare.
Aore ra “menema haamana‘oraa.”
Heleni pusuke. A hi‘o i te titionare.
“Tei au ore roa i to ’na ora” na roto i te reo Heleni.
Heleni pusuke. A hi‘o i te titionare.
Heleni pusuke. A hi‘o i te titionare.
“Ture” na roto i te reo Heleni.
“Tamaiti” na roto i te reo Heleni.
A hi‘o i te titionare.
Aore ra “i faatia ’tu?”
A hi‘o i te titionare.