Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ioane 1, 4:1-21

HAAPOTORAA O TE MAU TUMU PARAU

  • Hi‘opoa i te mau parau tohu (1-6)

  • Ite o vai te Atua e here ia ’na (7-21)

    • “E here te Atua” (8, 16)

    • Aore e mǎta‘u i roto i te here (18)

4  Taeae here ma, eiaha e tiaturi i te mau parau tohu* atoa, a hi‘opoa râ i te mau parau tohu* ia ite outou e no ǒ mai anei i te Atua ra, no te mea e rave rahi te peropheta haavare tei haere atu i roto i teie nei ao.  I teie e ite ai outou e no ǒ mai te parau tohu i te Atua ra: Te mau parau tohu atoa o te faaite ra e ua haere mai Iesu Mesia ei taata, no ǒ mai ïa i te Atua ra.  Area te mau parau tohu atoa e na ô ra e aita Iesu i haere mai ei taata, e ere ïa no ǒ mai i te Atua ra. Na te taata patoi i te Mesia* hoi teie parau ta outou i faaroo e e parau o ’na, e i teie nei, te parauhia ra te reira na te ao nei.  No te Atua outou ta ’u mau tamarii here, e ua upootia outou i nia i te mau peropheta haavare, no te mea mea puai a‘e te Atua tei hoê e o outou, i te Diabolo tei hoê e to teie nei ao.  No teie nei ao ratou, no reira ratou e parau ai i te mau mea no teie nei ao e e faaroo to teie nei ao ia ratou.  No te Atua tatou. Te taata tei ite o vai te Atua, e faaroo mai ïa ia tatou. Te taata e ere o ’na no te Atua, e ore ïa e faaroo mai. Mea na reira ïa tatou e ite ai e e parau tohu mau tera aore ra e parau tohu haavare.  Taeae here ma, e here noa ana‘e te tahi i te tahi, no ǒ mai hoi te here i te Atua ra, e o tei here ra, e tamarii ïa na te Atua e ua ite oia o vai te Atua.  Tei ore e here ra, aita ïa i ite o vai te Atua, no te mea e here te Atua.  I teie i faaitehia mai ai te here o te Atua ia tatou: ua tono mai te Atua i ta ’na Tamaiti otahi i te ao nei ia noaa ia tatou te ora na roto ia ’na. 10  Teie te here o te Atua, e ere o tatou tei here i te Atua, o ’na râ tei here mai ia tatou e tei tono mai i ta ’na Tamaiti ei tusia taraehara* no ta tatou mau hara. 11  Taeae here ma, i te mea e ua here te Atua ia tatou mai te reira te huru, ia here atoa ïa tatou te tahi i te tahi e tia ’i. 12  Aore roa e taata i ite i te Atua. Ia here noa tatou te tahi i te tahi, e vai noa ïa te Atua ia tatou ra e e ite-maitai-hia e te here mau ra tatou ia ’na. 13  I teie e ite ai tatou e mea hoê noa tatou e o ’na e mea hoê o ’na e o tatou: ua horoa mai oia i to ’na varua ia tatou nei. 14  Ua ite roa matou e te faaite atoa ’tu nei e ua tono mai te Metua i ta ’na Tamaiti ei Faaora i to te ao nei. 15  Te taata e tiaturi ra e e Tamaiti Iesu na te Atua, mea hoê noa ïa te Atua e o ’na e mea hoê o ’na e te Atua. 16  Ua ite hoi tatou e mea here na te Atua ia tatou e ua papu ia tatou te reira. E here te Atua, e te taata e here noa ra, mea hoê noa ïa o ’na e te Atua e mea hoê noa te Atua e o ’na. 17  Mea na reira ïa e ite-maitai-hia ’i to tatou here mau, ia nehenehe tatou e paraparau ma te mǎta‘u ore* i te Atua ia tae i te Mahana Haavaraa, no te mea mai ia Iesu Mesia ra tatou i roto i teie nei ao. 18  Aore e mǎta‘u i roto i te here, e tiavaru râ te here mau i te mǎta‘u,* no te mea e haafifi te mǎta‘u ia tatou. Te taata hoi e mǎta‘u ra, aita ïa e here mau ra. 19  Te here nei tatou, no te mea o ’na na mua tei here mai ia tatou. 20  Ia parau te hoê taata: “Te here nei au i te Atua,” mea hae râ na ’na i to ’na taeae, e haavare ïa. Te taata aita e here ra i to ’na taeae ta ’na e ite ra, eita ïa ta ’na e nehenehe e here i te Atua ta ’na e ore e ite ra. 21  Teie te faaueraa ta te Atua i horoa mai, te taata e here ra i te Atua, ia here atoa ïa i to ’na taeae e tia ’i.

Nota i raro i te api

“Te mau varua” na roto i te reo Heleni.
“Te mau varua” na roto i te reo Heleni.
Aore ra “anetimesia.”
Aora ra “ei tusia o te tapo‘i i te hara,” “ei ravea tamǎrûraa.”
Aore ra “ia nehenehe tatou e tiaturi.”
Aore ra “e pee râ te mǎta‘u i te here mau.”