Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Iakobo 3:1-18

3  Eiaha ia rahi te feia e haapii ia vetahi ê i rotopu ia outou, to ’u mau taeae, ua ite hoi tatou e e haava-etaeta-hia ’tu â tatou.  E hapa* hoi tatou paatoa e rave rahi taime. Ia ore te hoê taata ia hapa i te parau, e taata tia roa ïa, e e vî atoa ia ’na to ’na tino taatoa.  Ia tavaha tatou i te puaarehenua ia faaroo mai, e aratai atoa ïa tatou i to ratou tino taatoa.  A hi‘o atoa na i te mau pahi: Noa ’tu to ratou rahi e noa ’tu e te turaihia ra ratou e te mata‘i puai, na te hoê hôe faatere nainai roa e aratai ra ia ratou, ia au i te hinaaro o te taata faatere.  Oia atoa ïa te arero, e mero iti o te tino, e faaahaaha rahi râ te reira. A hi‘o na i te rahi o te uru raau e ura i te hoê auahi iti!  E auahi atoa te arero. I te mau mero atoa o to tatou tino, o te arero tei î i te parau-tia ore, e viivii hoi te tino taatoa e e ino roa te oraraa o te taata i te reira, a mou roa ’tu ai i Gehena.*  E vî hoi te animara oviri e rave rau e te manu e te animara e nee haere e te animara o te tai, e ua vî hoi i te taata.  Tera râ, aita hoê a‘e taata e vî ia ’na te arero. E mea vî ore te reira e te ino, e ua î i te taero e pohe ai te taata.  I te arero tatou e arue ai ia Iehova* te Metua, i te arero atoa râ tatou e faaino ai i te taata tei hamanihia “ma te huru o te Atua.” 10  No roto mai i te hoê â vaha te arueraa e te faainoraa. To ’u mau taeae, e ere i te mea tano ia na reirahia. 11  E pihaa anei te pape maaro e te pape avaava no roto mai i te hoê â apoo? 12  To ’u mau taeae, e horoa mai anei te tumu suke i te olive, e te tumu vine i te suke? Eita atoa ïa te pape maaro e noaa mai i te pape pihaa avaava. 13  O vai te mea paari e te maramarama i rotopu ia outou? Ia faaite papu oia i te reira na roto i to ’na haerea maitai e te ohipa ravehia ma te mǎrû ta te paari e faatupu. 14  Mai te peu râ e pohehae rahi e te imi hara* to roto i to outou aau, eiaha outou e teoteo i to outou paari. Ia na reira outou, e haavare ïa. 15  E ere teie paari no nia mai. E paari teie no te ao nei, no te tino nei, no te mau demoni. 16  I te mau vahi hoi te vai ra te pohehae e te imi hara,* tei reira atoa ïa te faahuehueraa e te mau mea iino atoa. 17  Area te paari no nia mai, e mea mâ ïa na mua roa, e te faaea hau noa, te au noa, te ineine i te auraro, te î i te aroha hamani maitai e te ohipa* maitatai, te maitiiti ore i te taata e te haavarevare ore. 18  Hau atu â, ta te parau-tia e faatupu, e ueuehia ïa ma te hau no te feia* e faatupu nei i te hau.

Nota i raro i te api

Aore ra “turori.”
A hi‘o i te titionare.
A hi‘o i te titionare.
Nehenehe atoa e hurihia “nounou toroa.”
Nehenehe atoa e hurihia “nounou toroa.”
“Hotu” na roto i te reo Heleni.
Nehenehe atoa e hurihia “e te feia.”