Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ioane 11:1-57

HAAPOTORAA O TE MAU TUMU PARAU

  • Poheraa o Lazaro (1-16)

  • Tamahanahana Iesu ia Mareta raua Maria (17-37)

  • Faatia faahou mai Iesu ia Lazaro (38-44)

  • Opuaraa e haapohe ia Iesu (45-57)

11  Te vai ra te hoê taata ma‘i o Lazaro te i‘oa. No Betania oia, te oire iti o Mareta raua Maria to ’na na tuahine.  O taua Maria ra hoi tei ninii i te mono‘i no‘ano‘a i nia i te avae o te Fatu e tei tamǎrô atu i to ’na rouru. O to ’na ïa taeae o Lazaro te ma‘ihia ra.  Tono ihora na tuahine i te tahi taata ia Iesu ra no te parau atu: “E te Fatu, inaha te ma‘ihia nei to oe hoa here.”  Teie râ, parau ihora Iesu i to ’na faarooraa ’tu: “Te faahopearaa o tena ma‘i, e ere ïa o te pohe, ia hanahana râ te Atua, ia faahanahanahia hoi te Tamaiti a te Atua maoti te reira.”  Mea here hoi na Iesu ia Mareta, ia Maria e ia Lazaro.  Tera râ, i to ’na faarooraa e te ma‘ihia ra Lazaro, ua faaea ’tu Iesu e piti atu â mahana i te vahi to reira oia.  Na ô atura oia i te mau pǐpǐ: “Mai haere â tatou i Iudea.”  Parau maira te mau pǐpǐ: “Rabi,* no imi noa mai nei to Iudea i te pehi ia oe i te ofai, e te ho‘i faahou ra oe i ǒ?”  Pahono atura Iesu: “E ere anei 12 hora to te ao? Ia haere te taata i te ao, eita oia e tano i nia i te tahi mea, no te mea ua ite oia i te maramarama o teie nei ao. 10  Tera râ, ia haere oia i te po, e tano ïa oia i nia i te tahi mea, no te mea aita te maramarama i roto ia ’na.” 11  I muri a‘e i to ’na parauraa i teie mau mea, na ô faahou atura oia: “Te taoto nei to tatou hoa o Lazaro, te haere nei râ vau i ǒ e faaara ia ’na.” 12  Na ô maira ïa te mau pǐpǐ: “E te Fatu, te taoto ra oia, e maitai mai ïa o ’na.” 13  Teie râ, o te pohe o Lazaro ta Iesu e faahiti ra. O ratou râ, ua mana‘o ïa e o te taoto ta ’na e parau ra. 14  I reira ïa to Iesu parau-roa-raa ’tu: “Ua pohe Lazaro, 15  e te oaoa nei au e aita vau i ǒ, no te mea e puai mai to outou faaroo no ta ’u e fatata i te rave. Mai haere ana‘e ia ’na ra.” 16  Na ô atura Toma parauhia te maehaa i te tahi atu mau pǐpǐ: “Mai haere atoa tatou, ia pohe hoi tatou e o ’na.” 17  I to Iesu taeraa ’tu, ite atura oia e a maha ’tura mahana o Lazaro i roto i te menema.* 18  Mea piri Betania ia Ierusalema fatata e toru kilometera.* 19  Mea rahi te ati Iuda tei haere a‘ena mai e tamahanahana ia Mareta e ia Maria no te mea ua pohe to raua taeae. 20  I to Mareta faarooraa e te haere mai ra Iesu, haere atura oia e farerei ia ’na. O Maria râ, ua faaea noa ïa i te fare. 21  Parau atura Mareta ia Iesu: “Fatu, ahani oe i ǒ nei, e ore ïa to ’u taeae e pohe. 22  Tera râ, te tiaturi nei au e noa ’tu eaha ta oe e ani i te Atua, e horoa mai iho â oia.” 23  Na ô maira Iesu: “E tia faahou mai to taeae.” 24  Parau atura Mareta: “Ua ite au e e tia faahou mai oia i te tia-faahou-raa i te mahana hopea.” 25  Na ô maira Iesu: “O vau te tia-faahou-raa e te ora. Ia pohe noa ’tu te taata o te faatupu i te faaroo ia ’u, e ora faahou mai oia. 26  E te taata atoa e ora nei e e faatupu i te faaroo ia ’u, e ore roa ïa e pohe. Tiaturi anei oe i te reira?” 27  Parau atura Mareta: “E, e te Fatu. Te tiaturi nei au e o oe te Mesia te Tamaiti a te Atua, tei haere mai i teie nei ao.” 28  I muri a‘e i to ’na parauraa i te reira, tii atura oia i to ’na tuahine ia Maria e parau omo‘e atura: “To ǒ nei te Orometua e te ani mai ra ia oe.” 29  I to Maria faarooraa i te reira, tia oioi a‘era oia e haere atura ia Iesu ra. 30  Aita â Iesu i tomo atura i roto i te oire rii, tei te vahi â oia i farerei ai Mareta ia ’na. 31  I taua taime ra, tei te fare o Maria te tahi mau ati Iuda, te tamahanahana ra ia ’na. I to ratou iteraa ia Maria i te tia-oioi-raa e te revaraa, pee maira ratou ia ’na no to ratou mana‘o e te haere ra oia i te menema* e ta‘i ai. 32  I to Maria taeraa ’tu i te vahi to reira Iesu e to ’na iteraa ’tu ia ’na, tipapa ihora oia i te pae avae o Iesu e na ô atura: “E te Fatu, ahani oe i ǒ nei, e ore ïa to ’u taeae e pohe.” 33  Autâ ihora Iesu e horuhoru a‘era i to ’na iteraa ia Maria e te ati Iuda atoa tei pee mai ia ’na i te ta‘iraa. 34  Na ô maira Iesu: “Ihea to outou vaiihoraa ia ’na?” Pahono atura ratou: “E te Fatu, a haere mai a hi‘o.” 35  Ta‘i ihora Iesu. 36  Na ô a‘era te ati Iuda: “A hi‘o na, mea here* mau â na te Fatu ia ’na!” 37  Tera râ, parau a‘era vetahi o ratou: “Ua faaaraara teie taata i te mata o te hoê matapo. Aita ïa i tia ia ’na ia rave i te tahi mea ia ore Lazaro e pohe?” 38  Autâ faahou ihora Iesu e haere atura i te menema.* E ana hoi teie tei opanihia i te hoê ofai. 39  Na ô atura Iesu: “A turai i te ofai.” Parau maira Mareta te tuahine o taua taata pohe ra: “E te Fatu, ua hau‘a oia i teie nei, a maha ’tura hoi mahana.” 40  Na ô atura Iesu: “Aita anei au i parau ia oe e ia tiaturi oe, e ite ïa oe i te hanahana o te Atua?” 41  Turai atura ratou i te ofai. Hi‘o a‘era Iesu i nia i te ra‘i e na ô ihora: “To ’u Metua, te haamauruuru nei au ia oe no to oe faarooraa i ta ’u pure. 42  Ua ite au e e faaroo noa mai oe ia ’u. No teie râ rahiraa taata e haaati nei ia ’u i pure atu ai au, ia tiaturi hoi ratou e na oe i tono mai ia ’u.” 43  I muri a‘e i to ’na parauraa i teie mau mea, tuô atura oia: “Lazaro, haere mai i rapae!” 44  Haere maira te taata tei pohe na i rapae, ua vehîhia to ’na na avae e na rima e ua puohuhia to ’na upoo i te hoê ahu. Na ô atura Iesu ia ratou: “A tatara i te ahu i vehîhia ’i oia e a tuu ia ’na ia haere.” 45  Te ati Iuda e rave rahi tei haere a‘ena mai ia Maria ra, tiaturi a‘era ïa ia Iesu i to ratou iteraa i ta ’na i rave. 46  Tera râ, haere atura vetahi o ratou i te mau Pharisea ra e faatia ’tura i ta Iesu i rave. 47  Haaputuputu maira te mau tahu‘a tiaau e te mau Pharisea i te Sunederi e na ô a‘era: “E nafea ïa tatou? Mea rahi hoi te semeio ta tera taata e rave nei. 48  Ia vaiiho tatou ia ’na ia na reira noa, e tiaturi ïa te taata atoa ia ’na, e e haere mai to Roma e rave i ta tatou vahi haamoriraa* e to tatou nunaa.” 49  Tera râ, na ô atura te hoê o ratou, o Kaiapha te tahu‘a rahi i taua matahiti ra: “Aita outou e taa ra? 50  Aita outou e ite ra e mea maitai a‘e no outou ia pohe hoê noa taata no te nunaa eiaha râ ia mou te nunaa taatoa?” 51  Tera râ, e ere no ’na iho teie mana‘o, no te mea râ o ’na te tahu‘a rahi i taua matahiti ra, ua tohu oia e ia pohe Iesu no te ati Iuda e tia ’i. 52  E ere no te ati Iuda noa, no te amui atoa râ i te mau tamarii a te Atua tei purara ê. 53  Mai taua mahana mai ra, opua a‘era ratou e haapohe ia Iesu. 54  Aita ’tura Iesu i haere faahou e ia itehia mai oia e te taata,* reva ’tura râ i te hoê vahi fatata i te medebara, i te hoê oire o Epheraima te i‘oa, e parahi ihora i reira e te mau pǐpǐ. 55  Teie râ te piri mai ra te Pasa a te ati Iuda, e mea rahi to te mataeinaa tei haere i Ierusalema hou te Pasa no te tamâ ia ratou ia au i te peu a te ati Iuda. 56  Te imi ra ratou ia Iesu e te na ô ra te tahi i te tahi a tia noa ’i i roto i te hiero: “I to outou mana‘o, eita iho â o ’na e haere mai i te oroa?” 57  Tera râ, i faaue ê na te mau tahu‘a tiaau e te mau Pharisea e ia ite noa ’tu te hoê taata teihea roa Iesu, ia faaite atu ïa oia e tia ’i ia haru hoi ratou ia ’na.

Nota i raro i te api

“Orometua” te auraa.
Aore ra “menema haamana‘oraa.”
“Fatata 15 setadia” na roto i te reo Heleni. Hoê setadia, fatata ïa 185 metera.
Aore ra “menema haamana‘oraa.”
Heleni phileo.
Aore ra “menema haamana‘oraa.”
Oia hoi te hiero.
“Te ati Iuda” na roto i te reo Heleni.