Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ioane 1, 3:1-24

HAAPOTORAA O TE MAU TUMU PARAU

  • E tamarii tatou na te Atua (1-3)

  • Tamarii a te Atua e tamarii a te Diabolo (4-12)

    • E faaore Iesu i te mau ohipa a te Diabolo (8)

  • Here te tahi i te tahi (13-18)

  • Mea rahi a‘e te Atua i to tatou aau (19-24)

3  A hi‘o na i te here rahi o te Metua ia tatou i parauhia ’i tatou e tamarii na te Atua. E tamarii iho â tatou na ’na. No reira i ore ai to teie nei ao i ite o vai tatou, no te mea aita ratou i ite o vai te Atua.  Taeae here ma, e tamarii tatou na te Atua i teie nei. Teie râ, aita â i faaitehia maira mai te aha tatou a muri a‘e. Ta tatou i ite, e riro tatou mai ia ’na ia faaitehia mai o ’na ia ’na, no te mea e ite roa ’tu tatou ia ’na.  Te taata tera to ’na tiaturiraa tei niuhia i nia ia ’na, e tamâ ïa ia ’na iho, mea mâ hoi o ’na.  Te taata e rave i te hara, te ofati atoa nei ïa i te ture a te Atua, e e hara ia ofati i te ture a te Atua.  Ua ite atoa outou e ua haere mai Iesu no te faaore i ta tatou mau hara, e aita e hara i roto ia ’na.  Te taata e hoê noa e o ’na, eita ïa e rave i te hara. Te taata e rave i te hara, aita ïa i ite o vai o ’na e aita atoa e tiaturi ra ia ’na.  Ta ’u mau tamarii here, eiaha outou e vare i te taata. O te rave i te parau-tia, e taata parau-tia ïa, mai ia Iesu mea parau-tia oia.  Te taata e rave i te hara, no te Diabolo ïa o ’na, no te mea mai te haamataraa mai â i hara noa ’i te Diabolo. Te tumu i haere mai ai te Tamaiti a te Atua, no te faaore* i te mau ohipa a te Diabolo.  Te taata e tamarii na te Atua, eita ïa e rave i te hara, no te mea e vai noa te varua mo‘a* o te Atua i roto ia ’na, e eita ta ’na e nehenehe e rave i te hara, e tamarii hoi o ’na na te Atua. 10  I teie e itehia ’i te mau tamarii a te Atua e te mau tamarii a te Diabolo: Te taata aita e rave ra i te parau-tia, e ere ïa o ’na no te Atua, oia atoa te taata aita e here ra i to ’na taeae. 11  Teie hoi te poroi ta outou i faaroo mai te omuaraa mai â, ia here tatou te tahi i te tahi, 12  eiaha mai ia Kaina, no te varua ino* o ’na e ua taparahi pohe i to ’na teina. E no te aha o ’na i taparahi pohe ai i to ’na teina? No te mea mea ino ta ’na mau ohipa. Area ta to ’na teina, mea parau-tia ïa. 13  Eiaha e maere, taeae ma, ia hae teie nei ao ia outou. 14  Ua ite tatou e ua haere mai tatou mai te pohe mai i te ora, no te mea te here ra tatou i te mau taeae. Te taata aita e here ra i to ’na mau taeae, mai te huru ra ïa e ua pohe o ’na. 15  Te taata mea hae na ’na i to ’na taeae, e taparahi taata ïa, e ua ite outou e aita e ora mure ore to te taparahi taata. 16  Ua ite tatou eaha te here, no te mea ua horoa Iesu i to ’na ora* no tatou, e ia horoa atoa ïa tatou i to tatou ora* no to tatou mau taeae e tia ’i. 17  Te taata râ e tao‘a ta ’na, o te ite atu i to ’na taeae i roto i te fifi, eita râ e faaite atu i te aumihi, e nehenehe anei ïa tatou e parau e te here ra o ’na i te Atua? 18  Ta ’u mau tamarii here, ia here tatou, eiaha ïa ei parau noa, ei here ohipa râ e te parau mau. 19  Mea na reira ïa tatou e ite ai e no te parau mau tatou, e ia tiaturi tatou i roto* i to tatou aau e mea here na te Atua ia tatou. 20  Ia faahapa noa mai hoi to tatou aau ia tatou, e haamana‘o ana‘e e mea rahi a‘e te Atua i to tatou aau e ua ite o ’na i te mau mea atoa. 21  Taeae here ma, ia ore to tatou aau e faahapa mai ia tatou, e nehenehe tatou e paraparau roa ’tu i te Atua. 22  E noa ’tu eaha ta tatou e ani ia ’na, e horoa mai iho â o ’na, no te mea te haapao nei tatou i ta ’na mau faaueraa e te rave nei i te mau mea e mauruuru ai o ’na. 23  Teie hoi ta ’na faaueraa: Ia tiaturi tatou i te i‘oa o ta ’na Tamaiti o Iesu Mesia, e ia here te tahi i te tahi, mai ta ’na i faaue mai. 24  E te taata o te haapao ra i ta te Atua mau faaueraa, e hoê noa ïa e o ’na, a hoê noa ’i te Atua e taua taata ra. Maoti te varua mo‘a ta ’na i horoa mai i ite ai tatou e e hoê noa o ’na e o tatou.

Nota i raro i te api

Aore ra “haamou.”
“Huero” na roto i te reo Heleni.
Aore ra “no Satani.”
Heleni pusuke. A hi‘o i te titionare.
Heleni pusuke. A hi‘o i te titionare.
Aore ra “ia haapapu tatou.”