Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ioane 1, 2:1-29

HAAPOTORAA O TE MAU TUMU PARAU

  • E tusia taraehara Iesu (1, 2)

  • Haapao noa i te mau faaueraa a te Atua (3-11)

    • Te faaueraa tahito e te faaueraa apî (7, 8)

  • Tumu e papai ai Ioane (12-14)

  • Eiaha e nounou i teie nei ao (15-17)

  • A ara i te taata patoi i te Mesia (18-29)

2  Ta ’u mau tamarii here, te papai atu nei au i teie mau parau ia ore outou e rave i te hara. Ia rave noa ’tu râ te tahi taata i te hara, e tauturu* to tatou tei te Metua ra, o Iesu Mesia e mea parau-tia oia.  E tusia taraehara* hoi o ’na no ta tatou mau hara, eiaha no ta tatou ana‘e, no ta to te ao atoa râ.  Ia haapao noa tatou i ta ’na mau faaueraa e papu ai ia tatou e ua ite tatou o vai o ’na.  Te taata e parau: “Ua ite au o vai o ’na,” aita râ e haapao ra i ta ’na mau faaueraa, e haavare ïa e aita te parau mau i roto i te aau o taua taata ra.  Ia haapao râ te hoê taata i ta te Mesia parau e papu ai ia tatou e te here mau ra oia i te Atua. Mea na reira tatou e ite ai e mea hoê tatou e o ’na.  Te taata o te parau e mea hoê noa o ’na e o Iesu, ia pee noa ïa o ’na i te huru haerea o Iesu e tia ’i.  Taeae here ma, e ere i te faaueraa apî ta ’u e papai atu nei, e faaueraa tahito râ ta outou i ite mai te omuaraa mai â. Tera faaueraa tahito, o te parau ïa ta outou i faaroo.  Noa ’tu râ, e faaueraa apî ta ’u e papai atu nei, e faaueraa ta Iesu e ta outou i haapao, no te mea fatata te poiri i te mou e ua anaana ê na te maramarama mau.  Te taata e parau e to roto o ’na i te maramarama, mea hae râ na ’na i to ’na taeae, to roto noa ïa i te poiri. 10  Te taata mea here na ’na i to ’na taeae, e vai noa ïa i roto i te maramarama e eita ïa e hahi ê. 11  Area te taata mea hae na ’na i to ’na taeae, to roto ïa i te poiri e te haere nei na te poiri. E aita o ’na e ite ra i te vahi ta ’na e haere nei, no te mea ua po to ’na mata i te poiri. 12  Te papai nei au ia outou ta ’u mau tamarii here, no te mea ua faaorehia ta outou mau hara no to Iesu i‘oa. 13  Te papai nei au ia outou te mau metua tane, no te mea ua ite outou o vai Iesu mai te omuaraa mai â. Te papai nei au ia outou te mau tane apî, no te mea ua upootia outou i nia i te varua ino.* Te papai nei au ia outou ta ’u mau tamarii here, no te mea ua ite outou o vai te Atua, to tatou Metua. 14  Te papai nei au ia outou te mau metua tane, no te mea ua ite outou o vai Iesu mai te omuaraa mai â. Te papai nei au ia outou te mau tane apî, no te mea mea puai outou e te vai noa ra te parau a te Atua i roto i to outou aau e ua upootia outou i nia i te varua ino. 15  Eiaha e nounou i teie nei ao e te mau mea a teie nei ao. Te taata e nounou i teie nei ao, aita ïa o ’na e here ra i te Metua. 16  Te mau mea atoa hoi a teie nei ao, oia hoi te hinaaro tia ore o te tino e te hinaaro tia ore o te mata e te faaiteiteraa ahaaha i ta ’na mau faufaa,* e ere ïa no ǒ mai i te Metua ra, no ǒ mai râ i teie nei ao. 17  Fatata atoa teie nei ao i te mou e ta to te ao atoa e hinaaro ra. Area te taata e rave i te hinaaro o te Atua, e vai noa mai ïa e a muri noa ’tu. 18  Ta ’u mau tamarii here, o te hora hopea teie. Ua faaroo outou e te haere mai nei te taata patoi i te Mesia,* e inaha mea rahi te taata patoi i te Mesia tei tia mai, mea na reira tatou i ite ai e o te hora hopea teie. 19  Ua faarue mai ratou ia tatou nei, no te mea e ere ratou mai ia tatou. Ahani ratou mai ia tatou, e faaea mai ïa ratou ia tatou nei. Ua faarue mai râ ratou ia itehia e e ere pauroa mai ia tatou. 20  Ua faatavai-atoa-hia outou e te Atua mo‘a, e ua ite outou pauroa i te parau mau. 21  Te papai nei au ia outou, e ere no te mea aita outou i ite i te parau mau, no te mea râ ua ite outou i te reira, e no te mea aita e haavare no roto mai i te parau mau. 22  O vai te haavare? E ere anei o te taata e parau ra e e ere Iesu te Mesia? Tera te patoi i te Mesia, te taata aita e tiaturi ra i te Metua e i te Tamaiti. 23  Te taata aita e tiaturi ra i te Tamaiti, e ore ïa e farii-maitai-hia e te Metua. Area te taata e tiaturi ra i te Tamaiti, e farii-maitai-hia ïa e te Metua. 24  Outou râ, ia vai maite ïa ta outou i faaroo mai te omuaraa mai â i roto i to outou aau e tia ’i. Ia vai maite ta outou i faaroo mai te omuaraa mai â i roto i to outou aau, e hoê noa atoa ïa outou e te Tamaiti e te Metua. 25  Teie hoi ta ’na* iho i fafau mai ia tatou: te ora mure ore. 26  Te papai nei au i teie mau parau ia outou no nia i te feia e tamata nei i te haavare ia outou. 27  Area outou, ua faatavaihia ïa e te Atua i to ’na varua mo‘a e e vai noa taua varua mo‘a ra i roto ia outou. Aita e faufaa ia haapii vetahi ê ia outou, na te Atua hoi e haapii nei ia outou i te mau mea atoa na roto i te varua mo‘a, e parau mau te reira e e ere i te haavare. Ia hoê noa ïa outou e o ’na mai tei haapiihia ia outou. 28  No reira i teie nei, ta ’u mau tamarii here, ia hoê noa outou e o ’na, ia paraparau hoi tatou ma te mǎta‘u ore ia faaitehia mai o ’na, e ia ore tatou e atea ê ia ’na ma te haama i te tau o to ’na ho‘iraa mai.* 29  Ua ite ana‘e outou e mea parau-tia oia,* ua ite atoa ïa outou e e tamarii na ’na* te taata atoa e rave i te parau-tia.

Nota i raro i te api

Aore ra “e paruru.”
Aore ra “E tusia o te tapo‘i i te hara,” “E ravea tamǎrûraa.”
Aore ra “ia Satani.”
Aore ra “te faatietieraa ia ’na no ta ’na mau faufaa.”
Aore ra “anetimesia.”
Oia hoi ta te Atua.
Heleni parusia. A hi‘o i te titionare.
Oia hoi Iesu.
Oia hoi na te Atua.