Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ioane 10:1-42

HAAPOTORAA O TE MAU TUMU PARAU

  • Te tiai mamoe e na aua mamoe (1-21)

    • Iesu te tiai mamoe maitai (11-15)

    • “E mamoe ê atu ta ’u” (16)

  • Patoiraa te ati Iuda ia Iesu i te Oroa pûpû-faahou-raa i te hiero i te Atua (22-39)

    • Rave rahi ati Iuda e ore e hinaaro e tiaturi (24-26)

    • “E faaroo ta ’u mau mamoe i to ’u reo” (27)

    • Mea hoê te Tamaiti raua te Metua (30, 38)

  • Rave rahi tei tiaturi i te tera pae mai i Ioridana (40-42)

10  “E parau mau ta ’u e parau atu: O te ore e tomo mai i roto i te aua mamoe na te uputa, o te pauma râ na te tahi atu vahi, e eiâ ïa taua taata ra e te haru.  O te tomo mai râ na te uputa, o te tiai mamoe ïa.  E iriti mai te tiai uputa ia ’na, e faaroo te mau mamoe i to ’na reo, e pii oia i ta ’na iho mau mamoe ma te faahiti i to ratou i‘oa, a aratai atu ai ia ratou i rapae.  Ua aratai ana‘e oia i ta ’na iho mau mamoe atoa i rapae, e haere oia na mua ia ratou, a pee mai ai ratou ia ’na, no te mea ua matau ratou i to ’na reo.  E ore roa ratou e pee i te hoê taata ê, e horo ê râ, no te mea aita ratou i matau i te reo o te taata ê.”  Ua faahiti Iesu i teie faahoho‘araa ia ratou, aita râ i taa ia ratou te auraa o ta ’na e parau atu ra.  Na ô faahou atura Iesu: “E parau mau ta ’u e parau atu: O vau te uputa e na reira te mau mamoe e haere ai i roto e i rapae.  Te feia atoa tei haere mai ma te parau e o ratou te tiai mamoe mau, e eiâ ïa e te haru. Aita râ te mau mamoe i faaroo ia ratou.  O vau te uputa. O te na roto atu ia ’u i te tomo, e ora ïa. E haere oia i roto e i rapae, a ite atu ai i te vahi e aihere to reira ei maa na ’na. 10  Ia haere mai te eiâ, no te eiâ ïa, no te haapohe e no te haamou. Ua haere mai au ia noaa ia ratou te ora e ia ora maoro atu â. 11  O vau te tiai mamoe maitai. E horoa te tiai mamoe maitai i to ’na ora* no te mau mamoe. 12  Te taata râ tei tarahuhia, e ere i te tiai mamoe e e ere na ’na te mau mamoe, e faarue ïa i te mau mamoe, a horo atu ai ia ite oia i te luko ia haere mai. E haru te luko vetahi mau mamoe, a purara ’tu ai te toea. 13  Eita oia e haapao i te mau mamoe, no te mea e taata tarahuhia oia. 14  O vau te tiai mamoe maitai, ua ite au o vai ta ’u mau mamoe e ua ite ta ’u mau mamoe o vai au, 15  mai te Metua tei ite o vai au e mai ia ’u tei ite o vai te Metua. E horoa vau i to ’u ora* no te mau mamoe. 16  E mamoe ê atu ta ’u, e ere i to teie nei aua. Ia aratai atoa mai au ia ratou e tia ’i, e faaroo mai ratou i to ’u reo, a riro atu ai ei hoê noa nǎnǎ, hoê noa tiai. 17  Mea here na te Metua ia ’u, no te mea e horoa vau i to ’u ora* ia noaa faahou mai ia ’u te reira. 18  Aore roa e taata e rave i to ’u ora,* na ’u iho râ e horoa ’tu. E tiaraa to ’u no te horoa ’tu, e tiaraa atoa to ’u no te fana‘o faahou i te reira. Ta to ’u ïa Metua i faaue mai.” 19  Amahamaha faahou atura te ati Iuda no teie mau parau. 20  Te na ô ra e rave rahi o ratou: “E demoni to ’na e ua maamaahia o ’na. Eaha outou e faaroo ai ia ’na?” 21  Te tahi atu, te na ô ra ïa: “E ere teie mau parau na te hoê taata e demoni to ’na. E nehenehe anei te hoê demoni e faaaraara i te mata o te matapo?” 22  I taua taime ra te tupu ra te Oroa pûpû-faahou-raa i te hiero i te Atua i Ierusalema. Mea to‘eto‘e hoi, 23  e to roto Iesu i te hiero, te hahaere noa ra na te vahi parauhia ‘Anairaa pou a Solomona.’ 24  Haaati maira te ati Iuda ia ’na e ui maira: “Afea oe e parau mai ai ia matou* o vai oe? O oe te Mesia, a faaite roa mai ïa.” 25  Pahono atura Iesu: “Ua parau atu vau, aita râ outou i tiaturi mai. Na te mau ohipa ta ’u e rave nei ma te i‘oa o to ’u Metua e faaite o vai au. 26  Teie râ eita outou e tiaturi mai, no te mea e ere outou i te mamoe na ’u. 27  E faaroo ta ’u mau mamoe i to ’u reo, ua ite au o vai ratou, e e pee mai ratou ia ’u. 28  E horoa vau i te ora mure ore no ratou, e ore roa ratou e haamouhia, e aore roa e taata e haru ia ratou no roto atu i ta ’u rima. 29  E faufaa rahi to te mau mamoe tei horoahia mai e to ’u Metua, e aore roa e taata e nehenehe e haru ia ratou no roto atu i te rima o te Metua. 30  Mea hoê* mâua te Metua.” 31  Ohi faahou ihora te ati Iuda i te ofai no te pehi ia ’na. 32  Na ô atura Iesu ia ratou: “Ua faaite atu vau e rave rahi ohipa maitatai ta te Metua i faaue mai. No teihea ïa ohipa e pehi ai outou ia ’u i te ofai?” 33  Pahono maira te ati Iuda: “E ere no te tahi ohipa maitai e pehi ai matou ia oe i te ofai, no te faaino râ i te Atua, no te mea te parau nei oe e e atua oe, e taata noa hoi oe.” 34  Na ô atura Iesu: “Aita anei i papaihia i roto i ta outou mau Papai mo‘a,* ‘I parau na vau: “E atua outou”’?* 35  Ua parau te Atua e e ‘atua’ te feia ta ta ’na parau e faautua ra, e eita hoi e tia ia taui i te mau Papai. 36  O vau nei râ ta te Atua i haamo‘a e i tono mai i roto i teie nei ao. No te aha ïa outou e parau mai ai: ‘Te faaino ra oe i te Atua,’ no to ’u parauraa e e Tamaiti au na te Atua? 37  Ia ore au e rave i te mau ohipa a to ’u Metua, eiaha ïa e tiaturi mai ia ’u. 38  Teie râ ia rave au i te reira, noa ’tu e eita outou e tiaturi mai ia ’u, a tiaturi no te mau ohipa ta ’u e rave nei, ia taa e ia taa ’tu â ia outou e mea hoê mâua to ’u Metua.” 39  Tamata ihora ratou i te haru ia ’na, aita râ i noaa. 40  Reva faahou atura Iesu i tera pae mai i Ioridana i te vahi i bapetizo ai Ioane i te taata i te omuaraa, e parahi ihora i reira. 41  Mea rahi te taata tei haere mai ia ’na ra e tei na ô: “Aita iho â Ioane i rave hoê noa ’‘e semeio, teie râ e parau mau ana‘e ta Ioane i faahiti no teie taata.” 42  E rave rahi tei tiaturi ia Iesu i reira.

Nota i raro i te api

Heleni pusuke. A hi‘o i te titionare.
Heleni pusuke. A hi‘o i te titionare.
Heleni pusuke. A hi‘o i te titionare.
Heleni pusuke. A hi‘o i te titionare.
Heleni pusuke. A hi‘o i te titionare.
Aore ra “tahoê.”
“Ture” na roto i te reo Heleni.
Aore ra “Mai te mau atua outou.”