Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ioane 1:1-51

HAAPOTORAA O TE MAU TUMU PARAU

  • Riro mai te Parau ei taata (1-18)

  • Poroi a Ioane Bapetizo (19-28)

  • Iesu, te Arenio a te Atua (29-34)

  • Mau pǐpǐ matamua a Iesu (35-42)

  • Philipa e Natanaela (43-51)

1  I vai na te Parau* i te haamataraa, tei te Atua na te Parau, e e atua* na te Parau.  Tei te Atua na oia i te haamataraa.  Mea na roto ia ’na i hamanihia ’i te mau mea atoa, e aita hoê a‘e mea i hamanihia e ere mea na roto ia ’na. E tei hamanihia  na roto ia ’na, o te ora ïa e riro maira taua ora ra ei maramarama no te taata.  E te anaana nei te maramarama i roto i te poiri, e aita te maramarama i pohe i te poiri.  Haere maira te hoê taata tei tonohia e te Atua ei tia no ’na: o Ioane to ’na i‘oa.  Haere maira teie taata ei ite no te faaite papu i te maramarama ia tiaturi te mau huru taata atoa no ta ’na parau.  E ere oia i taua maramarama ra, ua tonohia mai râ oia no te faaite papu i taua maramarama ra.  Fatata te maramarama mau, o te turama i te mau huru taata atoa, i te haere mai i roto i teie nei ao. 10  I roto na oia i teie nei ao, e mea na roto ia ’na i hamanihia ’i teie nei ao, aita râ teie nei ao i ite ia ’na. 11  Ua haere mai oia i to ’na iho fenua, aita râ to ’na iho mau taata i farii ia ’na. 12  I te feia atoa râ tei farii ia ’na e no to ratou tiaturi i to ’na i‘oa, ua horoa ’tu oia i te ravea e riro ei tamarii na te Atua, 13  e ere no te mea ua fanauhia ratou e te metua, e ere atoa no te hinaaro o te metua aore ra o te taata, no to te Atua râ hinaaro. 14  Riro maira te Parau ei taata e parahi maira i rotopu ia tatou, e ua ite matou i to ’na hanahana, te hanahana o te hoê tamaiti otahi no ǒ mai i to ’na metua. E ua î oia i te hamani maitai a te Atua* e te parau mau. 15  (Ua faaite Ioane i te parau no nia ia ’na, o ’na hoi tei tuô: “O te haere mai na muri mai ia ’u, e na mua ’tu ïa ia ’u, no te mea i vai na oia na mua ’‘e ia ’u.”) 16  No te mea i î na oia i te hamani maitai rahi e fana‘o noa ’i tatou i te reira. 17  Mea na roto ia Mose i horoahia mai ai te ture e mea na roto râ ia Iesu Mesia i itehia ’i te hamani maitai rahi e te parau mau. 18  Aore roa e taata i ite i te Atua. Na te atua, e tamaiti otahi e tei pihai iho i te Metua,* i faataa mai o vai te Atua. 19  Ua tono mai te ati Iuda i te mau tahu‘a e te ati Levi mai Ierusalema mai no te ui ia Ioane: “O vai oe?” 20  Aita oia i huna i te parau, ua pahono râ ma te haapapu atu: “E ere au i te Mesia.” 21  Ui maira ratou ia ’na: “O vai ïa oe? O Elia?” Parau ihora oia: “E ere.” “O oe anei te peropheta i tohuhia na?” Pahono atura oia: “E ere!” 22  Parau maira ïa ratou ia ’na: “O vai ïa oe? A faaite mai na ia horoa ’tu matou i te tahi pahonoraa i tei tono mai ia matou. Eaha ta oe e parau no oe iho?” 23  Na ô atura oia: “O vau te taata e tuô haere nei na te medebara: ‘A haamanina i te purumu no Iehova,’* mai ta Isaia te peropheta i parau.” 24  Na te mau Pharisea hoi i tono i taua mau tahu‘a e ati Levi ra. 25  Ui a‘era ratou ia ’na: “Eaha ïa oe e bapetizo ai i te taata e ere hoi oe te Mesia, e ere o Elia, e ere atoa te peropheta i tohuhia na?” 26  Pahono atura oia: “Te bapetizo nei au i roto i te pape. Te ora nei te hoê taata i rotopu ia outou aita outou i matau, 27  e na muri mai o ’na ia ’u, e ore râ e tia ia ’u ia tatara i te taamu o to ’na tiaa.” 28  Ua tupu teie mau mea i Betania i tera pae mai o Ioridana, i reira Ioane e bapetizo ai i te taata. 29  I te mahana i muri mai, ite atura Ioane ia Iesu i te haereraa mai e na ô ihora: “A hi‘o na i te Arenio* a te Atua o te faaore roa i te hara a to te ao nei! 30  I parau na hoi au no ’na: ‘Na muri mai ia ’u te haere mai nei te hoê taata o te na mua ’tu ia ’u, no te mea i vai na oia na mua ’‘e ia ’u.’ 31  Aita vau i matau ia ’na, te tumu râ i bapetizo ai au i te taata i roto i te pape, ia itehia ïa oia e to Iseraela.” 32  Haapapu atoa ’tura Ioane a na ô ai: “Ua ite au i te varua mo‘a* i te pouraa mai mai te uupa ra mai nia mai i te ra‘i, e faaea ihora i nia ia ’na. 33  Aita vau i matau ia ’na, ua parau mai râ te Atua tei tono mai ia ’u e bapetizo i te taata i roto i te pape: ‘Ia ite oe i te varua mo‘a ia pou mai e ia faaea i nia ia ’na, o ’na ïa te bapetizo i te taata i te varua mo‘a.’ 34  E ua ite au i te reira, e ua faaite au e o ’na te Tamaiti a te Atua.” 35  I to muri mai â mahana, te tia ra Ioane e toopiti o ta ’na mau pǐpǐ, 36  ite ihora ia Iesu e haere ra na reira e na ô ihora: “A hi‘o i te Arenio a te Atua!” 37  I te faarooraa na pǐpǐ i te reira, pee maira raua ia Iesu. 38  Fariu maira Iesu i muri, ite atura ia raua e pee mai ra ia ’na e parau atura: “Eaha ta orua e hinaaro ra?” Na ô maira raua: “Rabi (“Orometua” te auraa ia hurihia), ihea oe e faaea ’i?” 39  Parau atura oia: “A haere mai, a hi‘o.” Haere atura raua, ite atura i to ’na vahi faaearaa e parahi ihora i ǒ ’na i taua mahana ra. Ua piri hoi i te ahuru o te hora.* 40  O Anederea te taeae o Simona Petero te hoê o na taata e piti tei faaroo i ta Ioane i parau e tei pee ia Iesu. 41  Ua farerei oia na mua i to ’na iho taeae o Simona e parau atura: “Ua itehia ia mâua te Mesia” (“Kirito” te auraa ia hurihia), 42  e aratai maira ia ’na ia Iesu ra. I to Iesu hi‘oraa ia ’na, parau atura oia: “O Simona oe te tamaiti a Ioane. E parauhia oe Kepha” (oia hoi “Petero” ia hurihia). 43  I te mahana i muri mai, hinaaro ihora Iesu e haere i Galilea. Farerei atura oia ia Philipa e parau atura ia ’na: “A pee mai ia ’u.” 44  No Betesaida o Philipa, te oire o Anederea raua Petero. 45  Farerei atura Philipa ia Natanaela e parau atura: “Ua itehia ia matou Iesu te tamaiti a Iosepha no Nazareta. No ’na hoi te parau i roto i te ture a Mose e te mau papai a te mau peropheta.” 46  Parau maira râ Natanaela: “E taata maitai anei te haere mai Nazareta mai?” Pahono atura Philipa: “A haere mai, a hi‘o.” 47  I to Iesu iteraa ia Natanaela e haere mai ra, parau atura oia: “Teie te hoê Iseraela aita roa e haavare i roto ia ’na.” 48  Parau maira Natanaela: “Mea nafea to oe iteraa?” Pahono atura Iesu: “Hou Philipa a pii ai ia oe, ua ite au ia oe i raro a‘e i te tumu suke.” 49  Pahono maira Natanaela: “Rabi, o te Tamaiti a te Atua oe, e Arii oe no Iseraela.” 50  Pahono atura Iesu: “Te tiaturi nei oe ia ’u no to ’u parauraa ’tu e ua ite au ia oe i raro a‘e i te tumu suke? E ite oe i te mau mea rahi a‘e i teie.” 51  Na ô atura â oia: “E parau mau ta ’u e parau atu: E ite outou i te ra‘i tei matara e ia pou mai te mau melahi a te Atua i te Tamaiti a te taata nei e ia haere i nia.”

Nota i raro i te api

Aore ra “Logo.”
Aore ra “mai te Atua.”
Aore ra “i te hamani maitai rahi.”
Aore ra “tei nia i te ouma o te Metua.” E haamaitairaa taa ê teie.
A hi‘o i te titionare.
Aore ra “Fanau‘a mamoe.”
Aore ra “puai ohipa o te Atua.”
I te area hora 4 i te taperaa mahana.